Бүгінде Қазақстанда бай-бағландар көбейген сыңайлы. Байлардың көбейгені, бір жағынан, жақсы да болар. Өйткені олардың кәсіпорындарында жұмыс орындары болады, жүздеген адам жалақы табады емес пе? Екінші жағынан байлар мемлекетке жүздеген миллиондап салық құяды әрі олар үкімет алдында әлеуметтік міндеттерді атқарады. Яғни тұрғындар үшін қажетті әлеуметтік, мәдени, спорттық нысандар салады, қайырымдылық акцияларын өткізеді дегендей... Сондықтан бай адамдардан ат тонымызды ала қашпағанымыз да жөн болар. Байдың көп болғаны ел үшін де абырой деп жатады. Тіпті бұл сырт елдерге қандай да бір дәрежеде сес болуы да мүмкін.
