"Олимп" букмекерлік кеңсесінің басшыларына қатысты қылмыстық іс аясында тәркіленген 5,5 млн АҚШ долларынан астам қаражат Қазақстан Ұлттық Банкіне қайтарылады, деп жазады inbusiness.kz Экономикалық ресурстардың заңсыз шоғырлануына қарсы іс-қимыл мәселелері жөніндегі ведомствоаралық комиссиясына сілтеме жасап.
"Бүгінде "Олимп" букмекерлік кеңсесінің лауазымды тұлғаларына қатысты қылмыстық іс аясында тәркіленген $5,5 млн және €200 мың көлеміндегі қаражатты Ұлттық банкке аудару рәсімі жүріп жатыр", – деп түсіндірілген дүйсенбідегі хабарламада.
Комиссияның мәліметіне сүйенсек, 95 млрд теңгеге залал келтірген осы букмекерлік кеңсе басшысы С. есімді азаматты қоныс-колонияға ауыстыру (ұстау шарттарын жеңілдету) туралы Қапшағай қалалық сотының 2022 жылғы 6 маусымдағы қаулысының күшін жою туралы жеке өтініш шығарылған болатын.
"Аталған іс бойынша 3,6 млрд теңге (4 ұшақ, 5 жер учаскесі, 15 автокөлік, Алматы қаласындағы 30 жылжымайтын мүлік нысаны (тұрғын және тұрғын емес үй-жайлар және т.б.) мемлекет пайдасына тәркіленді", – деп айтылған баспасөз хабарламасында.
2019 жылы Ұлттық қауіпсіздік органдары прокуратурамен бірлесе отырып Қазақстаннан тыс жерлерге ақша қаражатын заңсыз әкету арналарын анықтап, бұл фактілердің жолын кескен.
