Қазақстан Республикасының Ұлттық банкі 18 қарашада "Есте қалатын оқиғалар мен біртуар адамдар" монеталар сериясынан номиналы 100 теңгелік нейзильбер қоспасынан жасалған "Т.Жангелдинге 100 жыл" ескерткіш монеталарын айналысқа шығарады. 2016 жылы қазақ халқының әйгілі өкілдерінің бірі, Ұлы Отан соғысының ардагері, белгілі қоғам қайраткері, ғалым Тоқтағали Жангелдиннің туғанына 100 жыл толады.
Монеталардың бет жағында жоғары бөлігінде Қазақстан Республикасының Елтаңбасы бейнеленген. Елтаңбадан оң жақта "ҚҰБ" аббревиатурасы орналасқан. Төменгі бөлігінде монетаның номиналын білдіретін "100 ТЕҢГЕ" деген жазу бар. Номиналдан сол және оң жақта ұлттық ою-өрнек элементі бейнеленген. Айналдыра мемлекеттік тілде "ҚАЗАҚСТАН ҰЛТТЫҚ БАНКІ" деген жазба бар. Монеталардың сырт жағында Беларусьтағы партизан қозғалысына белсенді қатысушы, қоғам қайраткері, ғалым Тоқтағали Жангелдиннің бейнесі орналасқан. Портреттің сол жағында Т.Жангелдин марапатталған Чехословакияның "Партизан жұлдызы" ордені, "100 ЖЫЛ" деген жазба және соғылған жылын білдіретін "2016" деген сан бейнеленген. Айналдыра мемлекеттік тілде "ТОҚТАҒАЛИ ЖАНГЕЛДИН" деген жазба бар.
Монеталар нейзильбер қоспасынан жасалған, диаметрі – 31 мм, массасы – 11,17 грамм, таралымы – 100 мың дана. Номиналы 100 теңгелік ескерткіш монеталар Қазақстан Республикасының бүкіл аумағында көрсетілген құнымен төлемнің барлық түрлері бойынша, сондай-ақ банк шоттарына есептеу және аударым жасау үшін қабылдануға міндетті, Қазақстан Республикасының барлық банктерінде шектеусіз ұсақталады және айырбасталады. Ескерткіш монеталарды "Қазақстан Республикасы Ұлттық банкінің Қазақстан теңге сарайы" шаруашылық жүргізу құқығындағы республикалық мемлекеттік кәсіпорны дайындаған.
