/img/tv1.svg
RU KZ
Hang Seng 27 316,53 DOW J 28 998,32
FTSE 100 7 403,92 РТС 1 524,71
KASE 2 373,34 Алтын 1 645,90
Қор нарығынан қалай табыс табуға болады?

Қор нарығынан қалай табыс табуға болады?

Тәуекел төмендетіліп, транзакциялық шығын қысқартылып жатыр.

19 Қараша 2019 16:16 2729

Қор нарығынан қалай табыс табуға болады?

Автор:

Абылай Бейбарыс

Қазақстан қор биржасы (KASE) биылғы жылдың ІІІ тоқсанында сауда-саттықтың жиынтық көлемін 90,3 трлн теңгеге жеткізіп, өткен жылдың сәйкес кезеңіндегі қаржылық жағдайын 6,2 %-ға немесе 5,9 трлн теңгеге жақсартты.

Есептік кезеңде бағалы қағаздар нарығы 4,3 трлн теңгеге ұлғайды. Бұл бір жыл бұрынғыдан 23,6% көп көрсеткіш.

KASE баспасөз қызметінің хабарлауынша, 43 эмитент листингтен сәтті өтіп,

алғаш рет 24 компанияның бағалы қағаздары биржаның ресми тізіміне енді.

Жыл басынан бері эмитенттердің саны 157-ден 176-ға жетті. Акция нарығын капитализациялау 0,3%-ға өсіп, 15,4 трлн теңгені құрады.

«Корпоративтік облигациялар секторында алғашқы орналастыру көлемі 1,4

трлн, мемлекеттік бағалы қағаздар секторында 1 316 млрд теңгеден асты», – деген ақпарат таратты баспасөз қызметі.

Осыдан алты ай бұрын KASE 2019-2021 жылдарға арналған даму стратегиясын қабылдады. Онда қор биржасы отандық  компанияларға қаржы тартудың тиімді тетігін қалыптастыру, жеке және халықаралық инвесторлар үшін тартымды жағдай жасау сондай-ақ халықаралық стандартқа сай

биржалық қызмет аясын кеңейту бағытындағы жұмыстарын

жалғастыратынын нақтылады. Сонымен қатар акциялармен, облигациялармен, пайлық үлестегі инвестициялық қорлармен, репомен, фьючерстермен айналысуға басымдық беретінін айқындады. Сол кезде Қазақстан қор биржасының басқарма төрағасы Алина Алдамберген KASE

Орталық Азия аумағындағы көшбасшылығын сақтап қалатынын айтты.

«Қазақстан қор биржасы еліміздегі қаржы инфрақұрылымының ажырамас бөлшегі. Сондықтан ол негізгі контрагент ретінде қаржы нарығының ойыншыларына жағдай жасап, заман талабына сай тиімді мүмкіндік ұсына береді», – деді Алина Алдамберген.

Айта кетейік, былтыр Қазақстан қор биржасы мен Мәскеу биржасы (MOEX) стратегиялық ынтымақтастық туралы келісімге қол қойды. Нәтижесінде MOEX 2019 жылдың соңына дейін KASE жарғылық капиталының 20%-ын сатып алатын болды.

Басқарма төрағасының сөзінше, биржаның инвестициялық тартымдылығын арттыру үшін KASE қызмет көрсету аясын кеңейтіп, халықаралық инвесторлар үшін қолайлы бизнес-климат қалыптастыруға тырысып жатыр. Мақсатқа жету үшін KASE қор нарығының қатысушыларының тәуекелін төмендету, мәмілелердің аяқталуына кепілдік беру, транзакциялық шығындарын азайту сияқты жобаларды жүзеге асыруда.

Экономист Мақсат Халықтың мәлімдеуінше, қор нарығынан табыс табуға болады. Бұл үшін қаржылық сауаттылық қажет.

«Қор нарығының қатысушыларында табыс табу мүмкіндігі көп. Бұл жерде броккерлік компания арқылы акция, облигация сатып алуға болады. Сәтті сауда жасасаңыз табысыңызды кем дегенде 30%-ға еселейсіз», – дейді маман.

