/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 376,04 Brent 36,55
Аяғы кемтар болса да, өзгелерді аяқтан тұрғызып жүр

Аяғы кемтар болса да, өзгелерді аяқтан тұрғызып жүр

Павлодарлық Әйтім Құсайыновтың оңалту орталығына деген сұраныс артып келеді. 

14:23 28 Ақпан 2020 2354

Аяғы кемтар болса да, өзгелерді аяқтан тұрғызып жүр

Автор:

Фархат Әміренов

Қайбір жылы Павлодардағы үш қабатты ғимараттың бірін мекен етіп отырған мекемелер Наурыз мерекесіне орай кеш ұйымдастырды. Ән-биден кейінгі кезек спорттық ойындарға жетті. Алыбы бар, арығы бар ондаған адам білек түріп, ортаға шықты. Бұлар – қол күресінен бақ сынаушылар. Осы сайыста аяғын сүйрете басқан Әйтім Құсайыновтың өз қарсыластарын күйрете жеңгені есімізде. Кемтар жан болса да, қара күштің иесі екен. Жастар бастамаларын дамыту орталығында жұмыс істейтін Әйтім сол кезде көп адамды таңқалдырып еді.

Осыдан екі жыл бұрын Әйтім Құсайынов көпшілікті тағы да тәнті етті. Ол Павлодар қаласынан өзі секілді дертке шалдыққан балаларды емдейтін оңалту орталығын ашты. Осылайша, кәсіпкер ретінде кемтар балаларды аяқтан тұрғызуға атсалысып жүр.

Қоғамдық жұмысқа құлшына кірісіп, азаматтық позициясын, өмірлік көзқарасын ашық айтатын Әйтім Құсайынов былтыр Павлодар облысы бойынша ұйымдастырылған «Ертіс дарыны» жастар сыйлығының лауреаты атанды. Бұл оның іскерлігіне, азаматтығына берілген әділ баға еді.

28 жастағы Әйтім – екінші топтағы мүгедек. ДЦП дертіне шалдыққандықтан, дұрыс жүре алмайды. Бала күнінен солай. Бір аяғын сүйрете басса да, көштен қалған емес. Қайта, қатарластарының алды.

«Әке-шешем ұзақ жылдар бойы Ресейде тұрды. Мен Павлодар облысының Ресеймен шекаралас жатқан Ертіс ауданында туыппын. Бағым шығар, анам – медицина қызметкері. Үйде медициналық әдебиеттер көп еді. Ес білгелі сол кітаптарды оқып, «Неліктен өзгелер секілді дұрыс жүре алмаймын» деген сұраққа жауап іздедім. Мектептегі достарым секілді жоғары қабатқа баспалдақпен жүгіріп шығуды армандайтынмын», – дейді Әйтім Құсайынов.

Әйтімнің әкесі өмірден ерте өтіпті. Анасы 4 жасар қызымен және 1 жасар ұлымен жалғыз қалады. Кейін бұл отбасы Павлодар өңіріне қоныс аударған.

«Бірде анам мен дәрігердің әңгімесін естіп қалдым. Олар өзара сөйлесіп тұр еді. Сол кезде анадай жерде тұрған мүгедектер арбасына көзім түсті. Дәрігердің: «Бала өздігінен жүре алмайды. Қалайда арбаға отыруы керек», – деген сөзін құлағым шалды да, ауруханадан қашып шықтым. Себебі көкейімде «Егер қазір арбаға отырсам, аз қозғалғандықтан, аяқтарым жансызданады. Соның салдарынан ағзада түрлі ауытқулар болады» деген ой тұрды. Мені көшеде жүрген жерімнен тауып алды. Не себепті қашып кеткенімді сұрады. «Қандай жағдай болмасын арбаға отырмаймын!» деп кесіп айттым», – дейді ол.

Әйтім Павлодар қаласындағы Инновациялық Еуразиялық университетін тәмамдайды. Жоғары оқу орнын бітірген соң, «үйде отырып қалмау керек» деген оймен жұмыс іздейді. Ал мүмкіндігі шектеулі жанға жұмыс табу қиынның қиыны. Соған қарамастан, үмітін үкілеп Павлодар қаласындағы Жастар бастамаларын қолдау орталығына келеді.

«Директоры өте тамаша адам екен. Әңгімемді тыңдады. Сөзге келмей, жастарды жұмыспен қамту жөніндегі инспектор ретінде жұмысқа алды. Дәл осы жұмыс өмірге деген құштарлығымды одан әрі арттырды. Жұмыс барысында мүмкіндігі шектеулі жандармен жиі ұшырасатынмын. Көбінің көзінде от жоқ. Өмірден түңілген. Осындай жандардың ел қатарлы жүріп-тұруына, еңбек етуіне үлес қосқым келді. Сол себепті анам Роза Құсайынованың ерекше қолдауымен мүгедек балаларға арналған оңалту орталығын ашуды қолға алдым. Бұл өте үлкен жауапкершілік, әрине. Мен осы жауапкершілікті арқалауға бекіндім», – дейді Әйтім.

Айтып өткеніміздей, Әйтімнің жеке кәсібін ашуға көмектесіп, демеген өзінің анасы. Орталықтың негізгі жұмысы да осы кісінің мойнында. Роза Құсайынова дертке шалдыққан балаларға түрлі массаждар жасайды. Ал Әйтім мүгедек жандарға арнап тренингтер өткізеді. Бүгінде орталықтың танымалдылығы артып келеді.  

«Әйтім тоғыз жасқа дейін жүрген жоқ. Дәрігерлер «балаңыз өмір бойы осылай өтеді» деді. Дәрігер айтты екен деп, баламнан бас тартпаймын ғой. Ұлымды аяқтан тұрғызу үшін медицинадағы білімімді одан әрі жетілдіруді жөн көрдім. Себебі Әйтімнің интелектісі өте жоғары екенін жақсы білемін. Сөйтіп, медицинаның мүлдем басқа саласында жұмыс істесем де, ұлым үшін алдымен массаж жасауды үйрендім. Астанаға барып, емдік дене шынықтыруды, яғни ЛФК-ны меңгердім. 45 жасымда логопед-дефектолог мамандығына оқуға түстім. Жұмыс барысында өте қиын жағдайға душар болған балаларды көріп, шүкір етемін. Қазір он екі мүшесі сау адамдар да өмірден түңіліп, баз кешіп жүреді ғой. Әйтімнің бойында мінез бар. Ерік-жігері мықты. Оны алға жетелейтін де осы қасиеттері», – дейді Роза Құсайынова.

Әйтім мүмкіндігі шектеулі жандарға реабилитациялық көмек көрсету жобасын әзірлеп, «Самұрық Қазына» қорынан 500 мың теңге көлемінде грант ұтып алады. Бұл сома орталықтың бастапқы шығындарына жұмсалады. Бүгінде орталықта күніне 10 балаға ем жасалады. Атап өтерлігі, орталықтың жұмысына Ресей, Өзбекстан елдерінен де қызығушылық танытатындар жоқ емес.   

«Мүгедектік адамның ой-санасында ғана болады. Кемшілігім бар деп кері тартуға болмайды. Өмірдің кез келген белесін бағындыру адамға ерекше ләззат сыйлайды. Бастысы, іркілмей, қадам жасау керек. Мейлі, мүгедек болсаң да», – дейді Әйтім Құсайынов.

Фархат Әміренов

Санитарлық-эпидемиологиялық талапты сақтамаған 15 кәсіпорын жабылды

Елорда да 3 мыңға жуық бизнес субъектісі жұмыс істеп жатыр.  

23 Сәуір 2020 17:03 2747

Санитарлық-эпидемиологиялық талапты сақтамаған 15 кәсіпорын жабылды

Фото: Максим Морозов

Төтенше жағдай жөніндегі мемлекеттік комиссияның 20 сәуірде қабылдаған шешіміне сәйкес, карантин кезіндегі шектеулердің алынуына байланысты Нұр-Сұлтан қаласындағы құрылыс және жол-құрылыс салаларының компанияларына, ірі құрылыс дүкендеріне, көлік, қоймалау салаларындағы ұйымдарға, ауыл шаруашылығы мақсатындағы сервистік компанияларға, автосалондарға, көлікке техникалық қызмет көрсету станцияларына, авто жуу, дөңгелек ауыстыру сервистеріне, автобөлшек дүкендеріне, химиялық тазалау, кеңсе техникасын жөндеумен айналысатын компанияларға, екінші деңгейлі банктерге сағат 9:00-ден 16:00-ге дейін штат санының 50%-ын шектеумен, нотаруистерге алдын ала жазылу бойынша және қоғамдық тамақтану нысандарына тамақты жеткізіп беру қызметін іске қосу арқылы 
сағат 22:00-ге дейін жұмыс істеуге рұқсат берілді. Барлық бизнес субъектілері санитарлық-эпидемиологиялық талаптарды сақтау мен жұмыс істеу алгоритмінің бекітілген талаптары мен шарттарын бұлжытпай орындауға міндеттелді. 
Карантин жағдайында жұмыс қалай жүріп жатыр, кәсіпкерлер міндеттерін мінсіз атқарып отыр ма, бизнес субъектілеріне мемлекет тарапынан қандай қолдау көрсетілуде деген мәселелерді Нұр-Сұлтан қаласы кәсіпкерлер палатасының өкілдері онлайн талқылады. 

Нұр-Сұлтан қаласы кәсіпкерлер палатасы директорының экономикалық мәселелер жөніндегі орынбасары Бейсен Жолболдиевтің сөзінше, бизнес субъектілері карантин кезінде жұмыс істеу тәртібін тиісінше сақтап отыр. 

«Құрылыс саласының өкілдеріне тәулігіне 24 сағат жұмыс істеуге рұқсат берілді. Қалған кәсіпорындар таңғы сағат 9-дан кешкі 18:00 - ге дейінгі жұмыс кестесін сақтауға тиіс. Жұмыс берушілер қызметкерлеріне орталықтандырылған тасымалдау жүйесін қалыптастырып, қызметтік автобус бөлуі керек», – деді директордың орынбасары.

Бейсен Жолболдиевтің айтуынша, көктемгі дала жұмыстарының басталуына байланысты ауыл шаруашылығы өкілдерінің карантин аймағында кедергісіз қозғалысын қамтамасыз ету үшін электронды рұқсатнама беретін AgroRuqsat сервисі іске қосылған. 
«Ауыл шаруашылығы тауарларын өндірушілер цифрлы құжат алуда белсенділік танытып жатыр. Құжатқа ие болған шаруалар бақылау бекеттерінен кедергісіз өтеді», – деді ол. 

Карантин кезінде жұмыс істеу тәртібін бұзған бизнес субъектілері де бар екен. Бұл туралы Нұр-Сұлтан қаласы кәсіпкерлер палатасы директорының заңгерлік мәселелер жөніндегі орынбасары Қуанышбек Мұқаш мәлімдеді. 

Оны дерегінше, елорда да 3 мыңға жуық бизнес субъектісі жұмыс істеп жатыр. 

«Карантин кезінде қызметіне кіріскен бизнес субъектілеріне бірқатар талап қойылды және талапты орындамағандар әкімшілік жауапкершілікке тартылатыны алдын ала ескертілді. Бүгінге дейін санитарлық-эпидемиологиялық талапты сақтамаған 15 кәсіпорын жабылды. Біз барлық кәсіпкерлерді Мемлекет басшысының сенімін ақтауға шақырамыз. Ел билігі кәсіпкерлерді дағдарыстан шығару үшін тәуекелге бел буды. Осы арқылы карантин кезінде жұмыс істеуге рұқсат берді. Бизнес әлеуметтік жауапкершілігін ұмытпауы керек. Адамдардың өмірі мен денсаулығына қауіп төндірмеу ерекше назарға алыну қажет», – деді Қуанышбек Мұқаш.

Ол авто жуу, дөңгелек ауыстыру сервистері сақтық шараларын сақтауға ерекше мән беруге тиіс екенін айтты. 

«Бізге қызмет көрсету сервистерінде ұзын-сонар кезек пайда болып жатқаны туралы ақпарат келіп түсті. Мұндайға жол беруге болмайды. Карантин кезіндегі талапты орындамаған бизнес субъектілерінің кәсібі тоқтатылады», – деді кәсіпкерлер палатасы директорының орынбасары.

Қуанышбек Мұқаштың мәлімдеуінше, мейрамханалар мен қоғамдық тамақтану орындары жұмыс істеп жатқанмен, көпшілікке бұл жерлерге баруға болмайды. 
«Тұтынушылар қалаған тамақты тапсырыспен ғана ала алады», – деді ол. 

Онлайн талқылауда Нұр-Сұлтан қаласы кәсіпкерлер палатасы директорының әлеуметтік мәселелер жөніндегі орынбасары Айболат Есентеміров бүгінге дейін елорданың 240 мыңнан астам тұрғынына 42 500 теңге көлеміндегі 
әлеуметтік көмек тағайындалғанын мәлімдеді. 

«Әлеуметтік жәрдемақы алуға қатысты 11 мың өтініш «Атамекен» ұлттық кәсіпкерлер палатасының жанынан құрылған жедел штабта қаралды. Іс барысында 6 мыңға жуық қате толтырылған өтініш жөндеу үшін кері қайтарылды», – деді Айболат Есентеміров.

Қанат Махамбет

«Төтенше жағдай режимі: бизнес және мемлекет»: Өнеркәсіптік кәсіпорындар қызметіне қалай кірісті?

Жиһаз жасаушыларға карантин кезінде жұмыс істеу тиімсіз.   

22 Сәуір 2020 11:00 3055

«Төтенше жағдай режимі: бизнес және мемлекет»: Өнеркәсіптік кәсіпорындар қызметіне қалай кірісті?

