Қарағанды облысының әкімдігінде аймақ активінің жиналысы өтті, онда мемлекет басшысы Нұрсұлтан Назарбаевтың "Болашаққа бағдар: рухани жаңғыру" мақаласы талқыланды, деп хабарлайды облыс әкімінің баспасөз қызметі.
Айта кетейік, президент қазақ тілін 2025 жылдан бастап латын әліпбиіне көшіруге кірісуіміз керектігін мәлімдеді. Бұл – сол кезден барлық салада латын қарпіне көшуді бастаймыз деген сөз. Яғни 2025 жылға қарай іс қағаздарын, мерзімді баспасөзді, оқулықты, бәрін де латын әліпбиімен басып шығара бастауға тиіспіз.
2017 жылдың соңына дейін қазақ тілін латын әліпбиіне көшірудің нақты кестесін жасау керек. Жаңа әліпбиге бейімделу кезеңінде белгілі бір уақыт кириллица алфавиті де қолданыла тұрады.
Президент жаңа гуманитарлық білім жобасына тоқталды. Бұл үшін қоғамдық және гуманитарлық ғылым жөніндегі әлемдегі ең жақсы 100 оқулық әртүрлі тілден қазақ тіліне аударылады. Нұрсұлтан Назарбаев қазіргі аудармамен айналысатын құрылымдар негізінде мемлекеттік емес Ұлттық аударма бюросын құруды тапсырды. Ол 2017 жылдың жазынан тиісті жұмысқа кіріспек.
Мемлекет басшысы патриоттық жұмысты күшейту үшін "Туған жер" бағдарламасын қолға алуды ұсынды. "Қазақстаның қасиетті рухани құндылықтары" немесе "Қазақстанның киелі жерлерінің географиясы" ұлттық жобасы қолға алынады. Сонымен қатар, "Қазақстандағы 100 жаңа есім" жобасы қазіргі заманның батырларына баса назар аударуға бағытталады.
Отырысқа қатысушылар осы бастамалардың маңыздылығын атап өтті.
"Тәуелсіздік жылдары бәріміз де – "жас республиканың халқы кім? Біз кім?" деп ойландық. Ата-бабалары қуғын-сүргін жылдары Қазақстанға жер аударылған отандастарымыз да – бұл жерде, осы қоғамда болашақ бар ма деп ойланды. Мемлекет басшысының мақаласынан осы сұраққа жауап табуға болады", – дейді Қарағанды облысының әкімі Ерлан Қошанов.
Латын әліпбиіне көшу – Қазақстанның жалпыәлемдік процеске енуін жылдамдатады, дейді өңір басшысы.
"Қазақстанды рухани жаңғыртуда "Қазақстаның қасиетті рухани құндылықтары" жобасы маңызды рөл атқарады. Бұл – Қазақстанның киелі жерлерінің географиясы. Сарыарқада ондай жерлер көп. Мысал ретінде Ұлытауды алуға болады", – дейді Ерлан Қошанов.
Әкім аймақта түсіндіру жұмысын кеңінен жүргізуді тапсырды. Активтердің кездесулері облыстың барлық қалалары мен аудандарында өтеді.
