/img/tv1.svg
RU KZ
РТС 1 083,18 Hang Seng 23 739,48
KASE 2 222,90 FTSE 100 5 560,15
DOW J 21 983,26 Бидай 558,20
KASE-нің көрсеткіші кем болды

KASE-нің көрсеткіші кем болды

Қазақстан қор биржасының табысы 23,7 трлн теңгеге қысқарды. 

21 Қаңтар 2019 17:12 5098

KASE-нің көрсеткіші кем болды

Автор:

Абылай Бейбарыс

Өткен жылдың қорытындысы бойынша Қазақстан қор биржасының (KASE) сауда-саттықтан түскен жиынтық табысы 127,8 трлн теңгені құрады. Бұл 2017 жылмен салыстырғанда 15,6 %-ға немесе 23,7 трлн теңгеге кем көрсеткіш.

KASE басқармасының төрағасы Алина Алдамбергеннің айтуынша, корпоративтік қарыз 21%-ға көбейіп, 10,8 трлн теңгеге жеткен.

«Бұған дейінгі рекордтарымызды қайталай алмадық. Биыл эмитенттеріміз жоғары нәтиже көрсетеді деп үміттенеміз», – деді ол.

Басқарма төрағасының мәлімдеуінше, бағалы қағаздар нарығында 41,2% өсім тіркелген. Шетел валюталарының нарығындағы оң нәтиже 9,1% болған. Алайда ақша нарығы 19%-ға қысқарған. Бұған валюталық своп операцияларының шекті көлемде жүруі себеп болған.

«Астана» халықаралық қаржы орталығының пайда болуы және сауда-саттықтың 2,5 есе өсуі жоғарыдағы факторларға негіз болды», – деді Алина Алдамберген.

Оның сөзінше, облигация нарығында 26 эмитент листингтен өткен.

«Облигацияны дәстүрлі түрде шығаратындардың қатарында әдеттегідей банктер мен ұлттық компаниялар болды», – деді KASE басқармасының төрағасы.

2018 жылдың қорытындысы бойынша қордың индексі 6,6% ғана өсіпті. Бұл туралы KASE басқарма төрағасының орынбасары Андрей Цалюк баяндады.

«Егер біз әлемдік нарықтағы негізгі индекстармен салыстыратын болсақ,KASE-нің MOEX-қа ғана есе жібергенін көреміз. Дүниежүзіндегі нарықтардың индекстері жыл соңында құлдырап кетті. Біздің индекс өсім көрсетті», – деді басқарма төрағасының орынбасары.

KASE индексінде KAZ Minerals қана төмен көрсеткіш көрсетіпті. Осы турасында Андрей Цалюк: «Индекс KAZ Minerals Ресей Федерациясының Чукот автономиялы округіндегі «Баимская» мыс жобасын сатып алғаннан соң түсіп қалды. Себебі инвесторлар аталмыш жобаның тәуекелі көп деп қауіптенді», – деді.

Абырой болғанда басқа компаниялар оң нәтиже көрсеткен. Мұны басқарма төрағасының орынбасары былай деп тілге тиек етті: «Қазақтелеком» 63%, Halyk Bank 22%, БанЦентрКредит 19%, KEGOC 15% өсім көрсетті».

Абылай Бейбарыс

inbusiness.kz-ті қараңыз, оқыңыз :

KASE индексінің мәні 3,3%-ға кеміді

Репо операцияларының нарығы ғана оң нәтиже көрсетті.  

13 Наурыз 2020 19:56 1199

KASE индексінің мәні 3,3%-ға кеміді

Ақпан айында Қазақстан қор биржасындағы (KASE) сауда-саттықтың жиынтық көлемі 10 млрд 252,9 млн теңгені құрады. Бұл қаңтар айымен салыстырғанда 12,2 %-ға немесе 1 млрд 115,2 млн теңгеге көп көрсеткіш.

Дегенмен өткен айдың қорытындысында KASE индексінің мәні 3,3%-ға кеміді. Ал акция нарығының капитализациясы 0,02 %-ға қысқарып, 17,1 трлн теңгеге азайды. 

Өткен айда биржаның ресми тізіміне 72 эмитенттің 272 корпоративті облигациясы орналастырылды. Олардың табыстылық индексінің мәні 10,72% -ды көрсетті.

Ақпанда қор биржасының бастапқы нарығына құны 30,6 млрд теңгені құрайтын корпоративті облигациялар шығарылды. Нәтижесінде «Баспана ипотекалық компаниясы» АҚ облигациялары 29,2 млрд теңге тартты. Мұндағы орташа табыстылық жылына10,7%-ды құрады.

