/img/tv1.svg
RU KZ
300 мың емес, 600 мың теңге кредит кешіріледі

300 мың емес, 600 мың теңге кредит кешіріледі

Кімдерге, қалай екенін вице-министр айтты.    

17:45 29 Тамыз 2019 243949

300 мың емес, 600 мың теңге кредит кешіріледі

Автор:

Қанат Махамбет

Үкімет үйінде еңбек және халықты әлеуметтік қорғау вице-министрі Светлана Жақыпова мәлімдеме жасады. Ол бір отбасының мүшелері, яғни ерлі-зайыптылар бір-бірінен бөлек несие рәсімдеген және несие көлемі 3 млн теңгеден аспаған болса, әрқайсысының қарызы жеке-жеке өтелетінін мәлімдеді. 

«Бірінші кредиттік бюроға 2 млн 289 адамға қатысты мәлімет жіберілді. Кредиттік бюро барлық мәліметті екінші деңгейлі банктердің базасымен салыстырып тексерді. Әзірше 507 мың адамның борышын өтеуге рұқсат берілді. Бұл сан алдағы уақытта көбеюі мүмкін. Ел азаматтарына қатысты мәліметтерді жинау барысында ерлі-зайыптылардың әрқайсы жайлы, сонымен қатар көпбалалы отбасының жәрдемақысы кімнің атына рәсімделгені сарапталды. Шаңырақ көтеріп отырған адамдардың кредиттері жеке-жеке қаралды. Егер, ерлі-зайыпты адамдар несиені бір-бірінен бөлек  рәсімдеген және оның көлемі 3 млн теңгеден аспаған болса, онда олардың әрқайсысының 300 мың теңге қарызы өтеледі. Бұл бір отбасының 300 мың емес, 600 мың теңге кредиті кешіріледі деген сөз», – деді Светлана Жақыпова.

Сөз арасында вице-министр қазақстандықтар кредиті кешірілетінін немесе  кешірілмейтінін eGov порталы арқылы біле алатынын баяндады.  

«Бұл үшін порталға тіркеліп, ЖСН енгізу қажет. Қазір азаматтардан өз мәртебесін анықтай алмай жатқаны жайлы шағым келіп түсуде. Біз оларға тізімнің әлі толық бекітілмегенін түсіндіріп жатырмыз. Егер, азамат борышын жеңілдететін санатқа жататынын дәлелдесе, тізім толықтырылады және кредит кешіріледі», – деді вице-министр.

Светлана Жақыпованың түсіндіруінше, борышы жеңілдейтін санатқа жататын азаматқа қатысты мәлімет кейде порталдан табылмауы мүмкін. Алайда бұл мәселені шешуге болады.  

«Егер, 29 жасқа дейінгі тұл жетім eGov порталындағы тізімнен өзін таба алмаса, ол жазбаша түрде білім және ғылым министрлігіне жүгініп, тізімге енгізуін сұрай алады. Ол өтінішпен бірге ата-анасының қайтыс болғаны туралы құжатты, туу туралы куәлікті тапсыруға  тиіс. Білім және ғылым министрлігі онлайн режімде мәліметті бізге тапсырады, біз порталға енгіземіз», – деді еңбек және халықты әлеуметтік қорғау министрінің орынбасары.

Қанат Махамбет 

Тараздық ПИК жетекшілерін тұрғындар қарызы титықтатып бітті

Ал пәтер иелері кооператив өз қызметін тиісті деңгейде атқармай отыр деп уәж айтады.

07 Қыркүйек 2020 10:11 932

Бүгінде Жамбыл облысы орталығында 1365 көппәтерлі тұрғын үй бар екен. Оның 151-і бір қабатты барақ типті, 1161-і екі және одан көп қабатты үй. Осы үйлердің 390-ына 33 пәтер иелері кооперативі техникалық қызмет көрсетеді. Ал 356 көппәтерлі тұрғын үйді тұрғындардың өздері бірлесіп басқарады. 690 үйде басқару құрылымы жоқ. Бұл жайында Тараз қалалық әкімдігінің тұрғын үй қатынастар бөлімінің бас маманы Қайсар Дүйсенбаев айтып берді.