Абылай Бейбарыс

inbusiness.kz-ті қараңыз, оқыңыз :

MOEX KASE-нің 3,32% акциясына ие болып отыр – Алина Алдамберген

Қазақстан қор биржасы мен «Астана» халықаралық қаржы орталығын салыстыруға болмайды. 

25 Шілде 2019 13:26 1946

MOEX KASE-нің 3,32% акциясына ие болып отыр – Алина Алдамберген

Қазақстан қор биржасы (KASE) мамыр айында 2019-2021 жылдарға арналған даму стратегиясын қабылдады. Мұндағы мақсат Орталық Азия аумағындағы  қор нарығында өзінің көшбасшылығын сақтап қалу болды.

Естеріңізде болса, былтыр 10 қазанда KASE мен Мәскеу биржасы (MOEX) стратегиялық ынтымақтастық туралы келісімге қол қойды. Нәтижесінде MOEX 2019 жылдың соңына дейін KASE жарғылық капиталының 20%-ын сатып алатын болды. Келісім жыл басында жүзеге асып, MOEX KASE-нің 3,32% акциясының иесі атанды. Бұл туралы Қазақстан қор биржасының басқарма төрағасы Алина Алдамберген: «Алдағы уақытта Мәскеу биржасы бізден қанша акция сатып алатыны биржаға орналастырылатын акция санына байланысты болады. Сәйкесінше Ұлттық банктің үлесі азаяды. Бұған дейін Ұлттық банктің үлесі 50,1%-дан 49,1% - ға қысқарды. Егер МОЕХ KASE акцияларының санын ұлғайтатын болса, Ұлттық банктің үлесі төмендей береді», – деді.

Биржаның инвестициялық тартымдылығын арттыру үшін KASE қызмет көрсету аясын кеңейтіп, халықаралық инвесторлар үшін қолайлы бизнес-климат қалыптастыруға тырысып жатқанын тілге тиек еткен басқарма төрағасы Қазақстан қор биржасы мен «Астана» халықаралық қаржы орталығының (АХҚО) өздеріне тән ерекшеліктері бар екенін баяндады.  

«KASE ел заңнамасына сәйкес қызмет көрсетеді. Ал АХҚО жұмысы  ағылшын құқығымен реттеледі. Оның биржасы оффшорлық аймақ саналады. АХҚО-ға ел экономикасына инвестиция тартуға жәрдемдесу, Қазақстанның бағалы қағаздар нарығын дамыту, оның халықаралық капитал нарығымен ықпалдасуын қамтамасыз ету сонымен қатар ел аумағында исламдық қаржыландыру нарығын дамыту міндеті жүктелген. KASE болса акциялармен, облигациялармен, пайлық үлестегі инвестициялық қорлармен, репомен, фьючерстермен және басқа да операциялармен айналысады. Бізде 850 құрал, 200 эмитент бар. KASE алаңында 52 қатысушы жұмыс істейді. Олардың үшеуі резидент емес. Қазақстан қор биржасы еліміздегі қаржы инфрақұрылымының ажырамас бөлшегі. Ол негізгі контрагент ретінде қаржы нарығының ойыншыларына зор мүмкіндік ұсынып отыр. Біз бұрыннан жұмыс істеп келе жатырмыз, сондықтан бізді АХҚО биржасымен салыстыруға болмайды. Қалай болғанда да дәл қазір біздің нәтижелеріміз тең емес. Екі биржаның экономикадағы рөлі мен мақсаты әртүрлі. Осыны естен шығармау керек», – деді Алина Алдамберген.

Басқарма төрағасының сөзінше, бірінші жартыжылдықта KazMinerals акциялары - 17%, Халық банк акциялары - 16%, Kcell акциялары - 10,79%, Банка ЦентрКредит акциялары -3,5%, KEGOC акциялары - 0,83% өскен.

«ҚазТрансОйл» мен «Қазахтелеком» акциялары 20% және 27,7 %-ға арзандаған.

«Қазақтелеком» акцияларының арзандауына миноритарлық акционерлермен болған келіспеушілік, ал «ҚазТрансОйл» акциялары құнының құлдырауына «Дружба» құбырындағы мұнайдың ластануы кері әсер етті», – деді Қазақстан қор биржасының басқарма төрағасы.

Абылай Бейбарыс

Қор биржасында кім белсенді

Орталық депозитарийде 119 037 жеке шот бар.

13 Маусым 2019 12:55 3934

Қор биржасында кім белсенді

Қазақстан қор биржасының (KASE) мамыр айындағы сауда-саттығының жиынтық көлемі 10 342,5 млрд теңгені құрап, сәуір айындағы көрсеткіштен 4% немесе 425,4 млрд теңгеге кем болды.

KASE индексінің мәні 3,3 %-ға төмендеді. Мысалы KAZ Minerals PLC-тің акциялары бір айда негізгі құнының 20,74 %-ын жоғалтып, 2 560 теңгеге түсті. Теріс көрсеткішке мыс бағасының арзандауы себеп болды.

Мамырда «ҚазТрансОйл» АҚ жай акцияларының бағасы 6,32 %-ға азайып,1 175 теңгеден сатылды. Ал «Қазақтелеком» АҚ жай акциялары 4,04 %-ға өсіп, 26 790 теңгені құрады. Айта кетейік, 21- мамырда «Қазақтелеком» АҚ миноритарлық акционерлермен корпоративтік дауды реттегені туралы ресми мәлімдеме жасады. 29 - мамырда компания жай акциялар бойынша 4 млрд теңге дивиденд төледі.

Мамырда акция нарығының капитализациясы 2%-ға төмендеп, 320,4 млрд теңгеден 15,6 трлн теңгеге дейін құлдырады. Бұған кері баға динамикасы әсер етті. Есесіне сауда-саттық көлемі сәуір айымен салыстырғанда 28,3 %-ға өсіп, 2,4 млрд теңгеден 10,7 млрд теңгеге жетті. Мұнда сауда-саттықтың орташа күндік көлемі 533,5 млн теңгені құрады.

Қазақстан қор биржасында жеке тұлғалар белсенді екен. Ел азаматтары шоттардағы акция айналымының 55,3 % -ын реттеп отырған көрінеді. Жеке тұлғалардың орталық депозитарийде 119 037 жеке шоты бар.

Айта кетейік, алыс-беріс жасауда  брокер-дилерлердің үлесі 22,6%-ды, екінші деңгейлі банктердің үлесі 0,1 %-ды, заңды тұлғалардың үлесі 20,7 %-ды сондай-ақ резидент еместердің үлесі 36,6 %-ды құрайды.

Өткен айда айналымдағы корпоративтік борыш көлемі 0,5 % немесе 62,8 млрд теңгеге төмендеп, 11,5 трлн теңгеге түсті. Алайда корпоративтік облигациялардың қайталама нарығындағы сауда-саттық көлемі сәуір айымен салыстырғанда 10,0 %-ға ұлғайып, 43,3 млрд теңгеден 47,6 млрд теңгеге өсті. Сауда-саттықтың орташа күндік көлемі 2,4 млрд теңге болды.

Мамыр айында мемлекеттік бағалы қағаздардың көлемі 1,6 % немесе 2,7 млрд теңгеге өсіп, 176,5 млрд теңгеге жетті. Сауда-саттықтың орташа күндік көлемі 8,8 млрд теңге болды.

Есепке алынып отырған айда KASE сауда-саттық тізіміне 5 халықаралық қаржы ұйымы облигацияларының 26 шығарылымы енді. Тізімде Еуразиялық даму банкі, Еуропалық қайта құру және даму банкі, Еуропалық инвестициялық банк, Халықаралық қаржы корпорациясы (IFC) және Азия даму банкі болды.

Халықаралық қаржы ұйымы облигацияларының қайталама нарығында сауда-саттық көлемі 151 млн теңгені құрады. Оның 50%-ы брокерлік-дилерлік компаниялармен, 50 %-ы институционалдың инвесторлармен жасалған мәміле болды.

Мамырда шетел валюталарының сауда-саттығына KASE-нің 28 мүшесі  қатысты. Сауда көлемі 811,8 млрд теңгені құрады. Бұл жерде сауданың орташа күндік көлемі 40,6 млрд теңге болды.

Абылай Бейбарыс

inbusiness.kz-ті қараңыз, оқыңыз :

Жаңалықтарға жазылу: