Мәжіліс депутаты Екатерина Смолякова аутизмге шалдыққан балалардың болашағына алаңдады, деп хабарлайды inbusiness.kz сайты.
Депутат келтірген дерекке сүйенсек, елімізде 737 мыңнан астам мүгедектігі бар адамдардың ішінде психикалық функциялары бұзылған 144 094 адам бар. Оның ішінде 17 028 адамға аутизм диагнозы қойылған.
Депутат коррекциялық орталықтар саны жетіспейтінін айтты.
"Орталықтардың жетіспеушілігі салдарынан баласын ойлап қайғырып жүрген ата-ана тауқыметін пайдаланып, саны көп, сапасы жоқ, бағасы алтыннан қымбат жекеменшік орталықтар пайдаға белшесінен батуда. Ол жерде қаншалықты маман, қаншалықты дұрыс әдістеме пайдаланатыны да белгісіз.
Аутизмге кеш диагноз қою – ең басты мәселе. Аутизмнің алғашқы белгілері 6 айдан бастап байқалса, Қазақстанда диагноз ресми түрде 3-5 жаста ғана қойылады. Бұл балалардың болашағы бұлыңғыр, коррекциялық орталықтан сәтті өткен күнде де, есейіп ер жеткенде қалай өмір сүреді, қайда оқиды, қандай мамандық алады, қайда жұмыс істеп жанын бағатыны үлкен сұрақ", - деді Екатерина Смолякова.
Жоғарғы оқу орындарында оқып жатқан 2686 мүгедектігі бар студенттің ішінде тек 5 аутист білім алып жатыр. Сонда еліміздегі 17 мың аутизмі бар баланың 5 ғана білім алып жатса, 6000-ға жуығы коррекциялық орталықта жүрсе, қалған 11 мыңнан астам аутисттің тағдыры белгісіз, дейді ол.
Мәжіліс депутаты осы мәселеге байланысты бірқатар ұсыныс тастады.
Ол әр облыс орталығында аутизм дертіне шалдыққан балаларға арналған ерие диагностикалау орталықтары ашылу керек екенін баса айтты. Сонымен қатар мүгедектігі бар адамдармен жұмыс істейтін жаңа мамандарды даярлау, менталды ауытқулары бар азаматтарға арнайы бейімделген курстарда кәсіп алу мүмкіндіктерін қарастыру қажет екенін де жеткізді.