«ҚазАгроФинанс» АҚ 4,9 жылда өтеу шартымен жылына 13% үстемемен 1 млрд теңге тартты, ал «ТехноЛизинг» ЖШС KASE-ге жылына 16% үстемемен облигация орналастырып, 405,2 млн теңгеге ие болды.

Корпоративті облигациялардың бастапқы нарығында инвесторлардың көшін екінші деңгейлі банктер бастады. Олардың үлесі – 43,4%-ды құрады.

Осы жерде брокер-дилерлердің қатынасы – 5%, басқа институционалды инвесторлардың үлесі – 36,9%, заңды тұлғалардың әрекеті – 14,7%, жеке тұлғалардың белсенділігі – 0,1%, ал резидент еместердің үлесі – 1,1% болды.

Облигациялардың қайталама нарығындағы сауда көлемі 75,4%-ға кеміді. Бұл жерде де екінші деңгейлі банктер топ бастап, қатысу үлесінің 30,4%-ын иеленді. Ал брокер-дилерлер – 16,1%, басқа институционалды инвесторлар – 25,8%, заңды тұлғалар – 22,5%, жеке тұлғалар – 5,2%, резидент еместер – 5,9%-ды құрады.

Мемлекеттік бағалы қағаздар нарығындағы сауда-саттық ақпан айында 47,7%-ға азайды. Бастапқы нарықтағы сауда көлемі 89,3 млрд, қайталама нарықтағы сауда көлемі 166,5 млн теңгеге пара-пар болды. Сегіз компания инвестициялық қорлардың бағалы қағаздарын сатты. Олар есептік кезеңде сауда көлемін 402,9 млн теңгеге жеткізді.

KASE басқарма төрағасының орынбасары Андрей Цалюктің сөзінше, 1 наурызда қор биржасының орталық депозитариінде жеке тұлғалардың 118 773 есепшоты бар екені анықталды. Өткен жылдың сәйкес кезеңінде орталық депозитариде 116 824 есепшот болған.

Есептік кезеңде шетел валютасы нарығындағы сауда көлемі азайып, 797 млрд 8 млн теңгені құраған. Бұдан бір ай бұрын бұл көрсеткіш 107,4 млрд теңгеге артық болған.

Есептік кезеңде репо операцияларының нарығы оң нәтиже көрсетті. Бұл сегменттегі сауда көлемі 8 032,3 млрд теңгені құрап, бір ай бұрынғы нәтижеден 28,7%-ға артық болды.

Айта кетейік, KASE Орталық Азия аймағындағы жетекші қор биржасы саналады. Ол бағалы қағаздармен сауда-саттық жасау көлемі бойынша ТМД қор биржаларының арасында екінші, ал FEAS қор биржаларының арасында нарықтық капиталдандыру деңгейі бойынша алтыншы орынға орналасқан. KASE – әмбебап сауда-саттық алаңы ретінде танылған. Себебі мұнда репо нарығының құралдары, шетел валюталары, мемлекеттік және корпоративтік бағалы қағаздар, халықаралық қаржы институттарының облигацияларына қатысты қаржылық операциялар атқарылады.

Абылай Бейбарыс

«Бозшакөлде» өткен жылы қанша мыс өндірілді?

Кәсіпорын 2019 жылдың өндірістік қорытындыларын жариялады. 

31 Қаңтар 2020 16:17 2679

«Бозшакөлде» өткен жылы қанша мыс өндірілді?

Екібастұз қаласының аумағында орналасқан «Бозшакөл» кен байыту компаниясы 2019 жылдың қорытындыларын жариялады. Ресми мәліметке сүйенсек, кәсіпорын 2019 жылдың төртінші тоқсанында 9 млн 59 мың тонна кен өндірген. Жалпы, бір жыл ішіндегі көрсеткіш 35 693 мың тоннаны құрады. Статистикалық деректер бұл цифрдың 2018 жылдың деңгейінен әлдеқайда жоғары екенін көрсетіп отыр. 2018 жылы кәсіпорында 30 722 мың тонна кен өндірілген еді.

Кен өндірісінің ұлғаюына негізінен каолин балшығы бар кеннің қосымша қорын ашу себеп болған. Биыл қорлардан өңделген каолин балшығы бар кеннің көлемі айтарлықтай көп болады деп күтілуде.

Мыс өндірісі үшінші тоқсанда 32,1 мың тоннаны құраса, төртінші тоқсанда сәл-пәл кеміп, 31 мың тоннаға тең болды. Диірмендердің қаптамасын ауыстыру өндіріс барасында кендегі мыстың жоғары үлесін бір қалыпты еткен. Мыс өндірісінің жылдық көлемі 110,2 мың тоннаны құрады. Әу бастағы жоспар 105-115 мың тонна деп көрсетілген болатын. Демек, компания мыс өндіру жоспарын ойдағыдай орындады және бұл көрсеткіш 2018 жылдың деңгейінен 8 %-ға жоғары. 2018 жылы 101,6 мың тонна мыс өндірілген еді.

