Қазақстан кәсіпқой боксшысы Қанат "QAZAQ" Ислам (23-0, 19 КО) келесі жекпе-жегіне дайындалу үшін Лас-Вегасқа келді.
Қанат Ислам кәсіпқой бокстағы өзінің кезекті кездесуін 26 мамыр күні Флоридада өткізеді. Отандасымыздың қарсыласы мексикалық Норберто Гонсалес болмақ. Ол кәсіпқой бокста 31 кездесу өткізіп, 23-інде жеңіске жетсе, 8-інде жеңілген.
Қанат Лас-Вегаста бір апта жаттығады. Осы дайындық барысында спарринг те жоспарланған.
Сондай-ақ Қанат Ислам 6 мамыр күні Лас-Вегастағы T-Mobile Arena аренасында өтетін Сауль "Канело" Альварес (48-1-1, 34 КО) пен кіші Хулио Сезар Чавес арасындағы жекпе-жекті тамашалайды.
Бұған дейін отандасымыз сұхбатында "Канеломен" кездескісі келетінін айтқан еді. Тіпті соңғы кездесуінен кейін ол шаршы алаңда мексикалық боксшыны жекпе-жекке шақырды.
