/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 440,81 Brent 36,55
«Бозшакөл» алты айда қанша мыс өндірді?

«Бозшакөл» алты айда қанша мыс өндірді?

«KAZ Minerals» тобы 2020 жылғы бірінші жартыжылдықтың қорытындысын жариялады.

16:23 01 Тамыз 2020 597

«Бозшакөл» алты айда қанша мыс өндірді?

Автор:

Фархат Әміренов

2020 жылдың бірінші жартыжылдығында «Бозшакөл» кен байыту комбинатында кен өндіру каолин балшығы бар шикізатты аршуды қысқарту есебінен 19%-ға, яғни, 14,3 млн тоннаға дейін қысқарды. Дәл бір жыл бұрынғы көрсеткіш 17,5 млн тоннаны құраған еді. Компания өкілдерінің айтуынша, кен өндірудің төмендеуі кеніштің жоспарларына сәйкес келеді және ол сульфидті кен өндірудің 16 пайызға өсуімен ішінара өтеледі.

Өткізу қабілетінің жоғарылығынан және кен құрамындағы металдың орташа мөлшерінің нәтижесінде мыс өндірісі 28 пайызға артып, 60,4 мың тоннаны құрады. 2019 жылдың бірінші жартысындағы көрсеткіш 47,1 мың тонна болған еді. 2020 жылдың бірінші тоқсанында мыс өндіру 29,8 мың тоннаға тең болды. Екінші тоқсанда 30,6 мың тонна мыс өндірілді. Көрсеткіш бірінші тоқсанмен салыстырғанда 3 пайызға жоғары.

«Мыс өндірісінің жоспарлы жылдық аралығы 110-120 мың тонна деңгейінде сақталады. Дегенмен, өндіріске COVID-19-ға байланысты үзілістер, сондай-ақ, жылдың екінші жартысындағы жоспарлы техникалық қызмет көрсету әсер етуі мүмкін», – делінген «KAZ Minerals» тобының ресми хабарламасында.

2020 жылдың алғашқы жартысында өңдеу көлемінің ұлғаюы, кендегі металдың орташа мөлшерінің және бөліп алу коэффициентінің жоғары болуының нәтижесінде алтын өндіру 40 пайызға артып, 83,3 мың унцияға дейін жетті. Бір жыл бұрынғы көрсеткіш 59,6 мың унция еді. Екінші жартыжылдықта металл мөлшерінің және қайта өңдеу көлемінің төмендеуіне байланысты өндіріс көлемі азаюы мүмкін. Соған қарамастан, алтын өндірісінің жылдық ауқымы 140-150 мың унция деңгейінде сақталып отыр.

Күміс өндірісінің көлемі бірінші жартыжылдықта өңдеу көлемі мен кендегі металл мөлшерінің ұлғаюы есебінен 465 мың унцияға дейін жеткен (2019 жылдың бірінші жартысындағы көрсеткіш – 334 мың унция). Өсім 39 пайызды құраған. Күміс өндірісінің жылдық жоспары өзгеріссіз қалды. Яғни, шамамен 700 мың унция өндірілуі керек.

Жалпы, 2020 жылдың бірінші жартыжылдығында «KAZ Minerals» тобы 153,8 мың тонна мыс өндірді. Бұл 2019 жылдың бірінші жартысымен (147,6 мың тонна) салыстырғанда 4 пайызға артық. Бұған негізінен байыту фабрикаларының өткізу қабілетінің жоғарылығы және «Бозшакөл» кеніндегі мыстың жоғары мөлшері себеп болған. Алтынның өндірісі 25 пайызға артып, 109,7 мың унцияға дейін жетті. 2019 жылдың бірінші жартысындағы көрсеткіш – 87,7 мың унция.

Биылғы алғашқы жарты жылда Шығыс Қазақстан облысындағы «Ақтоғай» кен байыту комбинатында 67,6 мың тонна, Павлодар облысындағы «Бозшакөл» кен байыту комбинатында 60,4 мың тонна, Шығыс өңірдің кәсіпорындарында және Қырғызстандағы Бозымшақ кенішінде 25,8 мың тонна мыс өндірілді.

«2020 жылдың екінші тоқсанында «KAZ Minerals» тобы барлық

кәсіпорындарда мыс өндірісін ұлғайтып, өндірістің 5 пайыздық өсуін қамтамасыз етті. Бұл қазіргі күрделі операциялық ортадағы тамаша көрсеткіш болып табылады және қызметкерлердің табандылығын көрсетеді. Біз жылдың екінші жартысына COVID-19-ға байланысты қауіп-қатер аясында аяқ басып отырмыз. Дегенмен, барлық металдар өндірісі бойынша жылдық мақсаттарға жетуге мүмкіндік бар», – дейді «KAZ Minerals» тобының басқарма төрағасы Эндрю Саузам.

Фархат Әміренов


Telegram каналымызға жазылыңыз! 

«Бозшакөлде» өткен жылы қанша мыс өндірілді?

Кәсіпорын 2019 жылдың өндірістік қорытындыларын жариялады. 

