Аталған ғимараттарда пандустар, белгілер, тактильді жолақтар, санитарлық-тұрмыстық орындар мүлдем қарастырылмаған, деп хабарлайды mgorod.kz.
Орал қаласының еңбек және әлеуметтік бағдарламалар бөлімінің жетекшісі Ерлан Ғалиевтің айтуынша, белгілі бір санатқа жатқызылған мүгедектерге, яғни арбамен жүретін, тірек-қимыл аппаратының кемістігі бар, зағип және көзі көрмейтін мүгедектерге әлеуметтік және көлік инфрақұрылымдарына кіріп-шығуына жағдай жасалуға тиіс.
"Қаладағы 52 ғимаратта мүгедектерге қызмет көрсетуге лайықталмағаны анықталды. Олар бұған қаржының жоқтығын сылтау етеді. Олардың көбісі – банк, сауда үйлері, сұлулық салондары, нотариалдық кеңселер, супермаркеттер. Барлық нысандар келесі жылдың соңына дейін мүгедек жандарға қолжетімді болуға тиіс. Талап орындалмаған жағдайда айыппұл салынатын болады", – деді Ерлан Ғалиев.
Айта кетейік, бүгінгі таңда Орал қаласында 8500 мүгедек өмір сүреді. Олардың 450-і арбаға таңылған. Тағы 1 мыңға жуық көзі нашар көретін мүгедек бар болса, 180 адам – есту мүмкіндігінен айырылғандар.
