DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 324,92 Brent 36,55
«7-20-25» бағдарламасының негізгі қатысушылары кімдер

«7-20-25» бағдарламасының негізгі қатысушылары кімдер

Жеңілдетілген ипотека жобасын 18 банк жүзеге асыруы мүмкін.

20 Маусым 2019 10:17 11362

«7-20-25» бағдарламасының негізгі қатысушылары кімдер

Автор:

Абылай Бейбарыс

Былтырдан бері жүзеге асырылып жатқан «7-20-25» тұрғын үй бағдарламасы ипотека нарығының қарқынын күшейтті. 6 маусымдағы жағдай бойынша екінші деңгейлі банктер үй алу үшін 8253 отбасыға 95,3 млрд теңге қарыз берді.

«Баспана» ипотекалық компаниясы» АҚ коммуникациялар қызметі басшысының орынбасары Айбар Олжаевтың мәлімдеуінше, үй алғысы келетін азаматтардың саны күн сайын көбейіп жатыр. Бұған 2018 жылы ипотека нарығында «7-20-25» және «Баспана-хит» тұрғын үй бағдарламаларының үлесі 7,4%-ды, ал 2019 жылдың  I тоқсанында 27,4%-ды құрағаны дәлел.

«Биыл «7-20-25» тұрғын үй бағдарламасы арқылы екінші деңгейлі банктерден алынған ипотекалық қарыз сомасы 100 млрд теңгеге жетеді, тіпті одан асады деген болжам бар», – деді Айбар Олжаев.

Оның сөзінше, Нұр-Сұлтан қаласының тұрғындары «7-20-25» бағдарламасына жиі жүгінеді.

«Елордалықтардың бағдарламадағы үлесі 34%-ды құрайды. Алматылықтар 21% көрсеткішпен екінші орында тұр. Қалған 45% өңірлердің еншісінде. Ақтау қаласы тұрғындарының баспаналы болуға деген құлшынысы ерекше. Мұнда 3,5 млрд теңгеге 396 несие рәсімделді. Өскемен, Семей қалаларының халқы ипотека нарығының 5%-ын иеленіп отыр. Бұл жерде 380 адам 3,4 млрд теңге қарыз алды. Ал Ақтөбе облысы халқының 418 өтініші қанағаттандырылып, азаматтарға 3,6 млрд теңге берілді», – деді «Баспана» ипотекалық компаниясының» өкілі.

Айбар Олжаевтың айтуынша, «7-20-25» тұрғын үй бағдарламасының негізгі қатысушылары 24-35 жас аралығындағы тұрақты табысы бар азаматтар.

«Өтініш иелерінің басым бөлігі құны 10,9 млн теңгенің шамасындағы үйлерді таңдайды. Борышкерлердің 60%-ы айына орта есеппен 86 мың теңге төлейді. Несие өтеушілердің 30%-ы 100-120 мың, 10%-ы 120 мыңнан жоғары төлем жасайды», – деді ол.

«Баспана» ипотекалық компаниясы» өкілінің сөзінше, екінші деңгейлі банктер борышкердің несие тарихы мен төлем қабілетіне сын көзбен қарайды. Себебі қаржы институттары тәуекелге қадам жасамайды.  

«Бағдарламаны жүзеге асыру үшін үкімет екінші деңгейлі банктерді қаржыландырады. Борышкер қарызын қайтармайтын болса, екінші деңгейлі банктердің басына күн туады. Олар үкімет берген ақшадан айырылады. Осының алдын алу үшін банктер клиенттердің несие портфелін қайта-қайта тексереді және қажет деп тапқан жағдайда кейбір тұлғаларға несие беруден бас тартады», – деді Айбар Олжаев.

Оның мәлімдеуінше, «7-20-25» бағдарламасы үнемі жаңғырып, жаңарып отырады.

«Таяуда ай сайын төленетін төлем құнын азайту үшін қарыз алушыларға алғашқы жарна ретінде 20%-дан жоғары төлем жасау құқығы берілді. Бұған қоса бағдарламаға қатысушы банктерге қойылатын талапқа өзгеріс енгізілді. Қазір «7-20-25» бағдарламасына 8 банк қатысып жатыр, алдағы уақытта олардың саны 18-ге жетуі мүмкін», – деді «Баспана» ипотекалық компаниясының» өкілі.