Кенді өңдеу көлемінің азаюына байланысты алтын өндірісі үшінші тоқсандағы 43,4 мың унция деңгейінен төртінші тоқсанда 41,8 мың унцияға дейін төмендеген. Жалпы, 2019 жылы 144,8 мың унция алтын өндірілді. Бұл 2018 жылға қарағанда 13%-ға артық. 2018 жылы 127,8 мың унция алтын алынған еді. Осылайша, биылғы нәтиже 130-140 мың унция көлемінде белгіленген болжамнан асып түсті. Бұл кендегі алтынның орташа үлесінің жоғарылығы мен бөліп алудың жоғары коэффициентінің нәтижесінде мүмкін болып отыр.

Өткен жылы 803 мың унция көлемінде күміс өндірілді. Бұл 700 мың унция көлемінде белгіленген жоспардан жоғары. Күміс өндірісі 2018 жылмен салыстырғанда 21%-ға өскен. 2018 жылы көрсеткіш 666 мың унцияны құраған-ды.

Жалпы, құрамына «Бозшакөл» кен байыту комбинаты кіретін KAZ Minerals тобы 2019 жылы 311,4 мың тонна мыс өндірген. Бұл 2018 жылға қарағанда (294,7 мың тонна) 6%-ға жоғары. Ақтоғайдағы өндірістің қарқыны нәтижесінде компания жоспарлы 300 мың тоннаға жуық көрсеткіштен асып түсті. Бозшакөл мен Ақтоғайдағы сульфидті кендерді өңдейтін фабрикалар 2019 жылы есептік өткізу қуаттылығымен жұмыс істеген.

Бозшакөл және Бозымшақ кен орындарында жоғары үлестің есебінен алтын өндіру жыл бойында 10%-ға артып, 201,5 мың унцияға дейін жетті. 2018 жылғы көрсеткіш 183,4 мың унция еді.

«Төртінші тоқсанда KAZ Minerals жоғары операциялық нәтижелерді көрсетті. Қазақстандағы ашық түрдегі ірі масштабты кеніштеріміз рекордтық деңгейге жетті. Бозшакөл мен Ақтоғайдағы сульфидті кен өңдейтін негізгі фабрикалар 2019 жылы есептік өткізу қуатында жұмыс істеді. Мыс пен алтын өндірісінің жылдық көлемі тиісінше 311 мың тонна және 201 мың унция болып, жоспарланған жылдық көлемнен асып түсті. Топ өндірістің өсуін төмен шығынмен үйлестіруді жалғастыруда. Ал Ақтоғай кен байыту комбинатын кеңейту жобасы аясында 2021 жылы құрылыс жұмыстары аяқталғаннан кейін өндіріс көлемінің ұлғаюына ықпал етеді», – дейді KAZ Minerals тобының басқарма төрағасы Эндрю Саузам.

Операциялық шығындары бойынша Бозшакөл халықаралық мыс өндіруші кәсіпорындар арасында бірінші квартильге кіреді. Оның кен өңдеу қуаты жылына 30 млн тоннаны құрайды. Кенішті әлі 40 жылға жуық уақыт бойы пайдалануға болады. Кендегі мыс құрамы – 0,37%. Карьер мен кен байыту фабрикаларының өндірісі 2016 жылы басталды.

Еске сала кетейік, КAZ Minerals Қазақстанда, Қырғызстанда және Ресейде заманауи, ірі ауқымды, азшығынды карьерлік типтегі тау-кен өндірісін дамытуға бағытталған мыс өндіруші компания. Компания операциялық қызметін Павлодар облысындағы Бозшакөл және Шығыс Қазақстандағы Ақтоғай ашық кеніштерде, сонымен қатар Шығыс Қазақстанда орналасқан үш кеніш пен үш кен байыту фабрикаcында және Қырғызстандағы Бозымшақ мыс-алтын кенішінде жүргізеді.

2019 жылдың қаңтар айында топ Ресей Федерациясы Чукот автономиялы округіндегі Баимская мыс жобасын сатып алды.

KAZ Minerals PLC компаниясының акциялары Лондон және Қазақстан қор биржаларында айналымда. KAZ Minerals-та шамамен 15 000 адам жұмыс істейді.Олардың басым бөлігі Қазақстан азаматтары.

Фархат Әміренов

inbusiness.kz-ті қараңыз, оқыңыз :

Жаңалықтарға жазылу: