Шәкен Айманов атындағы "Қазақфильм" киностудиясында орналасқан "Қазақ хандығы" көп сериалы тарихи туындысының түсірілімдері үшін арнайы тұрғызылған "Сығанақ қаласы" декорациясында режиссер Рүстем Әбдіраштың "Алмас қылыш" фильмінің DVD дискісінің тұсаукесері өтті. Қазақ және орыс тілдерінде, сонымен қатар ағылшын тілінде субтитрлары бар бұл дискінің тұсаукесер рәсімін Айманов атындағы "Қазақфильм" киностудиясы, "CentauRus Rustem Abdrashev production" және "Меломан" компаниялары ұйымдастырып отыр. Бұл туралы "Қазақфильм" киностудиясының баспасөз қызметі хабарлады.
Естеріңізге сала кетсек, Қазақ хандығының 550 жылдығына орай түсірілген "Қазақ хандығы" киносериалының кинонұсқасы – "Алмас қылыш" фильмі Мәдениет және спорт министрлігінің тапсырысы бойынша Ш.Айманов атындағы "Қазақфильм" АҚ және "CentauRus Rustem Abdrashev production" ЖШС-нің қатысуымен жарыққа шыққан. Бұл ауқымды жобаның идея авторы – Қазақстан Президенті Н.Ә.Назарбаев. Фильмнің сценарийі Ілияс Есенберлиннің "Алмас қылыш" романының негізінде жазылған. Алдағы уақытта "Алмас қылыш" фильмінің тұсаукесері Қазақстан Республикасы Тәуелсіздігінің 25 жылдығына арнайы Астана және Алматы қалаларында өткен болатын. 2017 жылы 5 қаңтарда жалпыұлттық прокатқа шыққан аталмыш толықметражды көркем фильм, қазақстандық прокатта 72 миллион теңгеден астам қаржы жинап, көшбасшылар қатарынан көрінді. Жалпы алғанда 2,5 мыңнан астам сеанс, оның 60 пайызы қазақ тілінде, ал 40 пайызы орыс тілінде көрсетілді. Ал он сериалы "Қазақ хандығы" тарихи кинотуынды наурыз айында "31 арнадан" көрсетілген болатын.
