Жер жүзінде болып жатқан діни ахуалға қатысты мәселелер бүге-шігесіне дейін АҚШ-тың әлемдегі діни бостандық жөніндегі комиссиясының жіті бақылауында. Комиссия діни бостандықты шектеудің барлық оқиғаларын инеден жіп өткізгендей етіп тізіп, өзінің дәстүрлі баяндамаларында сынға алып отырады. Сондықтан мемлекеттер діни мәселеге қатысты шешім қабылдардың алдында осы комиссияға алаңдайды, сынға ілігіп қаламыз ба деп қылпылдап отырады. Осыдан барып кесімді шешім қабылдауға бата аламай жүретін елдер де болуы мүмкін.
