Жаңа Әлеуметтік кодекске енгізілген бес жаңалықтың бірі осы. Маңызды құжатта бұдан бөлек жұмыссыздардың жайы, зейнетақы, әлеуметтік төлем мәселесі де тыс қалмады. Бүгінгі Үкімет отырысы осымен түйінделді.
Бүгін Үкіметтің осы жылды түйіндейтін соңғы отырысы өтті. Бірақ кабмин түгел жиналмады. Дүйсенова, Мусин, Өскенбаев пен Тілеубердіден өзгесі жиынға онлайн қатысты. Бәрі қысқа қайырып, басқосу небәрі 40 минут ішінде аяқталды. Үкімет басшысы Смайылов биыл еліміз үшін оңай болмағанын, келесі жылы да жеңіл өтпейтінін айтты.
"Жалпы биылғы жыл еліміз үшін оңай болған жоқ. Қайғылы қаңтар оқиғасынан бастап, әлемдік бірқатар жағдайлар орын алды. Келесі жылы да оңай болмайды. Бірақ біз мақсаттарға қол жеткізуіміз керек", деді ҚР Премьер-министрі Әлихан Смайылов.
Келер жылы оңай болмайды деді Смайылов. Сонда әрең күнелтіп отырған ағайынның жағдайы не болмақ. Үкімет қиын жағдайға тап болғандарды қараусыз қалдырмаймыз деп сендірді. Сөйтіп, бүгінгі отырыста Әлеуметтік кодексті қабылдады. Оның бес жаңалығы бар. Әуелгісін айтайық. Келесі жылы отбасының цифрлық картасы жасалады. Сол арқылы мемлекет кімге, қашан және қандай көмек керек екенін анықтай алады. Осылайша, қолдау автоматты түрде тағайындалады. Ал әлеуемттік төлемдер күнкөріс деңгейіне сай болады.
Екінші жаңалық. Бала күтіміне байланысты төлемдер мерзімі ұзартылады. Көпбалалы аналарға берілетін жәрдемақы мөлшері көбейтіледі және олар "Алтын алқа", "Күміс алқамен" наградталған аналар деген жаңа статуспен қарастырылады.
Үшінші жаңалық. Енді мүгедектігі бар адамға қызмет көрсеткен отбасы мүшесі жалақы алады.
"Бұл ретте отбасы мүшесі жеке көмекші немесе әлеуметтік қызметкер ретінде ресімделеді. Бұл жұмысқа еңбекақы төленеді және әлеуметтік төлемдер мен зейнетақы жарналары аударылады. Осылайша, отбасының еңбек жасындағы жұмыссыз мүшелері қызметке орналасады. Сөйтіп, әлеуметтік тәуекел туындаған жағдайда әлеуметтік қамсыздандыру шараларымен толық қамтылады", деді ҚР Еңбек және халықты әлеуметтік қорғау министрі Тамара Дүйсенова.
Бұдан бөлек, келер жылдан бастап жұмыссыз қалған азаматтарға алты ай бұрынғы табысының 45 пайызы төленеді. Осы кодекс аясында алдағы 5 жылда базалық зейнетақы көбейтіледі. Бес новелланың соңғысы.
Халықты жұмыспен қамтудың жаңа тәсілдері енгізіледі. Тәуелсіз жұмыскер деген ұғым пайда болады. Бұл табысы бар, бірақ ресми тіркелмегендерге қатысты. Күні кеше оқу бітіргендер де жұмыссыз қалмайды. Механизмі дайын. Қысқасы осы өзгерістердің бәрі келер жылдан бастап іске қосылады. Үкіметтің қорытынды жиынындағы басты әрі маңызды жаңалық осы болды.
Арай Сүгірбай
