Президент жанындағы орталық коммуникациялар қызметінде өткен брифингте Ішкі істер министрінің орынбасары Игорь Лепёха "Мемлекет басшысының шетелдік автокөліктерді заңдастыру бойынша тапсырмаларын іске асыру және жол қауіпсіздігін қамтамасыз ету шаралары" туралы мәлімдеді, деп жазады inbusiness.kz тілшісі.
"Үкімет ағымдағы жылғы 11 қаңтарда ел аумағына 2022 жылғы 1 қыркүйекке дейін әкелінген көлік құралдарының жекелеген санаттарын бастапқы тіркегені үшін алым мөлшерлемесін қолданудың және осындай көлік құралдарын әкелуді жүзеге асырған жеке тұлғаларды өндірушілердің (импорттаушылардың) кеңейтілген міндеттемелерінен босатудың қағидаларын, шарттары мен мерзімдерін бекітті", – деді Игорь Лепеха.
Ережелер алғашқы ресми жарияланған күнінен кейін күнтізбелік он күн өткен соң, қолданысқа енгізіледі, яғни ережелер 12 қаңтар күні жарияланды, олар 2023 жылдың 23 қаңтарында (дүйсенбіде) күшіне енеді және сол күннен бастап шетелдік автокөліктерді заңдастыру басталады.
Көрсетілген Қағидаларда автомобильдер қандай жағдайларда 200 000 теңге мөлшерінде алым мөлшерлемесін төлей отырып және утиль алымнан босатыла отырып, жария етілуге жататын нақты өлшемшарттар белгіленген.
- Бірінші - көлік 2022 жылдың 1 қыркүйегіне дейін елге әкелінуі керек;
- Екінші - іздеуде болмау;
- Үшінші - басқа мемлекетте бұрынғы тіркелген жері бойынша есептен шығарылды;
- Төртінші - кедендік тазартудан өту.
Айта кету керек, бұл ережелер 2023 жылдың 1 шілдесіне дейін күшінде болады және жеңіл автокөліктерге, шағын, орта автобустарға (толық салмағы 5 тоннаға дейін) және шағын жүк автокөліктеріне (толық салмағы 3,5 тоннаға дейін), оның ішінде басқару органдарының оң жақты орналасуына қолданылады.
Ішкі істер министрінің орынбасарының айтуынша, бастапқы тіркеуге жататын шетелдік автокөліктерге жасына және экологиялық сыныбына қойылатын талаптар қойылмайды. Заңдастыруға өтінішті "Электрондық үкімет" порталы арқылы немесе арнайы ХҚКО-ға жеке жүгіну арқылы беруге болады.
Мамандандырылған ХҚКО-ларда арнайы секторлар ұйымдастырылады, олар тек автомобильдерді заңдастыруға құжаттарды қабылдауды жүзеге асыратын болады.
Бұл жағдайда көлік иесі 4 құжатты ұсынуы керек:
1) өтініш;
2) өтініш берушінің жеке басын куәландыратын құжат (жеке басын сәйкестендіру үшін);
3) көлік құралының паспорты және (немесе) көлік құралын тіркеу туралы куәлік;
4) көлік құралына меншік құқығын растайтын құжат (оларға: осы мүлікті сатып алу-сату, айырбастау, сыйға тарту немесе иеліктен шығару туралы өзге де мәміле шарттары, мұрагерлік құқығы туралы куәлік жатады. Бұл ретте, азаматтық заңнамаға сәйкес берілген сенімхат, егер мұндай құқық сенімхатпен берілген жағдайда, көлік құралына меншік құқығын үшінші тұлғаға беру үшін негіз болып табылады.).
Өтініш пен құжаттарды тапсырғаннан кейін, көлік құралы арнайы ХҚКО жанындағы тексеру пунктіне нөмірлік агрегаттарды салыстыру үшін ұсынылады. Салыстыруды ішкі істер органдарының сарапшы-криминалисті жүргізеді.
Тексеру нәтижелері 2 күн ішінде шығарылады.
"Екі күнге дейінгі мерзімде салыстырып тексеруден өткеннен кейін біз шешім шығаруымыз керек: көлік құралы заңдастыруға жата ма, жоқ па", – деді ол.
Ішкі Істер министрі орынбасарының айтуынша, көрсетілген мерзім ішінде көлік құралы Қағидаларда айқындалған өлшемшарттарға сәйкестігіне, яғни 2022 жылғы 1 қыркүйекке дейін елге әкелу, іздестіруде болу, кедендік тазартудан өту, соңғы тіркелген жері бойынша есептен шығару мәніне тексерілетін болады.