31 Қаңтар 2020 16:17 5283

«Бозшакөлде» өткен жылы қанша мыс өндірілді?

Екібастұз қаласының аумағында орналасқан «Бозшакөл» кен байыту компаниясы 2019 жылдың қорытындыларын жариялады. Ресми мәліметке сүйенсек, кәсіпорын 2019 жылдың төртінші тоқсанында 9 млн 59 мың тонна кен өндірген. Жалпы, бір жыл ішіндегі көрсеткіш 35 693 мың тоннаны құрады. Статистикалық деректер бұл цифрдың 2018 жылдың деңгейінен әлдеқайда жоғары екенін көрсетіп отыр. 2018 жылы кәсіпорында 30 722 мың тонна кен өндірілген еді.

Кен өндірісінің ұлғаюына негізінен каолин балшығы бар кеннің қосымша қорын ашу себеп болған. Биыл қорлардан өңделген каолин балшығы бар кеннің көлемі айтарлықтай көп болады деп күтілуде.

Мыс өндірісі үшінші тоқсанда 32,1 мың тоннаны құраса, төртінші тоқсанда сәл-пәл кеміп, 31 мың тоннаға тең болды. Диірмендердің қаптамасын ауыстыру өндіріс барасында кендегі мыстың жоғары үлесін бір қалыпты еткен. Мыс өндірісінің жылдық көлемі 110,2 мың тоннаны құрады. Әу бастағы жоспар 105-115 мың тонна деп көрсетілген болатын. Демек, компания мыс өндіру жоспарын ойдағыдай орындады және бұл көрсеткіш 2018 жылдың деңгейінен 8 %-ға жоғары. 2018 жылы 101,6 мың тонна мыс өндірілген еді.

Кенді өңдеу көлемінің азаюына байланысты алтын өндірісі үшінші тоқсандағы 43,4 мың унция деңгейінен төртінші тоқсанда 41,8 мың унцияға дейін төмендеген. Жалпы, 2019 жылы 144,8 мың унция алтын өндірілді. Бұл 2018 жылға қарағанда 13%-ға артық. 2018 жылы 127,8 мың унция алтын алынған еді. Осылайша, биылғы нәтиже 130-140 мың унция көлемінде белгіленген болжамнан асып түсті. Бұл кендегі алтынның орташа үлесінің жоғарылығы мен бөліп алудың жоғары коэффициентінің нәтижесінде мүмкін болып отыр.

Өткен жылы 803 мың унция көлемінде күміс өндірілді. Бұл 700 мың унция көлемінде белгіленген жоспардан жоғары. Күміс өндірісі 2018 жылмен салыстырғанда 21%-ға өскен. 2018 жылы көрсеткіш 666 мың унцияны құраған-ды.

Жалпы, құрамына «Бозшакөл» кен байыту комбинаты кіретін KAZ Minerals тобы 2019 жылы 311,4 мың тонна мыс өндірген. Бұл 2018 жылға қарағанда (294,7 мың тонна) 6%-ға жоғары. Ақтоғайдағы өндірістің қарқыны нәтижесінде компания жоспарлы 300 мың тоннаға жуық көрсеткіштен асып түсті. Бозшакөл мен Ақтоғайдағы сульфидті кендерді өңдейтін фабрикалар 2019 жылы есептік өткізу қуаттылығымен жұмыс істеген.

Бозшакөл және Бозымшақ кен орындарында жоғары үлестің есебінен алтын өндіру жыл бойында 10%-ға артып, 201,5 мың унцияға дейін жетті. 2018 жылғы көрсеткіш 183,4 мың унция еді.

«Төртінші тоқсанда KAZ Minerals жоғары операциялық нәтижелерді көрсетті. Қазақстандағы ашық түрдегі ірі масштабты кеніштеріміз рекордтық деңгейге жетті. Бозшакөл мен Ақтоғайдағы сульфидті кен өңдейтін негізгі фабрикалар 2019 жылы есептік өткізу қуатында жұмыс істеді. Мыс пен алтын өндірісінің жылдық көлемі тиісінше 311 мың тонна және 201 мың унция болып, жоспарланған жылдық көлемнен асып түсті. Топ өндірістің өсуін төмен шығынмен үйлестіруді жалғастыруда. Ал Ақтоғай кен байыту комбинатын кеңейту жобасы аясында 2021 жылы құрылыс жұмыстары аяқталғаннан кейін өндіріс көлемінің ұлғаюына ықпал етеді», – дейді KAZ Minerals тобының басқарма төрағасы Эндрю Саузам.

Операциялық шығындары бойынша Бозшакөл халықаралық мыс өндіруші кәсіпорындар арасында бірінші квартильге кіреді. Оның кен өңдеу қуаты жылына 30 млн тоннаны құрайды. Кенішті әлі 40 жылға жуық уақыт бойы пайдалануға болады. Кендегі мыс құрамы – 0,37%. Карьер мен кен байыту фабрикаларының өндірісі 2016 жылы басталды.

