Ақтөбе облысында "Түнгі қаладағы балалар" акциясының тек бірінші күні ғана полиция бөлімшесіне 67 кәмелетке толмаған бала жеткізілді. Оның 59-ы - түнгі сағат 23.00-ден 06.00-ге дейін заңды өкілдерінің еріп жүруінсіз тұрғын үйден тыс жерде жүрген балалар.
Айта кетейік, жедел іс-шара жасөспірімдер арасындағы қылмыстың алдын алу, кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде және тұрғын үйден тыс жерде болу, сондай-ақ, жасөспірімдерге алкогольдік ішімдіктердің, темекі өнімдерін сатудың алдын алу мақсатында облыс бойынша өткізілуде. Ювеналды полиция шара барысында аулалар мен саябақтарды, жастар көп жиналатын және ойын-сауық өтетін жерлерді жіті тексеруде.
Кәмелетке толмаған балаларды тәрбиелеу жөніндегі міндеттерді орындамағаны үшін 11 ата-ана әкімшілік жауапкершілікке тартылды. Жалпы, акция нәтижесінде 21 жасқа толмаған жасөспірімге алкоголь өнімін сатқаны үшін 2, кәмелетке толмағандарға темекі өнімдерін сатқаны үшін 2, сағат 22.00-ден кейін кәмелетке толмағандарды ойын-сауық мекемесіне заңды өкілдерінің еріп жүруінсіз жібергені үшін 3 жеке кәсіпкер жауапқа тартылды. Ішкі істер органдары есебіне 24 жасөспірім мен 13 қолайсыз отбасы алынды.
Құралай Қуатова
