/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 440,47 Brent 36,55
Бизнес-омбудсмен кәсіпкерлердің коммуналдық төлемдерін шегеруді ұсынды

Бизнес-омбудсмен кәсіпкерлердің коммуналдық төлемдерін шегеруді ұсынды

«Атамекен» ҰКП кәсіпкерлерді қолдаудың 6 тетігін атады.

15:17 31 Шілде 2020 573

Бизнес-омбудсмен кәсіпкерлердің коммуналдық төлемдерін шегеруді ұсынды

Автор:

Есжан Ботақара

Премьер-министр Асқар Мамин Мемлекеттік комиссияның отырысында Ұлттық экономика министрлігі мен «Атамекен» ұлттық кәсіпкерлер палатасына бүгінгі күрделі кезеңде кәсіпкерлерге қолдау көрсету шараларының кешенін әзірлеуді тапсырған болатын. 

Қазақстан кәсіпкерлерінің құқықтарын қорғау жөніндегі уәкіл Рустам Жүрсінов «Атамекеннің» бұл тұрғыдағы ұстанымы Премьер-министрдің бірінші орынбасары А.Смайыловқа бұған дейін жолданғанын айтады. Өзінің Facebook-тегі парақшасында бизнес-омбудсмен аталмыш ұсыныстың мазмұнын жіліктеп жазды.

«Біріншіден, кәсіпкерлік субъектілері үшін биылғы жылдың соңына дейін кейінге қалдыру шараларын қайта енгізу қажет. Кәсіпкерлерден салықтар мен әлеуметтік төлемдерді төлеу мерзімін ұзарту туралы өтініштер әлі де түсіп жатыр. Мүлік кепілі мен банк кепілдігін міндетті түрде беру бөлігіндегі салық заңнамасының қолданыстағы ережелері ағымдағы экономикалық жағдайда бизнестің мүмкіндіктеріне сәйкес келмейді», – деп жазады Рустам Жүрсінов.

Оның айтуынша, қосымша құн салығына қатысты да бетбұрыстар қажет.

«Екіншіден, өндіріс саласына қарамастан, барлық салық төлеушілерге оңайлатылған тәртіппен қайтарылуы мүмкін ҚҚС сомасының мөлшерін ұлғайту және іс жүзінде есептелген табыс салығының аванстық төлемдерден асып кетуі бөлігінде шараларды тарату мүмкіндігін қарастыру қажет. Бәсекеге қабілетті кәсіпорындарды сақтау өте маңызды. Экспортқа бағдарланған кәсіпорындар үшін ҚҚС-ты уақтылы немесе толық қайтармау іс жүзінде кәсіпорынның айналымдағы қаржысының қозғалыссыз қалуын білдіреді. Сондай-ақ, көптеген компаниялар үшін ағымдағы кезеңде аванстық төлемдер мөлшерін азайту кезінде айыппұл санкцияларын қолдану мәселесі өзекті болады», – деген уәкіл тауарлардың ілеспе жүкқұжатын енгізуді кейінге қалдырып, коммуналдық төлемдерді шегеру қажет деген ой айтты.

«Үшіншіден, салық органдарының мәжбүрлеп өндіріп алу шараларын коронавируске қатысты жағдай толық реттелгенге дейін тоқтата тұру қажет, сондай-ақ ШОБ субъектілері үшін ілгерідегідей қосымша кейінге қалдыруды қарастырған жөн. Төтенше жағдай кезінде салықтық тексерулердің өту мерзімі, өсімпұл есептеу және банк шоттары мен касса бойынша шығыс операцияларына тыйым салу тоқтатылған болатын. Ал қазір кәсіпкерлердің банктік шоттарына тыйым салу жағдайлары орын алуда. Олар шотындағы қаражатын ала алмай отыр. Төртіншіден, тауарға ілеспе жүкқұжатты (ТІЖ) жаппай енгізу мерзімін кейінге қалдыру қажет. Бұл салықтық әкімшілендіру бөлігінде пәрменді шара болар еді. Егер төтенше жағдай енгізілгенге дейін бизнес тарапынан есептік бағдарламаларды пысықтау және бейімдеу кезеңін қамтамасыз ету үшін уақыт беру туралы мәселе көтерілсе, бүгінде бизнес үшін бақылаудың жаңа құралдарын былай қойғанда, аман қалу мәселесі өзекті болып тұр. Ағымдағы жылдың 1 қазанынан бастап, тауарға ілеспе жүкқұжатты енгізу қосымша жүктеме болады және кейін нарықта еңбек ресурстарын босата отырып, бизнестің толық жабылуына әкелуі мүмкін. Бесіншіден, коммуналдық қызметтерді тұтынушы кәсіпкерлерге коммуналдық қызметтерді төлеу бойынша кейінге қалдыру мүмкіндігін қарастыру қажет. Себебі бұл мәселе әлі күнге дейін өзекті болып отыр. Алтыншыдан, биылғы жылдың соңына дейін мемлекеттік мүлікті және квазимемлекеттік сектор субъектілерінің мүлкін жалға алушыларға жалдау төлемдерін есептемеуді ұзарту мәселесін қарау қажет. Өйткені ғимараттардағы барлық қызметкерлер қашықтан жұмыс істеуге көшірілген және ғимаратқа бөгде адамдардың кіруі шектелген», – дейді бизнес-омбудсмен.

Сөзінің соңында Рустам Жүрсінов аталған 6 ұсыныс қолдау таппаса, жер-жерде жұмыс орындарын сақтау қиын болатынын ескертеді.

«Бүгінде кәсіпкерлерге салықтық, несиелік және жалақы міндеттемелері бойынша жан-жақты қысым түсіп тұр, сондықтан ұсынылған шараларды қабылдау кәсіпкерлерге мемлекеттік қолдауды сезінуге мүмкіндік берер еді деген пікірдемін, бұл қалыптасқан қаржылық жағдайды еңсеруге және жұмыс орындарын сақтауға мүмкіндік береді», – дейді уәкіл.

Есжан Ботақара

Фото: topfranchise.ru


Telegram каналымызға жазылыңыз! 

Vote.atameken.kz сайтында 46 000 кәсіпкер дауыс берді

Кәсіпкерлер палаталарының өңірлік кеңестеріндегi орындар үшін бизнес-қоғамдастықтың 1048 өкілі дауысқа түсуде.  

06 Тамыз 2020 21:12 167

Vote.atameken.kz сайтында 46 000 кәсіпкер дауыс берді

Бұл туралы «Атамекен» Ұлттық кәсіпкерлер палатасы басқарма төрағасының бірінші орынбасары – басқарма мүшесі Эльдар Жұмағазиев facebook.com әлеуметтік желісінде жазды.

«Статистикаға сүйенсек, бір орынға орташа 2-3 адам үміткерлік танытуда. Республика бойынша өңірлік кеңестерге барлығы 456 адам іріктеледі. Дауыс беру 5 тамызда басталды. Сайлаудың бірінші күні 25 000-нан астам адам өз дауыстарын берді, бүгінде бұл көрсеткіш 46 000-ға дейін өсті.

Екінші күні Шымкент (7312 дауыс берген), Қарағанды (5169) бизнес-қоғамдастықтарының өкілдері белсенді түрде өз кандидаттарын таңдап, дауыс беру белсенділігі бойынша үздік үштікке Ақтөбе облысы (4389 өз кандидатына дауыс берген) қосылды», – деп жазды Эльдар Жұмағазиев.

Сондай-ақ ол дауыс беру смартфон арқылы қол жетімді әрі екі минуттан артық уақыт алмайтынын ескертті.

«Үміткерлер үшін онлайн режимде vote.atameken.kz сайтында дауыс беруге болады. Әрбір кәсіпкер, қауымдастық немесе өзін-өзі реттейтін ұйым өз аймағында сайлауға қатысып жатқан 1 үміткерге ғана дауыс бере алады.

Мұны СМС немесе ЭЦҚ (ЭЦП) арқылы жасауға болады. СМС тәсілі үшін ұйымның БСН/ЖСН (ИИН/БИН) енгізіп, дауыс берушінің телефон нөмірін көрсету арқылы, содан кейін телефонға келген СМС-кодты енгізу қажет. ЭЦҚ (ЭЦП) дауыс беру тәсілі үшін ұйымның кілтін таңдау жеткілікті», – дейді ол.

 

«Атамекеннің» қауырт жағдайдан шығаратын ұсыныстары сын кезеңде айқын көрінді

Кәсіпкерлікті қорғайтын, қолдайтын Кәсіпкерлер палатасының жұмысы онлайн режимде болса да тоқтамағаны жақсы.  

02 Тамыз 2020 16:29 687

«Атамекеннің» қауырт жағдайдан шығаратын ұсыныстары сын кезеңде айқын көрінді

Қызылордада облыстық Кәсіпкерлер палатасының Өңірлік кеңесіне мүшелікке өтуге 37 үміткер тіркелді. Олардың отызы ер адам болса, қалғаны нәзік жандылар. Айналысатын салалық кәсібіне орай үміткерлердің 8 ауыл шаруашылығымен, 8 құрылыс, 8 сауда, 3 медицина, 2 білім қалғандары жеңіл өнеркәсіп, туризм, қоғамдық тамақтандыру және өзге салаларда жұмыс істейтін кәсіпкерлер.

