Кеше Қазақстан Республикасының Сыртқы істер министрлігінде Қазақстан мен Жапонияның дипломатиялық және қызметтік паспорттарына ие азаматтарын визалық талаптан босату туралы сенім ноталарымен алмасу рәсімі болып өтті. Аталған құжат алдағы жылдың 1 қаңтарынан бастап күшіне енеді, деп хабарлады Қазақстан Республикасы Сыртқы істер министрлігінің баспасөз кызметіне сілтеме жасаған egemen.kz.
Лауазымды тұлғалардың визасыз сапарлар алмасуы саяси байланыстарды әрі қарай ілгерілетуге және Қазақстан мен Жапония арасындағы сауда-экономикалық ынтымақтастықты белсенді ете түсуге оң ықпал ететін болады.
"Қазақстан Президенті Нұрсұлтан Назарбаевтың Жапонияға ресми сапары өтіп жатқан кезде, біз 2017 жылдың 1 қаңтарынан бастап дипломатиялық және қызметтік паспорттары бар адамдарды визалық талаптан өтуден босату туралы сенім ноталарымен алмастық. Бұдан бөлек, Мемлекет басшысының Қазақстан дипломатиясының экономикалық бағдарын күшейту мақсатындағы тапсырмасына орай, алдағы жылдың
1 қаңтарынан бастап Жапония ұлттық паспорттарының иелері үшін 30 күнге дейінгі мерзімге визасыз режім қалыптастырылатын болады. Бұл екі елдің инвестициялар, жаңа технологиялар мен туризм салаларындағы іскерлік байланыстарды белсенді ете түсуіне мүмкіндік береді", деп атап көрсетті рәсім кезінде Қазақстан Республикасы Сыртқы істер министрлігі Консулдық қызмет департаментінің директоры Ардақ Мәдиев.
Сенім ноталарымен алмасу барлық Қазақстан азаматы үшін визалық режімді жеңілдетуге жасалған алғашқы қадам болып табылады.
Жапонияның Қазақстандағы елшілігінің кеңесшісі Ясумаса Идзима аталған оқиға екі ел арасындағы саясат, экономика салаларындағы өзара іс-қимылды нығайтып қана қоймай, азаматтардың өзара сапарлар алмасуына да жағдай туғызатынын атап көрсетті. "Біз барша Қазақстан азаматтары үшін визалық режімді әрі қарай да жеңілдетуге ұмтылыс таныта беретін боламыз", деді жапониялық дипломат.