«Пәтер иелері кооперативі - көп пәтерлі үйде немесе ортақ аула және коммуникациясы бар бірнеше үйді біріктірумен тұрғындар құрған ұйым. Ортақ мүлікке қызмет көрсетіп, жөндеу жұмыстарын жүргізу үшін ПИК тұрғындардан ақша жинайды. Аталмыш жұмысты бақылап тексеретін – арнайы тексеру комиссиясы қаржының қайда жұмсалып жатқанын біліп отырады. Егер кооператив жұмысында заң бұзушылық табылса, тұрғындар сотқа арыз жазып, ортақ жиналыста басқарма мүшелерін қайта сайлауға құқылы. ПИК өз міндетін мүлтіксіз атқарып жатқанына күмән туған жағдайда электрондық Үкімет сайтында жарияланған аталмыш тізімді салыстырып тексеруге болады», - дейді ол.

Көбіне тараздық тұрғындар аула сыпырушылар міндеттеріне немқұрайлы қарайды деп шағымданады екен. Олардың сөзінше, аула қай кезде де қоқысқа толып жатады, тал-дарақ жапырағы уақтылы жиналмайды. Алайда, қалалықтар ПИК қызметіне миллион теңгелеп қарызға батқан көрінеді. Мәселен, «Ақбота» пәтер иелері кооперативіне 30 тұрғын үй қарайды. Кооператив төрағасы Нұрдәулет Болысбаевтың айтуына қарағанда, бүгінде тұрғындардың берешегі 16 миллион теңгеге жетіп жығылады.

«Сот арқылы 2 миллион теңгесі ғана өндірілді. Шешім біздің пайдамызға шыққанымен көрсеткен қызметімізге тиісті төлем төлемей жүрген тұрғындарды сот орындаушылары тұрақты мекенжайынан таба алмай сабылып жүр. Екі жылдай болды сотқа талап-арызды нотариус арқылы беріп жүрміз. Оның қызметіне ақы төлейсің, ол да шығын. Бізде еңбек ететін 16 жұмысшы-қызметкерімізге қайткенде де жалақысын ай сайын беруге тиіспіз. Әйтеуір, жұмысшылардың жалақыларын кешіктірмей берудеміз», - дейді ол.

Ал, Лескүл Талқанбаева басшылық жасайтын «Алатау-2» пәтер иелері коперативіне «Талас» және «Алатау» шағын аудандарынан бар-жоғы 7-ақ көп қабатты тұрғын үй қарайды. Соның өзінде тұрғындар 5 миллион теңге қарыз.

«Екі слесарь, екі аула сыпырушы, бір шебер және тағы екі қосымша жұмысшым бар. Олардың айлығын уақытылы төлеу қажет. Қарызы бар тұрғындар болса, алаңсыз. Әр үйден бар болғаны пәтер иелерінің 30-35-ақ пайызы төлейді. Сотқа бермек түгілі абақтыға жауып қойса да қайтармас қарыздарын. Оның үстіне сотқа беретін талап-арызды нотариус арқылы қабылдау да әжептеуір қиындық туғызуда», - дейді Л.Талқанбаева.

«Қаратау» шағынауданындағы 15 көп қабатты тұрғын үйге басшылық жасайтын «Даму» пәтер иелері кооперативінің де жағдайы мәз емес. Оларды да қарыз деген жүйкелетіп біткен. Тұрғындардың 4 миллион теңгеден аса берешегі бар.

«Осы жұмысқа келгеніме жеті жыл болды. Содан бері сотты жағалаумен жүрміз», - дейді кооператив төрағасы Жандос Жарасов.

Айтпақшы, биылғы 7 қаңтарда күшіне енген «Қазақстан Республикасының кейбір заңнамалық актілеріне тұрғын үй-коммуналдық шаруашылық мәселелері бойынша өзгерістер мен толықтырулар енгізу туралы» Заңға сәйкес көп пәтерлі тұрғын үйлерді басқарудың жаңа түрі – мүлік иелерінің бірлестігі жұмыс істеуі тиіс еді. Сала мамандары төтенше жағдай мен карантинге байланысты бұл мәселені ұйымдастыру мүмкін болмағанын айтады. Сондықтан МИБ Тараздағы бұл мәселені қаншалықты шешетіні уақыттың еншісінде.

Әсел Мұратбекқызы

Дәрі-дәрмек тапшылығы мәселелері қалай шешілуде?

Елімізге дәрілік препараттардың 87%-ы сырттан әкелінеді.  

