Inbusiness.kz теңгенің доллар, еуро, юань және рубльға қатысты бағамына арналған кезекті апталық валюта болжамын оқырман назарына ұсынады (25 сәуір -29 сәуір).

18 сәуір -22 сәуірге арналған валюта болжамы

Геосаяси шиеленістер теңге бағамына айтарлықтай әсерін тигізуде. Inbusiness.kz сайтында өз болжамын жариялаған сарапшылар қазақстандық валюта мұнай бағасына тәуелді екенін атап өтті. Ал шикізат құнына  коронавирустық пандемияның жаңа толқыны, Ресейге қарсы санкциялар аясында Еуропадағы табиғи ресурстар бағасының өсуі сияқты факторлар ықпал етуде. Олар өз болжамында ішкі триггерлерді: алдағы салық кезеңін, ҚР Ұлттық Банкінің валюталық интервенция жүргізу туралы шешімін сөз етті.

Сарапшылардың толық пікірін сайт әзірлеген кезекті сауалнамадан оқи аласыздар:

Айдар Калиаскар, Forex Club қаржылық скауты:
Өткен аптада теңгенің негізгі валюталарға қатысты бағамы сәл әлсіреді. Ішкі валюта нарығында өзгеріс болған жоқ. Өйткені Ресей рублі нығайып,  мұнай да салыстырмалы түрде қымбаттады. Дегенмен мұнай белгілеулері Қытайда індеттің өршуі салдарынан сәл төмендеуде. Келесі аптада теңге бағамы нығаюы мүмкін, бірақ динамика бірқалыпты болады. Менің болжамым бойынша, келесі аптада бір доллар 442-444 теңге, бір еуро 475-477 теңге, бір юань 68-68,4 теңге, бір рубль 5,6-5,9 теңге деңгейінде болады. 

Дмитрий Лукашов, аналитик SoftLink:
Өткен аптада теңгенің рубльдан басқа валюталарға қатысты бағамы нығайды. Еуроға Ресейге қарсы санкциялар аясында Еуропадағы табиғи ресурстар бағасының өсуі теріс әсер етіп отыр. Теңгенің нығаюына бірінші тоқсанда мұнай өндірісі көлемінің артуы мен ЖІӨ-нің өсуі сияқты факторлар ықпал етті. Өткен аптада Ұлттық Банк валюталық нарықтағы ауытқуларды шектеу үшін валюталық интервенция жүргізуге дайын екенін мәлімдеді. Реттеуші төрағасының орынбасары Виталий Тутушкин сыртқы инфляциялық жағдай Қазақстан үшін қолайсыз болуы мүмкін екенін атап өтті. Ұлттық экономика министрлігі 2022 жылы инфляция болжамын 8-10% деңгейінде бекітті. Менің болжамым бойынша, алдағы аптада бір доллар 438-455 теңге, бір еуро 473-493 теңге, бір рубль 5,61-6,12 теңге, бір юань 67,6-69,6 теңге болуы мүмкін.

Мұрат Қастаев, "DAMU Capital Management" ЖШС бас директоры:
Ресей мен Украина арасындағы соғыс – әлемдік күн тәртібіндегі басты мәселе. Әскери қақтығыстың қашан аяқталатыны белгісіз, сондықтан активтерге деген жаһандық қызығушылық қысымға ұшырап отыр. Дүниежүзілік банк пен Халықаралық Валюта Қоры әлемдік экономиканың өсу көрсеткішін төмендетті. Бір апта ішінде Brent мұнайының бағасы 113 доллардан 106 долларға дейін төмендеді. Инвесторлар коронавирустық пандемияның жаңа толқыны сұраныстың төмендеуіне әкеліп соғады деген пікірде. АҚШ ФРЖ мөлшерлемені бірден 50 пунктке көтеруі мүмкін екенін мәлімдеді. Бұл АҚШ доллары индексінің өсуіне әкеліп соғуы ықтимал. Қазақстан Ұлттық Банкі 25 сәуірде базалық мөлшерлеме бойынша шешімін жариялайды. Біздің ойымызша, базалық мөлшерлеме қазіргі деңгейде қалуы тиіс, өйткені оны арттыру үшін факторлар жеткіліксіз, базалық мөлшерлеме инфляциядан жоғары болып отыр. Мөлшерлемені төмендетуге де болмайды, өйткені бұл теңгелік активтердің тартымдылығын төмендеді, теңгені әлсіретіп, инфляцияға жаңа серпін береді.