Тартылған айналым қаражатының көлемі бойынша Ақтөбе облысы бірінші орынға шықты, деп хабарлайды Aktobenews.kz тілшісі.
Кез келген екінші деңгейлі банктің ақшалай ресурстары тартылған айналым қаражатынан құралады. Соның басым бөлігі — депозиттер. Ал, депозит дегеніміз — бұл банк уақытша пайдаланып отырған тұрғындардың ақшасы, яғни несиенің қарама-қарсы түрі.
Кеше Ақтөбедегі Ұлттық Банкі филиалында облыстағы депозиттердің мөлшері айтылды.
"Ақтөбе облысы бойынша бірінші жартыжылдықта жеке және заңды тұлғалардан тартылған салымдар көлемі 74,8 пайызға өсіп, 8,076,9 млрд. теңгені құрап отыр. Заңды тұлғалар бойынша 81,4 пайызға көбейген, жеке тұлғалар бойынша 11 пайызға артқан. Тартылған салымдар көлемі бойынша Астана мен Алматы қалаларын есептемегенде, Ақтөбе облысы бірінші орында тұр", — деді Ақтөбедегі Ұлттық Банкі филиалының директоры Перизат Әсембетова.
Оның айтуынша, облыстағы барлық банк есепшотында 581,2 млрд теңге салым жатыр. Депозит көлемі бойынша Ақтөбе облысы екінші орында тұр.
