Елдегі 9 мыңнан аса кәсіпкердің биылғы 4 айда тірлігі тұралап, жұмысын тоқтатуға мәжбүр болған. Бизнесін жауып тастаған азаматтар саны былтырмен салыстырғанда 1.6 есеге артыпты. Нақты сандарға тоқталсақ. Ұлттық статистика бюросының мәліметінше, бизнесінен береке кетіп, кәсібін толық тоқтатқандардың 3 мыңы саудамен, 1 мыңы құрылыспен және 523-і өңдеу өнеркәсібімен айналысқандар. Оның ішінде 5 ірі, 12 орта және 9 мыңнан аса шағын бизнес субъектісі бар. Нарықтан кеткендердің ең көбі Алматы, Астана мен Шымкент қалаларында. Сарапшылар компаниялардың жаппай жабылуы уақытша үрдіс екенін айтады және оны жаңа салық кодексімен байланыстырады.
