Оқиға 14 желтоқсан күні Алматы-Екатеринбург жолының бойында орын алған. Жүк көлігі жыраға құлап кетіп, салдарынан цистерналардағы күкірт қышқылы төгілді. Бұл туралы өңірдің Төтенше жағдайлар қызметі хабарлады.
"Алматы-Екатеринбург жолының 995-ші шақырымында, Қарағанды қаласынан 11 шақырым жерде MAZ жүк көлігі жол бойындағы жыраға құлап кетті. Жол көлік оқиғасының салдарынан алдын ала болжам бойынша 20 шаршы метр аумаққа 15 тонна күкірт қышқылы төгілді", - деп жазылған хабарламада.
Бұған қоса көлік жүргізушісі ауруханаға жатқызылды. Оның жағдайы орташа ауырлық күйінде деп бағалануда.
"Оқиға орнында облыстық ТЖД-ның 19 қызметкері мен 4 техника, тәртіп сақшылары мен экология департаментінің мамандары жұмыс істеп жатыр", - деп жазылған хабарламада.
