Желтоқсанның үшінші онкүндігінде еліміздің бірқатар аймағында шамадан тыс мөлшерде қар түсіп, қатты аяздар болады, деп мәлім етті ішкі істер министрінің орынбасары Юрий Ильин.
"Болжам бойынша ("Казгидромет" РМК – ИК-К) желтоқсанның үшінші онкүндігінде температура төмендеп, кейбір өңірде, атап айтқанда Сотүстік және Шығыс Қазақстанда түнде -25-30 градусқа дейін аяз болады", – деді Ю.Ильин бейсенбі күні Астанада өткен баспасөз жиынында.
Оның айтуынша, Павлодар, Солтүстік Қазақстан, Қостанай және Алматы облыстары аумағында биыл қар алдыңғы жылдармен салыстырғанда мол түседі.
"Қардың қалың болуы халықтың тұрмыс-тіршілігіне белгілі бір қауіп-қатер төндіреді", – деп атап өтті вице-министр.
Осыған байланысты, жергілікті полиция органдары, төтенше жағдайлар комитетінің құрылымдары дайындық жағдайына келтірілген.
"Қазіргі таңда республика аумағындағы тас жол бойларында 40-қа жуық медициналық қосын жасақталды. Олар сондай-ақ көлік құралдарын, жүргізушілер мен жолаушыларды жылыту қосыны қызметін қоса атқарады", – деді Ю.Ильин.
Жергілікті атқарушы органдар ауа райы күрт суытқан жағдайға арнап қосымша 360 жылыту қосынын ұйымдастырылған.