Үміткерлер жайын Өңірлік іріктеу комиссиясының хатшысы Пірмұхаммед Сыздықов мәлімдеді.

Мүшелікке тіркелген кәсіпкерлер бүгінде үгіт-насихат жұмыстарын жүргізуде. Аталмыш шарадан соң 5-11 тамыз аралығында дауыс беру рәсімі өткізіледі.     

«Дауыс беру шарасы онлайн режимде 5-11 тамыз аралығында www.vote.atameken.kz интернет-порталында жүргізіледі. Облыстық кеңес мүшелерінің 60 пайызы облыс орталығындағы кәсіпкерлерден, 40 пайызы аудандардағы кәсіпкерлік субъектілерінен құралады», – деді іріктеу комиссиясының хатшысы.

Дауыс беруге аймақта тіркелген кәсіпкерлік нысандары мен ұйымдары қатыса алады және бір мекеме бір кандидатқа ғана дауыс бере алады.

«Дауыс беру үшін порталдағы «дауыс беру» бөлігіне өту қажет. Сол жерден Қызылорда облысын көрсетіп, үміткер таңдалады. Кандидаттың аты-жөнін басу арқылы бағдарламасымен танысуға болады. Үміткер үшін дауысты sms немесе электронды цифрлық қолтаңба арқылы беруге болады. SMS арқылы дауыс беру үшін ұйымның БСН, ЖСН нөмірлерін, дауыс берушінің телефон нөмірі көрсетіледі. Содан соң нөмірге келген sms кодты енгізу қажет. ЭЦҚ арқылы дауыс беру үшін ұйымның кілтін таңдау жеткілікті. Дауыс беру смартфон арқылы да қолжетімді», – дейді П.Сыздықов.

Жалпы алғанда, өңірлік кеңес мүшелігіне баратын кәсіпкер, облыстағы ахуалды жіті білуі шарт. Сондай-ақ, кәсіпкерлер мен халық үшін тиімді ұсыныс жасай алатын, өз мүддесін елдік тұрғыдан ойлайтын ұлтжанды азамат болуы құба-құп.

Өңірлік кеңестің сайлауға дейінгі құрамында жұмыс істеген Болат Нұрхожаев, «кәсіпкерлерді кеңес мүшелігіне сайланбалы негізде анықтаудың маңызы зор», дейді.

«Тәуелсіз, еркін қимылдайтын Кәсіпкерлер палатасының жедел шешім қабылдайтын кезеңде, кешегі төтенше жағдай кезінде қандай көмегі болғанын ел біліп, көріп отыр. «Атамекен осы не істеп жатыр?», дегендердің талайы оған көзі жетті. Дегенмен, кәсіпкерлікке әлі де кедергі көп. Бір ғана мысал, облыстағы монополист компания індетке байланысты қабылданған қаулыға сілтеме жасап кәсіпкерлерге техникалық шарт беруді тоқтатуды ұсынған. Алайда қаулыда ол көрсетілмеген, яғни монополистің ол қаулыға сілтеме жасауға негізі жоқ. Оның үстіне тұрғындарға, яғни заңды емес тұлғаларға бұл қызмет көрсетілуі тоқтамаған және өзге төрт монополист мекеме бұл қызмет түрлерін тоқтатқан да жоқ. Бұл, індет жағдайында жұмысы тоқтап тұрған кәсіпкерлерге ең болмаса қажетті құжаттарын реттеп, рәсімдеп алуға кедергі болады. Мәселені Кәсіпкерлер палатасы мен Қызылорда облысы кәсіпкерлік және туризм басқармасының ықпалымен шешімін тапты. Кәсіпкерліктің дамуы осындай кедергілерді дер кезінде шешілуінен болады, – дейді Б.Нұрхожаев.

Бүгінгі індет кезеңіндегі қиындықтардың ауыртпалығы кәсіпкерлерге де тиюде. Алдағы күндері экономикаға, әрбір кәсіпкерге бұдан да қиын күндер келмесіне тағы ешкім кепіл бола алмайды. Сондықтан кәсіпкерлікті қорғайтын, қолдайтын бірден-бір ұйым ретінде Кәсіпкерлер палатасы жұмысы онлайн режимде болса да тоқтамағаны жақсы. «Атамекен» ҰКП-ның жаңашылдығы, қауырт жағдайдан шығаратын ұтымды ұсыныстары сын кезеңде айқын көрінді.

Нұрбек Дәуренбеков