Шетелдік сарапшылар "Сұңқар" халықаралық трамплин кешенін әлемдегі үздік бестікке енгізді. Бұл жайында спорт нысанының басшысы Руслан Қаңтарбаев мәлімдеді.
- Жалпы спорттық кешені барлық халықаралық талаптарға сай жабдықталған. Яғни, К-125 және К-95 трамплиндерінде кез келген деңгейдегi iрi жарыстарды ұйымдастыруға болады. Сондай-ақ, 2013 жылдың мамыр айында ашылған 60, 40, 20 метрлік тұғырлар спортшыларымыздың жаттығу жұмыстарын жүргізулеріне де, болашақ чемпиондарымызды тәрбиелеуге де өте ыңғайлы. Біздің трамплиндер кешенінің аса мақтан тұта алатыны – бұл асқан заманауи медиа-орталық. Біздің спорттық шараларды on-line режимде әлемнің кез-келген нүктесінен көре алуға мүмкіндік бар, - дейді нысан басшысы.
2011 жылы трамплиндер кешенiнiң ашылу құрметiне құрлықаралық кубок додасы өткiзiлдi. Елiмiзде өткен қысқы Азия ойындарының қарсаңында салынған бұл кешенде, осы күнге дейін әлемдiк деңгейдегi iрi бес жарыс өткiзiлді. Ал кешендегi байрақты бәсекелерді шамамен 5500 адам тамашалай алады. Сондай-ақ, бүгінде жас "қанатты шаңғышыларымызға" барлық жағдай жасалған.
- Біздің кешен барлығына ашық. Кешен маңында үш мейрамхана, фитнес залы жұмыс істеуде. Адамдар келіп, спортпен шұғылдана алады. Айта кетсек, трамплиннен секіруден Қазақстан құрамасы мен балалар мен жасөспірімдер мектебінің оқушылары бізде тегін жаттығады.