05 Шілде 2020 19:37 3081

Бұл туралы Орталық коммуникациялар қызметінде өткен брифингтке Премьер-министрдің орынбасары Ералы Тоғжанов мәлім етті.

Оның сөзінші елімізде дәрі-дәрмек жетіспеушілі екі себепке байланысты болған. Оның бірі халық тарапынан сұраныстың артуы болса, екіншісі әділетсіз бәсекелестік. Яғни,  алыпсатарлар препараттарды көптеп сатып алып кеткен. Бұл ретте вице-премьер дәрі-дәрмек нарығын пайда көзіне айналдырғандар қатаң жазаланатынын кесіп айтты.

«Бүгін ғана Шымкент қаласында осындай пиғылмен жұмыс імтеген бір азамат қолға түсті. Ол заңға сәйкес жазаланады. Сондықтан барша қазақстандықтарға, әсіресе осы дәрі-дәрмектің айналасындағы жағдайды ескере отырып, пайда тауып қалуды көздейтін азаматтарға мұны ескертіп айтқым келеді. Бұл тікелей Президенттің қарауындағы сұрақ. «Кемедегінің жаны бір», сондықтан бір-бірімізді қолдайық», – деді Премьер-министрінің орынбасары.

Ералы Тоғжановтың айтуынша, МӘМС шеңберінде тегін берілетін препараттардың тізбесі бар. Сондай-ақ, ауруханалар да препараттармен толық қамтылған.

«Бүгінгі таңда ауруханаларда КВИ-ды емдеу үшін дәрі-дәрмектермен толықтай қамтамасыз етілген. Қазіргі уақытта мекемелерде 17 700 адамның жатқанын ескере отырып, болашақта кепілдік болу үшін 27 000 науқасқа арналған дәрілік заттармен қамтамасыз етіліп отыр. Аймақтар арасында 4000 науқас үшін 165 мың қаптама шетелде кеңінен қолданылатын жаңа препараттар таратылуда. 2020 жылдың 15 шілдесіне дейін қосымша тағы да дәрілік препараттар жеткізілетін болады. Бүгінгі таңда МӘМС шеңберінде тегін дәрі-дәрмек тізбесі бар. Бұл препараттар тізіміне антибиотиктер, қызуды төмендететін дәрілер де бар. Оларды мобильді топтармен тегін жеткізу қарастырылған», – деген вице-премьер елімізге дәрілердің басым бөлігі сырттан келетінін жеткізді.

Оның сөзінше отандық компаниялар нарықты тек 13%-ға қамтып отыр. Сондықтан препараттар жетіспеушілігін шешу үшін бір қатар шаралар қабылданған. Оның бірі дәрі-дәрмектерді сертификациядан өткізу рәсімдері жеделдетілген түрде жүзеге асыру.

«Халықты толғандыратын мәселелер аз емес. Оның негізгісі – дәрі-дәрмектермен қамтамасыз ету.  Қазақстанда 8 мыңнан аса дәріхана бар. Отандық өндіріс есебінен олардың барлығын қамтамасыз ету деңгейі 13%, қалғанын сырттан, импорт арқылы алып отырмыз. Мемлекет басшысының тапсырмасына сәйкес, қажетті дәрі-дәрмектермен толықтыру үшін мынадай шаралар қабылданады: Бір тәулік ішінде дәрілік заттарды әкелуге біржолғы рұқсат беруге өтінімдер қабылдау, дәрі-дәрмектерді сертификациядан өткізу мен сертификат беруді жеделдету. Әкімдіктермен бірлесіп көтерме сауда қоймаларын, дәрі-дәрмектердің қоры және бағасын қымбаттатуға жол бермеу үшін жеке дәріханаларды аралап өтетін арнайы мониторингтік топтары құрылды», – деді Ералы Тоғжанов.

Бұған қоса ол дене қызуын төмендететін вирусқа қарсы препараттарды тек дәрігердің нұсқауымен қолдану керек екенін ескертті.

«Өз бетімен емделу өте қауіпті екенін білесіздер. Дәрігерлер емдеу шараларын арнайы хаттама аясында жүзеге асырады. Ол хаттамалардың барлығы әлемдік тәжірибеден алынған. Олар өз тиімділігін дәлелдеген. Сондай-ақ біз жекелей дәрігерлердің де ұсыныстарын қарастыруға әзірміз», – деді ол.

Құралай Құдайберген