Төтенше жағдай жөніндегі мемлекеттік комиссия 20 сәуірден бастап Нұр-Сұлтан, Алматы қалаларында бірқатар бизнес субъектісі үшін карантин кезіндегі шектеулерді алып тастады. Осылайша Нұр-Сұлтан қаласында өнеркәсіптік кәсіпорындар: құрылыс және жол-құрылыс салаларының компаниялары, ірі құрылыс дүкендері, көлік, қоймалау салаларындағы компаниялар, ауыл шаруашылығы мақсатындағы сервистік компаниялар, автосалондар, көлікке техникалық қызмет көрсету станциялары, авто жуу, дөңгелек ауыстыру сервисі, автобөлшек дүкендері, химиялық тазалау, кеңсе техникасын жөндеу, екінші деңгейлі банктер сағат 9:00-ден 16:00-ге дейін штат санының 50%-ын шектеумен, нотаруистер алдын ала жазылу бойынша
қоғамдық тамақтану нысандарының жұмысы тек өзімен алып кету және жеткізу қызметімен сағат 22:00-ге дейін; Алматы қаласында өнеркәсіптік кәсіпорындар; құрылыс және жол-құрылыс салаларының компаниялары, құрылыс материалдарының ірі көтерме базарлары; нотариустер алдын ала жазылу бойынша; тек бизнеске қызмет көрсету үшін халыққа қызмет көрсету орталығының бір бөлімшесі (Наурызбай ауданы, Шұғыла шағын ауданы, 347/1) жұмысын жаңғыртты.

Бұл үдеріс жүзеге қалай асып жатыр? Мәселе «Атамекен» ұлттық кәсіпкерлер палатасы мен Atamekеn Business телеарнасының тікелей эфирдегі «Төтенше жағдай режимі: бизнес және мемлекет» атты телемарафонында талқыланады. 

Дәріханалар желісі мен медициналық клиника бизнесінің сондай-ақ медициналық құрал-жабдық жеткізу ісін дөңгелетіп отырған  кәсіпкер Аслан Құнияров 20 сәуірден бастап қызметтеріне кіріскендерін мәлімдеді. 

«Бұған дейін қызметкерлеріміздің 70% қашықтан жұмыс істеді. Тап қазір біз теңге бағамының құбылуынан зардап шегіп отырмыз. Көп нәрсені шетелден алып келеміз. Бізге бағаның көтерілуі үлкен мәселе туғызады. Жыл басында тендерлерге қатыстық. Соның есебінен ғана ұттық. Қазір баға тым жоғары. Жыл басында жасалған келісімшарттарға өзгеріс енгізуге, жаңа келісімшарт жасауға мүмкіндік беріле ме, осыны білгім келеді», – деді кәсіпкер. 

Оның мәселесіне Нұр-Сұлтан қаласы әкімдігі инвестициялар және кәсіпкерлікті дамыту басқармасы басшысының орынбасары Қасымхан Жүзенов ортақтасты.
«Төтенше жағдайдың салдарынан кәсіпкерлер түрлі қиындықтармен бетпе-бет келді. «Атамекен» ұлттық кәсіпкерлер палатасы күн тәртібінде тұрған барлық өзекті мәселелерді сараптап жатыр. Себебі бұл палатаның құзіретінде қарастырылатын мәселе. Отандық өндірушілердің өнімін тұтыну арқылы ұлттық экономикаға оң әсер етуге болады. Бұл кәсіпкерлер үшін де тиімді. Себебі шетелден тауар тасымалдаудың тәуекелі көп», – деді басқармасы басшысының орынбасары.

Медицина саласына қатысты тауарлардың 30% шетелден тасымалданады екен. Себебі кейбір препараттар елімізде өндірілмейтін көрінеді. Бұл туралы Нұр-Сұлтан қалалық кәсіпкерлер палатасы директорының орынбасары Бейсен Жолболдиев: «Медициналық емес тауар өндірушілерді алатын болсақ, бүгінгі таңда Нұр-Сұлтан қаласында 7 800 түрлі тауардың тізімі түзілген. Мемлекеттік сатып алу кезінде осы тауарларға басымдық беріледі», – деді. 

Жиһаз жасаумен айналысатын кәсіпкер Азамат Жақсыбаев сату мәселесінен қиындық туып жатқанын жеткізді. 

«Біз арнайы тапсырыспен жиһаз жасаймыз. Қазір дүкендеріміз жабық тұр. Сәйкесінше тауар өтпей жатыр. Аумағы 2 мың шаршы метрді құрайтын нысандардың жұмыс істеуіне рұқсат беріледі деген сөзді естігенбіз. Рұқсаттың берілуін күтіп отырмыз. Казір карантинге дейін қабылданған тапсырыстарды орындап жатырмыз. Жеткізу мәселесін қалай шешетінімізді де білмей отырмыз. Тапсырыс берушіге жиғазды жеткізгеннен кеін де жұмыс бар. Жиһаз орнатуға кем дегенде 3-4 сағат уақыт қажет. Осы істі қалай атқарамыз. Бұған да жауап тапқан жоқпыз», – деді Азамат Жақсыбаев.
 

Қанат Махамбет