«Баспана-хит» «7-20-25» бағдарламасымен бәсекелесуі мүмкін бе деген сұраққа Айбар Олжаев: «Ел азаматтары қайталама нарықтан үй алуға ниет білдіріп, өтініш саны көбейген соң, «Баспана» ипотекалық компаниясы» «Баспана-хит»  бағдарламасын іске қосты. Бұл – нарық заңына бағынатын жоба. Оның пайыздық мөлшерлемесі Ұлттық банктің базалық мөлшерлемесіне байлаулы. Бүгінгі таңда ол 10,75%-ға тең. Бұл бағдарлама үйіңіз болса да үй алу, қайталама нарықтан пәтер іздеу құқығын береді. Десек те дәл қазір «7-20-25» бағдарламасының дәурені жүріп тұр. Жоғарыда айтқанымыздай, «7-20-25» бағдарламасы арқылы 8253 несие, «Баспана-хит» бағдарламасы бойынша 6600 несие рәсімделді. Алайда соңғы бағдарламаның қарқыны қатты. Өйткені қайталама нарықтағы үйлерге сұраныс жоғары», –  деп жауап берді.

Абылай Бейбарыс

inbusiness.kz-ті қараңыз, оқыңыз :

«5-10-20»: Павлодардағы үйлердің бағасы 12 млн теңгеден аспауы керек

Жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге.

22 Мамыр 2020 15:23 971

«5-10-20»: Павлодардағы үйлердің бағасы 12 млн теңгеден аспауы керек

Ел президенті тұрғын үй кезегінде тұрған азаматтардың баспана мәселесін шешу үшін «Нұрлы жер» бағдарламасының кезекті бағыты ретінде «5-10-20» ипотекалық бағдарламасын әзірлеуді тапсырды. Қазір жаңа бағдарламаның талаптары жан-жақты пысықталып, қанатқақты жоба ретінде қарастырылуда. Бағдарлама 1 шілдеде қабылданады деген болжам бар.

«Тұрғын үй құрылыс жинақ банкі» АҚ Павлодар облыстық филиалының директоры Талғат Баиловтың айтуынша, қазірдің өзінде бірқатар талаптары белгілі. Біріншіден, баспана алуға ниетті тұрғын жергілікті атқару органында тұрғын үй кезегінде тұруға тиіс. Екіншіден, алғашқы жарна ретінде пәтер құнының кемінде 10 пайызын төлеуі керек. Сол кезде ипотекалық несие 5 пайыздық мөлшерлемемен 20 жылға дейін беріледі.

«Павлодар облысында жеке құрылыс компаниялары ұсынған жаңа үйлердің бағасы 12 млн теңгеден аспауы керек. Ал жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге. Осы сомадан аспауы керек», – дейді Талғат Баилов.

Сонымен қатар, «Тұрғын үй құрылыс жинақ банкі» жанынан жыл соңына дейін «Отбасы банкі» құрылады. Бұл институт баспанаға мұқтаж азаматтарды есепке алу, тіркеу және тұрғын үйді үлестірумен айналысатын болады.

«Тұрғын үй кезегіндегі азаматтардың қай бағдарлама бойынша баспаналы болатыны тұрғын үй қолжетімділігі сатысына сәйкес бағаланады. Атап айтқанда, табысы төмен, яғни отбасының бір айлық кірісі жан басына шаққанда бір күнкөріс минимумынан аспайтын отбасыларға сатып алу құқығынсыз үйді жалға алу мүмкіндігі ұсынылады. Екі күнкөріс минимумына дейін табыс табатын көпбалалы, толық емес және мүмкіндігі шектеулі балаларды тәрбиелеп отырған отбасылар «Бақытты отбасы» бағдарламасына, ал 3,1 күнкөріс минимумына дейін табысқа ие баспанасыз отбасылар «5-10-20» жобасына қатыса алады. 2020 жылдың 1 сәуірінен бастап күнкөріс минимумы 32 668 теңгеге дейін өсті. Осылайша, «5-10-20» арқылы баспаналы болу үшін жан басына шаққандағы отбасы табысы 101 270 теңгеден аспауы тиіс», – деді Талғат Баилов.

Оның сөзінше, «Бақытты отбасы» бағдарламасында төлем қабілеттілігін растау кезінде мемлекеттен алатын түрлі төлемдер есептеледі. Ал «5-10-20» бағдарламасына қатысты мұндай талаптың болар-болмасы әзірше белгісіз.

«Павлодар облысында тұрғын үй кезегінде тұрған адам «5-10-20» бағдарламасы бойынша басқа аймақтан үй ала алмайды. Бүгінде аймағымызда 27 мыңнан астам адам кезекте тұр. Олар аталмыш бағдарлама арқылы Павлодар облысының аудан-қалаларынан ғана баспаналы бола алады», – деді облыстық филиал директоры.

Тұрғындар үшін тиімді жобаларының бірі - «Бақытты отбасы» бағдарламасы. Бағдарлама арқылы тұрғын үй кезегінде тұрғандар үй бағасының 10 пайызын алғашқы жарна ретінде төлеп, 20 жылға дейін жылдық 2 пайыздық мөлшерлемемен несие ала алады.

«Наурыз айында Павлодар қалалық қаржы бөлімі 497 өтінішті қабылдап, түрлі себепке байланысты 15 өтінішті кері қайтарды. Қалған 482 өтінішті қарастырып, біздің банкке 338 жолдама берді. «Тұрғын үй құрылыс жинақ банкі» аталмыш бағдарлама бойынша өтініштерді қарастыру үшін міндетті түрде жергілікті әкімдіктен жолдама берілуі керек. Бүгінде 338 өтініштің 76-сы мақұлданды», – деді Талғат Баилов.

Фархат Әміренов

Ипотекалық қарызды 3 ай төлемеуге рұқсат берілді

Қасым-Жомарт Тоқаев халықтың өтінішін орындады. 

24 Наурыз 2020 09:52 9150

Ипотекалық қарызды 3 ай төлемеуге рұқсат берілді

«Тұрғын үй құрылыс жинақ банкі», «Қазақстан ипотекалық компаниясы» және «Бәйтерек девелопмент» АҚ арқылы несие рәсімдеп, баспана алған жеке, заңды тұлғалар 3 ай ипотекалық қарыздарын қайтарудан босатылады. Бұл туралы «Бәйтерек» ұлттық басқарушы холдингінің» баспасөз қызметі хабарлады.

«Мемлекет басшысының 23 наурыз күні төтенше жағдай жөніндегі мемлекеттік комиссияның отырысында берген тапсырмасына сәйкес, уақытша қаржылық қиындыққа тап болған жеке және заңды тұлғалар үшін холдингтің тұрғын үй блогының еншілес ұйымдары барлық төлемдер бойынша, негізгі қарыз бен сыйақы сомасын қоса алғанда, тұрғын үй және тұрғын үйге жатпайтын жылжымайтын мүлік объектілерін сатып алу құқығымен жалдау, сатып алу, сату мәмілелері бойынша, айыппұл мен өсімақы есептемей, алдағы 3 айда (сәуір-мамыр-маусым) төлемдерді кейінге қалдыру туралы шешім қабылдады», – деп хабарланды рәсми мәлімдемеде.

Белгілі болғандай, борышкерлер мемлекеттік операторларға жеке кабинет, telegram-бот сондай-ақ ресми сайт арқылы қашықтықтан хабарласып, өтініш беруі керек. Әр өтініш жеке тәртіппен қаралады.

«Барлық сұрақтар бойынша call-орталықтар арқылы «Тұрғын үй құрылыс жинақ банкіне»: 300, «Қазақстан ипотекалық компаниясына»: +7 800 080 44 48 «Бәйтерек девелопмент» АҚ-ға: +7 7172 79 65 60, +7 800 080 01 01 телефон нөмірлері бойынша хабарласуға болады», – деп жазды «Бәйтерек» ұлттық басқарушы холдингінің» баспасөз қызметі.

Естеріңізге салайық, Ақордада өткен төтенше жағдай жөніндегі мемлекеттік комиссияның отырысында Президент Қасым-Жомарт Тоқаев халықтың барлық займдары бойынша негізгі қарыз сомасын төлеуді тоқтатуды тапсырды.

«Біріншіден, төтенше жағдай кезеңінде бұған дейін қабылданған айыппұлдар мен өсімпұлдарды есептеуге тыйым салумен қатар халықтың барлық займдары бойынша негізгі қарыз бен сыйақы сомасын төлеуін тоқтата тұру қажет. Банктерден толық түсіністік пен азаматтық ынтымақтастық күтемін», – деді Қасым-Жомарт Тоқаев.

Мемлекет басшысының мәлімдеуінше, ел азаматтары қаржылық қиындықтан құтылу үшін ломбардтарға, онлайн кредиторларға, микроқаржылық ұйымдарға жүгінетін болған.

«Азаматтарды алдауға жол беруге болмайды. Қаржы нарығын реттеу және дамыту агенттігіне, бас прокуратураға, ақпарат және қоғамдық даму министрлігіне заңнаманың сақталуын тексеру бойынша ауқымды акция жүргізуге және заң бұзушыларды жария түрде жазалап, мұны БАҚ пен әлеуметтік желілерде барынша көрсетуді тапсырамын. Бұл қазақстандықтар қиын-қыстау жағдайда өздерінің құқықтарын мемлекет қатаң қорғайтындығын білу үшін қажет», – деді Президент.

Абылай Бейбарыс

inbusiness.kz-ті қараңыз, оқыңыз :

Жаңалықтарға жазылу: