/img/tv1.svg
RU KZ
«Қайсар» Еуропа лигасына жолдама алды

«Қайсар» Еуропа лигасына жолдама алды

«Атырау» – «Қайсар» арасында Қазақстан кубогының тарихындағы ерекше финал болды.  

19:42 07 Қазан 2019 2129

«Қайсар» Еуропа лигасына жолдама алды

Автор:

Ермұхамед Мәулен

Бұл жолы ақтық сынға «Астана» да емес, «Қайрат» та емес «Атырау» мен «Қайсар» шығып еді. Аталған екі команданың ойыны сүреңсіз, бір ғана голмен аяқталады деп болжам айтылған еді. Алайда болжамдар бордай тозып, кездесу қиян-кескі шытырман сценариймен өрбіді. Нәтижесінде жеңіске «Қайсар» жетіп, Қызылорда қаласы келесі жылы Еуропа лигасын қабылдайтын болды.

Қазақстан кубогының шешуші матчы «Астана Арена» стадионында өтті. Қазақстан кубогының финалына үшінші рет шығып отырған «Атырау» мен «Қайсар» кездесті. Осыған дейінгі екі финалда «Қайратқа» жеңілген «Атырау» ер кезегі үшке дейін деп, белді бекем буды. Қызылордалық команда болса, араға 20 жыл салып финалға қайта шығып отыр.

Ойын басында ойыншылар тәртіпті көбірек бұзып, бір-бірін аямай ойнады. Тек аракідік «Қайсардың» шабуылдары болмаса, «Атырау» аса қатты белсене қоймады. «Атырау» қақпашысы Антун Маркович келген қауіптің барлығын қайтарып отырды. Әрбір минут өткен сайын, матчтың да қарқыны арта берді. Екінші таймда «Атырау» қарымта шабуылдарға көшіп, өткір соққылармен жауап қатты. Сондай сәттің бірінде польшалық шабуылшы Петр Гжелчак жоқ жерден гол салды. Жығылғанға жұдырық болғандай, «Қайсар» капитаны Асхат Тағыберген қызбалыққа салынып, қызыл қағаз алды.

«Қызыл қағаз алғаным үшін жанкүйерлерден кешірім сұраймын. Дегенмен әріптесітерімнің бұл ойынды ұтатынына сенімді болдым», – дейді «Қайсар» капитаны Асхат Тағыберген.

10 адаммен қалған қызылордалық команда матчтың соңғы секундтарында барын салып, шабуылға шықты. Алаңға алмасып енген Игорь Зенькович бірден алдыңғы шепте ойқастай бастады. Думан Нәрзілдаевтың берген пасынан кейін Зенькович бар күшімен соққы жасап, таразы басын теңестіріп кетті.

«Клуб бұл кубокты 20 жыл күтіпті. Алаңға алмасып кіріп гол соққан деген керемет сезім ғой. Біз ең бастысы қарсыластан еш қорықпадық. Бір футболшыға кем болсақ та, гол соғуға болатынын біліп жүрдік. Қазіргі сезімімді сөзбен жеткізу қиын. Финалда соңғы секундта гол салу деген футболда көп кездесе бермейді. Жеңіске жеткенімізге ризамыз», – дейді «Қайсар» шабуылшысы Игорь Зенькович

Төреші алты минут уақыт қосты. Қызылордалықтар осы уақыттың ішін де тағы бір гол салып кете жаздады. Бірақ сәтті болмады. «Атырау» сапындағы Жак Нгвем де қызыл қағаз алып алаңнан қуылды да, футболшылардың саны теңесті. Ойыншылар ұзақ уақыт қысымда жүргендіктен бе, шаршаңқылық танытып, алаңның әрбір бұрышында құлай берді. Көбісінің аяқтары тартылып, сіңірлері созылды. Дегенмен осы ойыншылардың ішінде шаршау дегенді білмейтін, шыдамдылары ғана мықты ойнады. Соның бірі –қызылордалық Думан Нәрзілдаев. 25 метр жерден допты шиіріп тұрып, тоғыздыққа тоғытқан ол Қызылорда жұртшылығының матанышына айналды.

«Мен командамен келісімшартқа қол қойған кезде енді Қызылорда Еуропалық рухты сезінеді деп айтқан болатынмын. Ал енді Еуропа Қызылорданың рухын сезінетін болады. Керемет атмосфера, керемет қолдау. Жанкүйерлер мен өзіміздің отбасыларымыз үшін тер төктік», – дейді «Қайсар» ойыншысы Тигран Барсегян.

Қазақстан кубогын арнайы қонақ Әли Тұрғанбеков табыстады. Енді қызылорданың «Қайсары» келер жылы Еуропа лигасында өнер көрсететін болады.

Ермұхамед Мәулен

Атыраудың «Ақжайық» резерватында тағы өрт шықты

Ол арада бірнеше күн өтсе де әлі өшірілген жоқ.  

05 Қыркүйек 2020 15:34 1025

Атырауда ерекше қорғалатын «Ақжайық» мемлекеттік табиғи резерватында 3 қыркүйек күні жанған өрт әлі өшіріліп жатыр. Қазіргі күні  131 өрттің пайда болу ошағы анықталған.

Өкінішке қарай, қорықта жаз басталғаннан күз ортасына дейін бірнеше рет өрт оқиғасының орын алатыны үйреншікті жайға арналған, ол қалаға жақын орналасқандықтан бықсыған қамыс түтіні жел тұрса Атырауға жетіп, аузы-мұрныңды удай ашытатыны бар. Осындай ахуалға қарамастан әлі күнге облыс резерват тоғайына тереңдеп барып, тілсіз жауды ауыздықтайтын техникамен қамтылмаған.

Бұл жолы облыстық төтенше жағдайлар департаменті жергілікті басылымдарға «өрттің жайылу аумағын артық етіп көрсетті» деген реніш білдірді. Яғни, БАҚ «өрттің ауданын бағалау үшін әртүрлі әдістер қолданылатынын ескермепті».

 «Қазақстан Ғарыш Сапары» ҰК АҚ ғарыштық мониторингтің көмегімен жасалған кескіндерді қолдана отырып, жану аймағы туралы жалпы мәліметтерді біріктіреді, онда бұрын өртеніп кеткен жерлер де есепке алынады. Сондай-ақ, қамыстың жануы сулы-батпақты жерде немесе өту үшін қол жетімді жол жоқ жерде орын алғандықтан, әуе барлауы кезінде арнайы өрт сөндіру техникасы өртті сөндіру үшін өрт оқиғасы орнына тікелей жете алмайтындығы анықталғанын ескеру керек. Сондықтан мұндай жағдайда жер үсті көліктерін пайдалану мүмкін болмады. Алайда бұл жағдайға қарамастан, 3 қыркүйек күні сағат 10:15-тен бастап Атырау облысы төтенше жағдайлар департаментінің күштері мен құралдары оқиға орнына жаяу барып өртті өшіру жұмыстарын жүргізді. Каспий теңізінің жағалауындағы қамыстың шөгінділері біркелкі емес құрылымға ие, әрине, қамыс өспейтін шағын учаскелер де бар, бірақ негізінен бұл аймақтағы қамыстың биіктігі үш метрге жетеді. 3 қыркүйекте жалынның таралуына ықпал еткен қатты желді де ескеру қажет. Тәуліктің қараңғы болуына байланысты 4 қыркүйек күні таңертеңге дейін сөндіруді тоқтату туралы шешім қабылданды. Таңертең олар қайтадан өрт орнына аттанды. Өрт шамамен 170 га жерде жанып жатыр, сондай-ақ, «Ақжайық» республикалық табиғи резерватының деректері бойынша олардың аумағында жанған алаң 5 га құрайды, қалған жанған бөлігі Кеңөзек ауылдық округіне тиесілі», - деп хабарлайды аталған департаменттің баспасөз қызметінен.

Сонымен қатар, өртті ауыздықтауға төтенше жағдай департаменті мен резерваттың қызметкерлері мен құрал-жабдықтарынан бөлек, «Атырау облысы Су Арнасы» РМК-ның жұмыс күші мен техникасы қолданылғаны белгілі болып отыр.

Бұл жолы да әдеттегідей ешкімнің зардап шекпегені, қорықтың ерекше қорғалатын аң-құсына зиян келмегені айтылып отыр. Бір жақсысы, әзірге «Ақжайықта» көктемгі аң-құстың төлдейтін кезінде тіркелген өрт дерегі жоқ, бұл кезде жан-жануарлар төтенше жағдайда қашып үлгере алмайтындықтан, орны толмас зиян келген болар еді.

Облыстық төтенше жағдайлар департаменті баспасөз қызметінің мәліметінше, қорық аумағында 2018 жылы бес өрт оқиғасы тіркеліп, 58,3 га жер өртке оранған; 2019 жылы тілсіз жау жеті рет қайталанып, 60 га жерді жайпаған; 2020 жыл басынан бері ғана резерват бес рет өртеніп, одан жалпы көлемі 19,8 га жер зардап шекті. Өрттің орын алу себептері – тұрғындардың өрт қауіпсіздігі ережелерін сақтамауы, найзағай түсу сияқты табиғи факторлар.

Құралай Қуатова.

Атырау облысы

Атырауда күйеуінен қашқан әйел мен баланың баратын жері жоқ

Арнайы мекемелер «карантин кезінде шыдай тұруға» кеңес берумен шектеледі.    

02 Тамыз 2020 14:36 1694

Биыл жыл басынан бері Атырау облыстық полиция департаментінде 428 тұрмыстық арыз-шағым тіркелген. Салыстырмалы түрде бұл сан былтырғы деректі төңіректейді, бірақ, облыстық полиция департаментінің аға инспекторы Бибігүл Төлегенованың айтуынша, бір үйде бірге тұратын адамдардың карантин кезінде шаршай бастағаны аңғарылады. Бір-біріне «күн көрсетпейтін» міндетті түрде ерлі-зайыптылар емес, қайнатасына, енесіне немесе басқа да отбасы мүшелеріне шағымданатындар да кездесіп тұрады екен.

Өзбекстан азаматшасы Зуһраға (есімі өзгертілді) жақында дос-жарандары мен жай ғана жанашыр жандар ақша жинап беріп, таксиге отырғызып жіберген. Қатаң карантин жағдайында тұрған қалада пойыз қозғалысы тоқтаған, ұшақ құны қымбат, келіншек қайткенде де бір көліктен екіншісіне мініп отырып, Нөкістегі төркініне жетіп алмақ.

«Бұрын вахтамен жасайтын күйеуім екі айдан бері жұмыссыз қалды. Қолы бос болғасын өзі сияқтылармен бірге ішеді, қол жұмсайды. Полиция шақыртып, «он бес күнге салып жібер» дегендер болды, бірақ, бұл жақта жалғызбын, сөзімді сөйлейтін ешкім жоқ, одан сайын ашуландырып алармын деп қорықтым», – дейді Зуһраның өзі.

Бірнеше рет түн мезгілінде жолдасынан қашып келіп паналаған келіншекті аяған көршілер мен таныстары әке-шешесіне қайтарып жіберуді ұйғарған.

«Бақсақ бақа екен» демекші, карантин кезінде тұрмыстық зорлық-зомбылықтан немесе қазіргіше айтқанда абъюзерден зардап шеккен адамға қазіргі күні Атырауда баратын жер де болмай шықты. Мұнайлы өңірде әйелдер үшін мұндайда қалалық дағдарыс орталығы мен жалғызбасты аналарға арналған «Аналар үйі» жұмыс істейді. Бірақ, олардың екеуінде де карантин жарияланғанға дейін келіп түскен қыз-келіншектер жатыр. Одан бергі кезеңде уақытша паналайтын жер іздеген нәзік жандылар короновирус инфекциясы бойынша анықтама тапсыруы керек. Мұндай тестінің анықтамасы екі аптадан кейін шығатынын және барар жер, басар тау таппай қиналып жүрген әйелдердің көбінесе бір немесе бірнеше баламен жүретінін ескерсек – жағдайдың қаншалықты күрделі екендігін байқау қиын емес. Әзірге аталған екі мекеме де телефон арқылы жұбатып, интернет арқылы онлайн ақыл-кеңес берумен шектеледі. Ондағы психологтар хабарласқан қыз-келіншектерге «карантин біткенше шыдай тұруға» кеңес беретіндерін жасырмайды. Мұндайда «байғұс әйел-бала бір бәлекетке ұшырамай аман-есен жүрсе екен» деп тілеуін тілеп отырғаннан басқа шара жоқ.

«Телефон соғып, көмек сұрайтындар, жасырмаймын, бар. Кейде сөйлесе келгенде проблеманы адамдардың өздері тудырып отырғаны көрінеді, бір-біріне жеңістік бергісі келмейді, мінезін көрсетеді. Ондайда басу айтып, сабырға шақырамын. Әзірге жаңадан ана мен бала қабылдай алмаймыз, облыстағы жағдайды өзіңіз де білесіз, науқас жандар келсе іштегілердің бәрі жаппай ауыруы мүмкін», – дейді «Аналар үйінің» директоры Гүлфариза Ғұбашева.

Отбасылық тәрбиелеу психологы Ғайни Сұлтанованың айтуынша, атыраулық психологтар қазіргідей қиын кезде тұрғындарға тегін көмек те беріп отыр. Әдепкіде кісілерді қажет кезінде үйінен қабылдап, психологиялық көмек беріп отырған коуч пневмониямен ауырып тұрғаннан кейін тек қана онлайн-режимге көшкен.

«Менің байқағаным, карантин кезеңінде жиі ұрысып-керісіп, тіпті ажырасып жатқан ерлі-зайыптылардың дені бұған дейін де аралары онша болмай, қарым-қатынасына сызат түскендер. Әйтпесе, бір-біріне, бала-шағаға көп уақыт бөлетініне қуанып, қызықты күн кешіп жатқан отбасылар да көп. Екіншіден, психологияда «құрбандық позициясы» деген термин бар. Ол адамның өзін қадірлей алмайтынын, сол себепті, басқаға да сыйлата алмайтынын көрсетеді. Мен қиындыққа ұшыраған әйелдерді кінәлаудан аулақпын, бірақ, олар осы «позициясын» өзгертпесе ештеңе де өзгермейді», – дейді Ғайни Сұлтанова.

Қалалық жұмыcпен қамту және әлеуметтік бағдарламалар бөлімінің мәліметінше, биыл 150 неке бұзылған. Жыл басынан бері 918 адам ажырасуға арыз беріп, оның 604-інің өтініші қанағаттандырылған, 179-ы медиация әдісімен татуласыпты. Салыстырмалы түрде бұл сандар да былтырғыдан аса көп емес. Өкілетті органдардың қызметкерлері оның себебін «қазіргідей кезде ажырасудың тиімді еместігімен» түсіндіреді. Бұдан бөлек, аудан, ауыл тұрғындарының арызданып, айырылып-қосылып жүруіне жүріс-тұрысының шектелгені де кедергі келтіріп отыр екен.

Құралай Қуатова,

Атырау облысы