/img/tv1.svg
RU KZ
Банктер клиент емес, тиімді технология үшін күресіп жатыр

Банктер клиент емес, тиімді технология үшін күресіп жатыр

Қаржылық технологияның соңғы мүмкіндігіне қол жеткізген банкті клиент өзі іздеп табады.

09:00 14 Сәуір 2018 12796

Банктер клиент емес, тиімді технология үшін күресіп жатыр

Автор:

Гүлбаршын Сабаева

Әлемдік қаржы технологиясының инновациялық тұрғыдан жаңғыруы ғарыштық жылдамдықпен жүріп жатыр. Бүгінгі таңда барлық банктер цифрлық жүйеге көшіп үлгерген. Олар тұтынушыларына дәстүрлі қызмет көрсетумен қатар онлайн-қызмет ұсынуда. Бұл туралы Алматыда өткен халықаралық жиында Қазақстан интернет-бизнес қауымдастығының басшысы Константин Горажанкин айтты.

Спикердің сөзінше, Қазақстан банктерінің электронды сауда нарығындағы мүмкіндігі жоғары. Себебі үкімет нарықтың дәл осы сегментін дамытуға мүдделі болып отыр.

Қауымдастық басшысы «e-commerce» нарығында «Kaspi  bank» тыңға түрен салып отырғанын тілге тиек етіп: «2017 жылдың соңында «Кибержұма» күнін ұйымдастырған банк «Kaspi Red» жобасы арқылы құны 20 млрд теңгені құрайтын 250 мың дана тауарды пайызсыз несиеге берді. Бұл басқа банктердің «е-commerce» нарығымен интеграциялануына түрткі болды. Көштен қалмас үшін «Қазком» «Homeshop» электронды сауда желісін іске қосты», – деді

Cөз арасында ол бүгінгі таңда банктер арасындағы күрес клиент емес, тиімді технология үшін жүріп жатқанын айтты. Бұл пікірді ресейлік  «Intervale Russia» қаржылық технология компаниясының  өкілі Виталий Щидковский қостады.  

«Рас, банктер технологиялық көшбасшылыққа ұмтылуда. Себебі қаржылық технологияның соңғы мүмкіндігіне қол жеткізген банкті клиент өзі іздеп табады» – деді ол.

Виталий Щидковский  2013 жылдан бері электронды коммерция нарығы 2 есе өскеніне назар аударып, трансшекаралық  электронды сауда 37%-ға ұлғайғанын жеткізді. Оның ойынша, бұған банктер мен қаржылық технология саласындағы  компаниялардың ауызбіршілігі себеп болған.

«Джек Ма апта аяғында Ресейдегі электронды  коммерция нарығы кішкентай екенін айтып, оны қорғансыз балаға теңеді. Бірақ ол «қорғансыз баланы» Ресейдің барлық банктері қанатының астына алу үшін кезекке тұрғанын естен шығарып алды. Бүгінде Ресейде 200 ден астам банк бар. Олардың бөлімшелері Орталық Азия елдерінің түкпір-түкпірінде жұмыс істеп тұр. Біз Қырғызстанда электронды сауда нарығы нөлдік деңгейде екенін әріптестерімізден білдік. Керек десеңіз, Алматы мен Бішкек арасында мобильді байланыс та нашар екен. Осыған байланысты біз Қырғызстанның электронды сауда сегментін жаулау жайлы ойлана бастадық», – деді Ресей азаматы.

Басқосу барысында «Альфабанк» өкілдері Астана мен Алматы нарығынан «OpenAPI» мен «Маркетплейс»жобасын  ашуға ниеттеніп отырғандарын баяндады.

«Біз Ұлттық банк пен қаржы институттары арасындағы кездесуді күтіп отырмыз. Қаржы реттеушісі жоғарыдағы технологияларға қатысты ойын ережесін заңдастыру мәселесін кешіктірмейтін шығар деп үміттенеміз», – деді «Альфабанк»  өкілі Светлана Хочиева.  

Қазақстанда  интернет-дүкендердің дамуына логистика мәселесі, жердің шалғайлығы қол­бай­­лау болады екен. Осыған қатысты Конс­тан­тин Горожанкин: «Жыл сайын интернет арқылы ұйымдастырылатын «Кибержұма» күнінде са­тып алушылардың 55%-ын алматылықтар құрайды. Астаналықтар -17, қа­­­­­рағандылықтар -11, шымкенттіктер - 7, 9%-дан аспайды. Бұл көрсеткішті бірнеше есе өсіруге болады», – деді Константин  Горожанкин.

Ол АҚШ-тың Ресейге салып отырған санкциясы Қазақстанға да салқынын  тигізіп  отырғанын айтты.

«Электронды сауда нарығына санкциялардың әсері бар. Сондықтан дипломаттар мен саясаткерлер мәмілеге келсе екен деп тілейміз. Ресей рублі мен теңге бағамындағы  өзгерісті қазақстандықтар «мини девальвация» деп бағалап жатыр. Соңғы күндері тұтынушылардың  белсенділігі төмендеп кетті. Біз әліптің артын бағып отырмыз», – деп қорытты сөзін Конс­тан­тин Горожанкин.

Гүлбаршын Сабаева

Жыл сайын жер бетінде 8 млн балаға іздеу салынады

08 Қазан 2019 11:37 18206

Astana Hub бала қауіпсіздігіне арналған ақылды технологияларды таныстырды. 

Astana Hub технопаркі мен Zerde холдингі балаларға арналған әлеуметтік инновациялар зертханасын ашты. ЮНИСЕФ ұйымының қолдауымен жүзеге асып жатқан жоба қазақстандық балалардың қауіпсіздігін қамтамасыз етіп, тұлғалық жетілуіне арналған ақпараттық технологияларды дамытуға жұмыс істейтін болады. Зертхананың ашылуында отандық инноваторлар ойлап тапқан түрлі қосымшалар мен ақылды технологиялар таныстырылды.

ЮНИСЕФ-тің Қазақстандағы өкілі Артур ван Дизен барлық стартап-жобаның басын бір жерге тоғыстырған зертхана құру өте оңтайлы деген ой айтты.

«Заман, қоғам, уақыт талабы өте құбылмалы болып кетті. Цифрлық технологиялардың сан алуандығы балалардың алдына күн сайын сан түрлі тәуекелдерді шығаруда. Astana Hub базасында құрылған зертхананың бұл тұрғыда артықшылығы көп. Осы зертханада бала қауіпсіздігі мен дамуына жауапты мемлекеттік органдардың, жастар мен  жеке сектордың, инновациялық шешім ұсынушы авторлардың басы қосылады. Кілтін таба білсе, бұл орталық арқылы бала өмірін жақсартатын өміршең жобаларды қоғамға сәтті енгізуге болады», – дейді ЮНИСЕФ өкілі.

Шара барысында балалардың анонимді шағымын қабылдауға арналған Garson сервистік қосымшаcы таныстырылды. Мектеп қабырғасында немесе өз үйінде зәбір көрген бала өз проблемасын құзырлы органдарға анонимді түрде жылдам жеткізу үшін аталмыш қосымшаның QR- кодын смартфонға жүктесе болғаны.

«QR- кодты смартфон камерасымен беттестіру арқылы сілтемеге өтеді. Сол жерде бала өзінің орналасқан жерін немесе проблемаға ұшыраған орнын, қандай қиындыққа тап болғанын анонимді түрде жазып қалдырады. Ол хабар бала қауіпсіздігіне жауапты органдар мен ұйымдардың назарына алынады. Бұл кодтарды әуелі мектеп  дәліздеріне  орнату ұсынылған. Бірақ баланың әрекеті сырт көзден таса болуы үшін біз оны оқулықтар мен күнделіктерге орнатуды жөн деп таптық. Қазір балаларға қарсы жасалатын зәбір мен зорлықтың нақты статистикасы жоқ. ЮНИСЕФ-тің дерегі бойынша, Қазақстанда 40 мектептің 402 оқушысынан сауалнама алынған екен. Соның 33%-і мектепте психологиялық қысымға ұшырап, замандастарынан зәбір көргенін айтса, 36%-і қорлауға тап болғандарын мойындаған. Осындай іштен тынып жүрген балаларға бұл қосымша үлкен көмек болады. Проблеманың бетімен қалқымай, үңгіп зерттеуге де бұл жобаның септігі тиеді», – дейді жоба авторы.

Түздегі баланың әрекетін үйде отырып бақылауға арналған Kid security мобильді қосымшаcына да қызығушылық танытқандар көп болды. 

«Баланың әр басқан қадамын аңдып, өз смартфонын қай мақсатта пайдаланып жүргенін бақылайтын қосымшалар онсыз да көп. Оның көбі ата-анаға ауадай қажет болғанымен, бала үшін тартымсыз. Сондықтан балалар ондай қосымшаларды гаджетінен жиі өшіріп жатады. Ал біздің қосымша баланы ынталандыруға бағытталған. Бала күнделік іспетті айдарға әрбір жағымды әрекетін тіркеп отырады. Сол арқылы ұпай жинап, «электронды ақша» табады. Ол ақшаны ата-анасы кейін сыйлықпен алмастырады. Бұл қосымша баланың мектепке қашан жеткенін, үйге қашан келгенін өз бетімен хабарлап отырады», – дейді инноватор. 
Шара кезінде жүкті аналардың іштегі нәрестені «тәрбиелеуіне» арналған мобильді жүктеме мен науқас балалардың  дәріні уақытында ішуін қадағалайтын ақылды технологиясда көпшілік назарына ұсынылды.

Есімжан Нақтыбайұлы

Балалар қазірден бастап IT тілін меңгере бастауы керек

06 Тамыз 2019 17:41 18867

Білім алатын орта баланың ақпаратты қалай қабылдайтынына тікелей әсер етеді.

Қазіргі таңда алдыңғы қатардағы елдердің оқу жүйесі біртіндеп өзгеріп келеді. Өйткені заман талабына сай жаңа жұмыс түрлері пайда болып жатыр. Сәйкесінше технологияға негізделген оқыту нормаға айналып, енді балалар оқу мен жазудан бұрын IT тілін, яғни кодтауды меңгере бастамақ.

CNN дерегіне сүйенсек, әлемде технология саласы бойынша білім беруді қаржыландыру кеңінен жүргізіліп келеді. 2025 жылға қарай бұл сома 341 млрд долларды құрамақ.

«Біз кішкентай балаларға болашақта кім болғың келеді және қандай салада жұмыс істегің келеді деген сұрақтар қоямыз. Әрине, олар өскенге дейін кей мамандықтар жойылып, жаңа жұмыс түрлері пайда болатыны сөзсіз», - дейді жұмыс стратегі Хизер МакГован. Макгован адамдар мен компанияларды Төртінші Өнеркәсіптік төңкеріске дайындайтын маман.

 Дүниежүізілік Экономикалық Форумда жарияланған баяндамаға сүйенсек, 2017 жылы мектеп табалдырығын аттаған балалардың 65 пайызы қазір мүлдем жоқ мамандықтардың иесі атанады және оларға берілетін білім келешекте пайдасыз болып қалуы мүмкін.

Сондықтан білім беру жүйесі қазірден бастап өзгерістерге бейімделе бастауы тиіс. МакГованның ойынша, құр ақпарат беруден гөрі, балаларға өзі үшін білім алу қабілетін игерту керек. 

«Келешектегі негізгі білім – ол сіздің білім алу қабілетіңізді дамытып, өзгерістерге тез бейімделе алуыңыз. Олай етпеген жағдайда бірнеше жылдан кейін мансабыңыздағы өсім тоқтап қалуы мүмкін»,-дейді ол.

Компьютер тілі өте маңызды

Білім берудің жаңа дәуірі жаңа әдістерді талап етеді. АҚШ-та Cubetto деп аталатын ағаш роботтың көмегімен 3 жасар балаларға компьютер тілін, яғни кодтау үйретілуде.

Осы ойыншықты шығарған компанияның басшысы Филиппо Якобтың айтуынша, кодтау тілін барлық салада қолдануға болады. Бұл дағды логикалық тұрғыда ойлауға үйретеді. Осылайша компания балаларды болашақта пайда болатын жұмыстарға ақырындап әзірлеуде.

Білім алатын орта қандай болу керек?

Технологияның тек ағартуда ғана емес, білім алатын ортаны жетілдіруде көмегі зор. Өйткені баланы қоршаған  орта оның ақпаратты қалай қабылдайтынына тікелей әсер етеді.

Velux және Leapcraft деп аталатын даниялық компаниялар сабақ өтетін жерге сенсорлы құрылғы орнатуды көздеп отыр. Сенсорлы ақ қорап сыныптағы шу деңгейін, ауа температурасын және көмір қышқыл газының қандай мөлшерде екенін тіркеп отырады. Ал деректер өз кезегінде смартфондағы арнайы қосымшаға жіберіліп, оқытушы мен мекеме басшысы сыныптағы жағдайдан хабардар болып тиісті шаралар қабылдайды.

Солфорд Университеті зерттеушілерінің дерегі көрсеткендей, ауа температурасы, табиғи жарық мөлшері пен ауаның сапасы сияқты физикалық факторлар бастауыш сынып оқушыларының үлгерімін бір жыл ішінде16 пайызға арттырған.

Зерттеуді жүргізген профессор Питер Барретт былай дейді: «Қауіп мынада: егер сіз мұндай нәрселерге салғырт қарасыңыз, балалардың оқуға деген ынтасы түсіп, оқу үлгерімі төмендетеп кетуі бек мүмкін».

Табиғат Нұрболат