/img/tv1.svg
RU KZ
DOW J 22 332,03 FTSE 100 5 676,92
РТС 1 006,70 Hang Seng 23 497,47
KASE 2 224,17 Алтын 1 626,50
Автокөліктерге электронды төлқұжат қашан беріледі?

Автокөліктерге электронды төлқұжат қашан беріледі?

Бұл мәселенің шешілмей келе жатқанына бірнеше жыл болды.

24 Шілде 2019 15:26 10167

Автокөліктерге электронды төлқұжат қашан беріледі?

Автор:

Абылай Бейбарыс

Еуразиялық экономикалық одаққа (ЕАЭО) мүше мемлекеттердің көлік құралдарына 2019 жылдың бірінші шілдесінде берілуге тиіс болған электронды төлқұжат тағы да берілмей қалды. Аталмыш құжатты рәсімдеу шарасы қараша айына шегерілді.

2014 жылы бастама ретінде көтерілген жоба 2017 жылдың 1 шілдесінде жүзеге асырылуы керек еді. Алайда ЕАЭО құрамындағы кейбір елдердің жаңашылдыққа дайын болмауының салдарынан 2018 жылға ауыстырылды. Жолы болмаған жоба жылжып отырып 2019 жылдың жазына жетті. Кейін күзіне сырғыды.

Айта кетейік, электронды төлқұжат Қазақстан, Ресей, Белорусь, Қырғызстан және Армения мемлекеттерінің көлік құралдарына ортақ талап енгізуді көздейді.

Қазақстан үкіметі электронды төлқұжатқа қатысты қаулыны 2019 жылдың 3- шілдесінде бекітті. Алдағы уақытта әрбір қазақстандық автокөлігіне электронды төлқұжат алуға міндеттеледі.

Электронды төлқұжат деген не?

Бұл – автокөліктің «туу туралы куәлігі». Мұнда «темір тұлпардың»  зауыттан шыққаны, бұзылғаны, жол-көлік оқиғасына қатысы бар не жоқ екені тіркеліп отырады. Сонымен қатар төлқұжатқа ЕАЭО аумағына енген жылы, салмағы, қозғалтқышының көлемі, техникалық байқаудан өткені туралы мәлімет тізіледі. Автокөліктің техникалық сипаттамасы жинақталған электронды төлұжаттағы барлық ақпарат ЕАЭО-ның  бірыңғай базасында сақталады. Ал автокөліктің туу туралы куәлігіндегі мәліметтердің шынайылығы уәкілетті органдардың деректер базасы арқылы расталады.

Техникалық төлқұжатпен шатастырмау керек

Көлік құралының электронды төлқұжаты мен көлік құралын мемлекеттік тіркеу куәлігі бір құжат емес. Сондықтан екеуін бір-бірімен шатастырмау керек.

Көлік құралын мемлекеттік тіркеу куәлігі автокөлікке жол қозғалысына қатысу құқығын береді. Заңға сәйкес көлік құралының мемлекеттік тіркеу куәлігі жоқ азаматтарға автокөлік басқаруға тыйым салынған.

Электронды төлқұжат автокөліктің техникалық сипаттамасын көрсететін құжат болғандықтан, көлік құралын тіркеу туралы куәлікті алмастырмайды. Себебі ол көлік құралының ілеспе құжаты ғана болып табылады.

Электронды төлқұжаттың құны қанша?

Бұдан бұрын электронды төлқұжат рәсімдеу үшін 4 500 теңге, ал төлқұжатқа енгізілген әр өзгеріске 3 300 теңге төлеу қажет деген сөз шыққан болатын. Соңғы рет үкімет бекіткен ережеде бұл туралы: «Электронды төлқұжат рәсімдеудің тарифін ұлттық оператор белгілеп бекітеді», – деп жазылды.

Электронды төлқұжат не үшін қажет?

Еуразиялық экономикалық комиссияның техникалық реттеу және аккредиттеу департаментінің директоры Арман Шаққалиевтің түсіндіруінше, электронды төлқұжат одаққа мүше елдердің құжат айналымын жеделдетіп, бизнестегі операциялық жұмыстарды оңтайландырады. Барлық ақпарат серверлерде электронды түрде  сақталатындықтан жол полициясының автокөлікті тексеру кезіндегі жұмысын жеңілдетеді.

Абылай Бейбарыс

inbusiness.kz-ті қараңыз, оқыңыз :

ЕАЭО автокөліктерін тіркеу науқаны басталады

Одақ елдерінен келген көліктерге сары нөмір беріледі.  

27 Қаңтар 2020 21:48 2508

ЕАЭО автокөліктерін тіркеу науқаны басталады

ҚР Ішкі істер министрінің бірінші орынбасары Марат Қожаев ЕАЭО елдерінен Қазақстанға әкелінген автокөліктерді уақытша тіркеу және тұрақты есепке қоюдың жолдарын айтты.

«Мемлекет басшысы ЕАЭО елдерінен Қазақстанға әкелінген автокөліктерді 2021 жылдың 1 науырызына дейін кедендік баж бен тіркеу салығын төлеуді кейінге қалдыру арқылы тіркеу керектігі туралы Үкіметке тапсырма берген еді. Бұл бір реттік науқан. Науқанға тек ЕАЭО аумағында жеке қолдану мақсатында алынған авоткөліктер қатыса алады. Мысалы, Қазақстан азаматының атында әкелінген көліктің техникалық паспорты болса, алым-салықтарын төлеп, 2021 жылдың 1 наурызына дейін тіркей алады. Егер Ресей көлігінің сатып алу-сату келісімшарты болса, Ресейге барып, тіркеуден шығарып әкелуге болады», – деді ол.

Марат Қожаев ЕАЭО елдерінен келген көліктері тіркеу кезінде оларға сары түсті нөмір берілетінін айтты. Көліктің аймағы белгіленетін жерде 18 саны жазылған.

«Бұндай автокөліктерді тіркеу үшін  мамандандырылған халыққа қызмет көрсету орталығына келіп мына құжаттарды ұсыну керек: жеке басын куәландыратын құжаты, көліктің нөмірі немесе транзиттік белгісі, көлік құралының куәлігі, автокөлік иесін растайтын құжат және алғашқы тіркеуге, нөмір алуға және техникалық паспорт үшін төлем жасағанын дәлелдейтін түбіртектер. Тіркеу шарттары қарапайым. Кедендік баж, тіркеу алымын төлеу мерзімін созып, бір жыл ішінде төлеуге болады. Бұл көліктерге арнайы мемлекеттік номерлік серия беріледі, ал техникалық паспортында көліктің тіркелуі жайлы арнайы белгі қойылады», – деп үлгі ретінде жасалған сары түсті нөмірлік белгі мен техникалық паспортты көрсетті.

Ішкі істер министрінің бірінші орынбасары Еуразиялық одақ елдерінен келген көліктерді тіркеудің қажеттілігіне ерекше тоқталып өтті.

«Бұл көліктерді ҚР ІІМ деректер базасына енгізу, елімізде тұрақты түрде жүретін көліктер санын білу үшін керек. Ол сандарды атқарушы билік органдары мысалы, елімізге қажетті жанар-жағар май мөлшері мен көліктерден атмосфераға шығатын экологиялық шығарылуды есептегенде білуі керек. Сондай-ақ, жолдар мен автотұрақтар салуды жоспарлау кезінде де жолдарға түсетін шынайы жүктемені анықтау үшін қажет. Автокөліктерді тіркеу, осындай көлік иелерінің жол ережелерін бұзуынан сақтайды. Әрі тіркелген көліктер жыл сайын міндетті техникалық байқаудан өтеді. Бұл көліктің техникалық жағдайының қауіпсіздік талаптарына сай болуын бақылап отыруға мүмкіндік береді», – деді ол.

Марат Қожаевтің айтуынша, рөлі оң жағындағы көліктер тіркелмейді.

«Бізге келіп жатқан көліктердің көбі жол-көлік оқиғасынан кейін, апаттық жағдайдан қайта қалпына келтірілген. Көптеген көліктің оң жағындағы рөлі сол жағына ресми емес түрде ауыстырылған. 2008 жылдан бері рөлі оң жақтағы көліктер техникалық регламентке сай емес. Ондай көліктерді пайдалануға болмайды. Техникалық регламентке сай емес көлікпен жүру, жолаушылар мен айналасындағы жол қозғалысына қатысушылардың өміріне қауіпті», – деді ІІМ өкілі.

Нұржан Көшкін

Қазақстандықтар көлік сатып алуға 1 млрд доллар жұмсады

Жеңілдетілген автонесие бағдарламасы арқылы 2 441 автокөлік сатылды. 

19 Қыркүйек 2019 10:57 10198

Қазақстандықтар көлік сатып алуға 1 млрд доллар жұмсады

Соңғы 8 айда 197,9 млрд теңгеге 28 611 автокөлік құрастырылды. Өндіріс көлемі өткен жылдың сәйкес кезеңімен салыстырғанда 46,9% -ға артты.

Жеңіл көлік өндірісі 40,5%-ға ұлғайып, 25 586 бірлікке жетті. Отандық автоөндірушілердің конвейерінен 780 автобус, 1 658 жүк көлігі және 540 тіркеме шықты.

Есептік кезеңде ел азаматтары ресми дилерлерге 396,5 млрд теңге санап беріп, 43 289 жеңіл автокөлік сатып алды. Сатып алу көрсеткіші бір жыл бұрынғыдан 19,5%-ға артық болды.

Нарықтың 56,7%-ы отандық, 43,3% -ы шетелдік автокөліктердің еншісіне тиді. Сәйкесінше қазақстандықтар 24 565 отандық, 18 724 шетелдік автокөлік сатып алды.

Сұранысқа ие көліктердің көшін Lada бастады. Ел аумағында дәл осы марканың 10 135 өнімі өтті. Toyota  9 320 көлік құралымен екінші орынға орналасса, Hyundai 8 663 автокөлік сатып, үштікке енді. KIA 2 170 автокөлікті иесіне табыстап, төртінші орынға табан тіреді. 1 551 көлік құралын өткізген Renault бесінші болды.

Бұдан кейінгі орындарды GAZ, Nissan, UAZ, Volkswagen, Ravon маркалары өзара бөлісті.

Соңғы 8 айда «БИПЭК АВТО - АЗИЯ АВТО» холдингі нарықтың 32,5%-ын автокөлікпен қамтамасыз етті. Astana Motors компаниясы автонарықтың 24,4%-ын иеленді. Қалған орындарға «Вираж», «Toyota City Алматы», «Тойота Центр Жетісу», «Автомир», Mercur Auto, Allur Auto, Aster Auto, «Тойота Центр Шымкент» сынды авторетейлдер орналасты.

«ҚазАвтоӨнеркәсіп» Қазақтан автокөлік саласы кәсіпорындары одағы стратегиялық жоспарлау бөлімінің директоры Артур Мискарянның мәлімдеуінше, есептік кезеңде алматылықтар 11 429, елордалықтар 8 454, шымкенттіктер 3 174, атыраулықтар 2 894, қарағандылықтар 2 617, қостанайлықтар 2 562, оралдықтар 1 879, өскемендіктер 1 839, ақтаулықтар 1 660, павлодарлықтар 1 524 автөкөлік сатып алған.

«Ел азаматтары қаңтар-тамыз аралығында  көлік сатып алуға 1 млрд доллардан астам ақша жұмсады. Бұл – өте жоғары көрсеткіш», – деді стратегиялық жоспарлау бөлімінің директоры.

Оның айтуынша, есептік кезеңде жеңілдетілген несие бағдарламасымен 2 441 автокөлік сатылған.

«Алдағы уақытта Қазақстанда құрастырылған автокөлікке деген сұраныс артады деп ойлаймыз Себебі автоәуесқойлардың барлығы автокөлік алу үшін жеңілдетілген несие рәсімдеп жатыр», – деп түйді ойын «ҚазАвтоӨнеркәсіп» өкілі.

Абылай Бейбарыс

inbusiness.kz-ті қараңыз, оқыңыз :

Жаңалықтарға жазылу: