Аталған шешім арқылы азаматтардың ақыл-ойының дұрыстығы, эмоцияналдық жағдайы анықталады, деп хабарлайды inbusiness.kz сайты.
Ел тұрғындарының жаппай психикалық тексерістен өтеуі – дұрыс құбылыс. Сонымен қоса, диспансерлік есепте тұрған науқастарды ауруханада емдеу, жүйелі түрде бақылау жүргізу де жоспарланған. Өйткені, елімізде есепте тұрған 297 мыңға жуық адамның 8 мыңы ғана психикалық орталықтарда ем алады. Әзірге жоба қаралып жатыр.
Министрліктің бұл бастамасын қазақстандықтардың басым көпшілігі қолдап отырғандай. Себебі, жаңа өзгеріс қоғамдағы жантүршігерлік жайттардың, жаға ұстатарлық жағдайлардың алдын алуға көмектесетіні сөзсіз.
"Психикалық мәселесі бар адамдарды есепке алып, олармен түсіндіру жұмыстарын жүргізу керек. Жаппай тексеру мүмкін емес. Себебі, бұл кей адамдардың жанына батып, арына тиюі мүмкін. Біреулерге ұнамауы мүмкін" деп жазады бір тұрғын. Кейбірі "Өте дұрыс шешім деп ойлаймын. Өзім де психологқа барып емделіп отырмын" деп пікір қалдырған. Енді кей әлеуметтік желі қолданушылары "Балалардың көбі компьютердің алдында, телефонда көп отырады. Түрлі контенттер көріп, неше түрлі ойынды ойнайды. Балаларға міндетті түрде керек" деген сыңайдағы ой-пікірлерін жарыса жазуда.
