Астанадағы Дженнифер Лопестің концертіне билеттер сатылымы басталмас бұрын ticketon.kz сайты уақытша істен шықты, деп хабарлайды inbusiness.kz сайты.
Билеттер 11 сәуірде сағат 11:00-ден бастап сатылымға шығатыны айтылды.
Алайда бүгін https://ticketon.kz/ сайтының діттеген уақыттан бірнеше минут бұрын ашылмай қалғаны белгілі болды. Портал уақытша істен шықты.
"Сайтқа кірушілердің көптігіне байланысты виртуалды кезек пайдаланылады, бұл веб-сайтты бір уақытта қолданатындар санын шектейді. Осылайша сайтпен оңтайлы жұмыс қамтамасыз етіледі", - деп хабарлады "Тикетон" әкімшілігі.
Айта кету керек, осыған дейін Дженнифер Лопес Астанаға келетінін жазған болатынбыз. Әлемге танымал әншінің елордадағы концертінен бюджетке 400 млн теңге түсетіні белгілі болды.