Еске сала кетейік, КAZ Minerals Қазақстанда, Қырғызстанда және Ресейде заманауи, ірі ауқымды, азшығынды карьерлік типтегі тау-кен өндірісін дамытуға бағытталған мыс өндіруші компания. Компания операциялық қызметін Павлодар облысындағы Бозшакөл және Шығыс Қазақстандағы Ақтоғай ашық кеніштерде, сонымен қатар Шығыс Қазақстанда орналасқан үш кеніш пен үш кен байыту фабрикаcында және Қырғызстандағы Бозымшақ мыс-алтын кенішінде жүргізеді.

2019 жылдың қаңтар айында топ Ресей Федерациясы Чукот автономиялы округіндегі Баимская мыс жобасын сатып алды.

KAZ Minerals PLC компаниясының акциялары Лондон және Қазақстан қор биржаларында айналымда. KAZ Minerals-та шамамен 15 000 адам жұмыс істейді.Олардың басым бөлігі Қазақстан азаматтары.

Фархат Әміренов

«Бозшакөлде» тоғыз айда қанша мыс өндірілді

Екібастұздағы кен байыту комбинаты өндіріс көлемін ұлғайтты.  

29 Қазан 2019 11:37 5501

«Бозшакөлде» тоғыз айда қанша мыс өндірілді

Екібастұз аумағындағы «Бозшакөл» кен байыту комбинаты осы жылдың қаңтар-қыркүйек аралығында 79,2 мың тонна мыс өндірді. Бұл көрсеткіш өткен жылдың сәйкес кезеңімен салыстырғанда сәл-пәл көптеу. Былтыр дәл осы кезеңде мыс өндірісінің көлемі 75 мың тоннаны құраған болатын.

KAZ Minerals компаниясының хабарлауынша, үшінші тоқсанда «Бозшакөл» комбинатындағы мыс өндірісі 38 пайызға көбейген. Яғни, үшінші тоқсанда мұнда 32,1 мың тонна өнім алынған. Ал екінші тоқсанда бұл көрсеткіш 23,3 мың тоннаға тең болған еді. Мамандардың пікірінше, өндірістің ұлғаюы сульфидті кенді өңдеудің жоғары көлеміне және бөліп алудың жоғары дәрежесіне байланысты.

Үшінші тоқсанда «Бозшакөлдегі» алтын өндірісі де айтарлықтай өсім көрсеткен. Дәлірек айтсақ, алтын өндіру көлемі 47 %-ға, яғни 43 мың унцияға дейін жеткен. Бұл  – «Бозшакөл» үшін рекордтық көрсеткіш. Екінші тоқсанда аталған көрсеткіш 30 мың унцияны құраған болатын. Ал 9 айдағы өндіріс көлемі 103 мың унцияны құрады. Былтыр осы аралықтағы көрсеткіш 93,7 мың унцияға тең еді. 

Күміс өндірісінде де өсім байқалып отыр. Мәселен, екінші тоқсанда 165 мың унция күміс өндірілсе, үшінші тоқсандағы көрсеткіш 233 мың унциядан асып түсті. Жалпы, тоғыз айда 567 мың унция өндірілген. 2018 жылдың қаңтар-қыркүйегіндегі көрсеткіш 494 мың унция еді.

«2019 жылдың төртінші тоқсанында жоспарлы техникалық қызмет көрсетуге байланысты байыту фабрикасының өткізу қабілеті төмендейді. Бірақ «Бозшакөл» комбинаты 105-115 мың тонна көлеміндегі мыс өндірісінің жылдық көрсеткішіне, 130-140 мың унция көлеміндегі алтын өндіру ауқымының жоғарғы шегіне, сондай-ақ, 700 мың унция шамасындағы күміс өндірудің жылдық жоспарына қол жеткізеді», – деп сендірді KAZ Minerals тобының басқарма төрағасы Эндрю Саузам.

Жалпы құрамына «Бозшакөл», «Ақтоғай», «Шығысөңір» мен «Бозымшақ» кен байыту комбинаттары кіретін KAZ Minerals тобы 2019 жылдың тоғыз айында 230,5 мың тонна мыс өндірген. Бұл 2018 жылдың сәйкес кезеңімен салыстырғанда 6 пайызға немесе 216,8 мың тоннаға артық. Бұл ретте, үшінші тоқсан KAZ Minerals үшін мыс пен алтын өндіруде рекордты кезең болғаныны атап өткен жөн. Осылайша, компания үшінші тоқсанда 82,9 мың тонна мыс (2019 жылдың екінші тоқсанында 77,6 мың тонна) және 58,5 мың унция алтын (2019 жылдың екінші тоқсанында 44,3 мың унция) өндірді. Аталған нәтижелерге Ақтоғай мен Бозшакөлдің жоғары көрсеткіштері нәтижесінде қол жеткізілді.

Компания 2019 жылы 300 мың тонна мыс өндіруді жоспарлап отыр. Сонымен қатар жыл қорытындысы бойынша алтын өндіру жоспарын 5 пайызға арттыру күтілуде (170-185 мың унция).

Фархат Әміренов