2021 жылы республикалық бюджеттің атқарылуы коронавирус пандемиясының келеңсіз әсерлері жағдайында жүзеге асырылды. Дегенмен 2020 жылмен салыстырғанда іскерлік белсенділіктің жандануы байқалды.
Премьер-Министрдің орынбасары – Қаржы министрі Ерұлан Жамаубаев Сенат отырысындағы сөзін осылай бастады, деп жазды inbusiness.kz.
Оның айтуынша, жалпы ішкі өнімнің өсімі 4%-ды құрады.
"Бұған әсер еткен негізгі факторлар қызмет көрсету секторындағы өсудің жеделдеуі, экспорт есебінен сауда балансының нығаюы, өндіруші емес салалардағы жоғары инвестициялық белсенділік", – деді спикер.
Экономиканың барлық негізгі салаларында оң нәтиже байқалады. Мәселен, өнеркәсіптік өндіріс көлемі – 3,8%, құрылыс саласы – 7,6%, көлік – 3,6%, сауда – 9,2%-ға өсті. Негізгі капиталға салынған инвестициялар көлемі 3,5%-ға ұлғайды.
Инфляция деңгейі 8,4%-ды құрады. Жұмыссыздық 4,9% деңгейінде сақталды.
"Қалыптасқан ахуалда республикалық бюджеттің атқарылуы келесідей көрсеткіштермен сипатталады.Түсімдер 100,8%-ға атқарылып, 12,7 трлн теңгені құрады. Бюджет тапшылығы жалпы ішкі өнімге шаққанда 3,1%-ті құрады. Шығыстар 99,2%-ға игерілді және 15,2 трлн теңгені құрады. Әлеуметтік шығыстар 2020 жылмен салыстырғанда 910 млрд теңгеге ұлғайып, 7,5 трлн теңгені құрады. Бұл – республикалық бюджеттің жалпы көлемінің 50%-ы", – деді Ерұлан Жамаубаев.
Құралай Құдайберген
