Түркістан облыстық ауыл шаруашылығы басқармасы басшысының орынбасары Нұржігіт Мырзахметовтың айтуынша, түйе және бие сүтін өңдейтін "Golden camel" зауыты қазақ-қытай инвесторларының қаражатына тұрғызылған.
"Мұнда тек Түркістан ғана емес, Қызылорда, Жамбыл облыстарындағы түйе шаруашылығымен айналысатын тұрғындарды кооперацияға біріктіріп, сүттерін зауытқа өткізу көзделген. Біздің есебімізше, қазір Түркістан облысында 29-30 мың түйе, Қызылорда облысында 47 мыңға жуық және Жамбыл облысында 13-15 мың түйе бар", – деді Нұржігіт Мырзахметов.
Оның айтуынша, зауыт жыл соңына дейін іске қосылуы тиіс. Онда тәулігіне 100 тонна түйе және жылқы сүті қайта өңделеді. Сондай-ақ сүт ұнтағы шет мемлекеттерге экспортталады.
"Зауыт келісімі бойынша, түйе сүтін базар бағасынан 50-100 теңгеге қымбатырақ қабылдайды. Мемлекет тарапынан беріліп жатқан жеңілдіктер, жеңілдетілген неиселер бар. Сол бойынша шаруаларға түсіндірме жұмыстарын жүргіземіз", – дейді басқарма басшысының орынбасары.
Қазіргі уақытта Түркістан облысында өндірілген 1 млн 800 мың тоннаға жуық өнім экспортқа шығарылады. Облыстың жеміс-жидегі, қауын-қарбызы мен жүзімдері Ресей мен Германияға жеткен.
"Республикада өндірілетін жалпы ауыл шаруашылығы өнімінің 13%-ын Түркістан облысы өндіреді. Республика бойынша мақтаның 100%-ы, жүзімнің - 72,5%-ы, бақша өнімдерінің - 60%-ы, жеміс-жидектің - 36%-ы, көкөністің - 24%-ы, сүттің - 13,5%-ы, еттің - 12,3%-ы Түркістан облысының үлесінде", – дейді Нұржігіт Мырзахметов.
