/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 448,70 Brent 36,55
Павлодардағы таун-хаустар сатылмай жатыр

Павлодардағы таун-хаустар сатылмай жатыр

Әуежай қалашығындағы 55 үйді сатып алуға 30 адам ғана өтініш берген.  

21:36 11 Маусым 2020 3130

Павлодардағы таун-хаустар сатылмай жатыр

Автор:

Фархат Әміренов

Павлодар қаласының әуежайы маңында мемлекеттің көмегімен салынып жатқан 55 тұрғын үйдің құрылысы аяқталуға таяу. Бұл аумақта жекелеген тұрғындардың тұрғызып жатқан баспаналары да бар.  Аумақ Кенжекөл ауылдық округіне қарағандықтан, жергілікті әкімдік тұрғын үйлерді «Нұрлы жол» бағдарламасы арқылы сатуда. Бірақ, көркі көз тартатын жаңа үйлер өтпей жатыр.  Себебі, аталмыш үйлер орталық жылу құбырына қосылмаған.

Бұл аумақ Әуежай қалашығы деп аталады. Мұндағы жеке үйлер құрылысына жер телімін беру ісі 2007 жылы қолға алынған болатын. Сол кезде жер кодексінің талабына сәйкес, кезекте тұрған азаматтарға 10 соттық жер тегін үлестірілді. Өкінішке қарай, инженерлік инфрақұрылым (электр желісі, су және канализация құбырлары, жылу көзі) тартылмағандықтан, жер учаскесінің иелері 10 жылдан астам уақыт бойы құрылысты бастай алмай келді. Бұл мәселе көптен бері айтылып та келеді.

2018 жылға дейін электр қуатын тарту мәселесі ғана шешімін таппады. Дәл осы жылы 400 млн теңгеден астам соманы құрайтын электр қуатын тарту бойынша жоба қолға алынды. Павлодар қалалық құрылыс бөлімінің тапсырысы бойынша, республикалық бюджеттен екі кезеңмен бөлінген қаржыға электр желісі екі жыл бойы тартылды. Нәтижесінде 2019 жылы тұрғындар электр көзіне қосылуға техникалық рұқсат қағаздарын алып, армандаған мүмкіндікке қол жеткізе бастады. Бірақ, орталық су құбыры және канализация жүйелері дайын болмай шықты.

Белгілі болғандай, аталмыш құбырлар тартылған, бірақ жер учаскесінің иелері әлі күнге дейін оларға қосылуға болатынын-болмайтынын анық білмей дал. Осылайша, орталық жылу желілеріне қосылу туралы мәселе басы ашық күйінде қалып отыр.

Жоғарыда бұл аумақта жергілікті биліктің 55 жеке тұрғын үй салып жатқанын айтты. Осы орайда, әуелде 15 соттықтан иеленген 400-ден астам адамның 120-сынан көбі учаскелерді уақытында игере алмауына байланысты мемлекетке қайтаруға мәжбүр болды. Аталған Әуежай қалашығына кіретін ИЖС-1 және ИЖС-1А  алаңдарында бірыңғай типтегі 2 қабатты таун-хаус және 1 қабатты жеке үйлер салынуда. Пәтерлердің 1 шаршы метрі «Нұрлы жер» бағдарламасымен 120 мың теңгеге ұсынылып отыр. Алайда, ауданы 120 шаршы метрден асатын, 2 қабатты таун-хаустарды сатып алған адамдар үйін жеке пешпен жылытуға мәжбүр болады. Себебі, әуежай қалашығына орталық жылу құбыры тартылмаған.

Әуежай қалашығында салынып жатқан 55 үйдің құрылысы аяқталып қалды. Жұртшылыққа ол үйлерді түрлі бағдарламалар арқылы сатып алу ұсынылуда. Барлығы 30 адам өтініш беріп, 8-і ғана төлем қабілетін растаған. Алайда, өтініші қабылданған азаматтар да шағын ауданға халық толық қоныстанбаса, олар да көше алмайтынын айтуда. Ал толық қоныстану мәселесі жылумен қамту проблемасы шешілгеннен кейін мүмкін екені айтпаса да түсінікті.

Басынан соры арылмай келе жатқан Әуежай қалашығында кейінгі жоспар бойынша, 200 балаға арналған 2 балабақша, мектеп, сауда орталығы, әмбебап дүкен, өрті сөндіру депосы және демалыс саябағын салу қарастырылған.  Айтпақшы, бұл жерде 2000 жылдың басынан бері «Балалар ауылы» қоныстанып, қызмет көрсетіп келеді. Жылумен қамту мәселесі шешілсе, қалада жаңадан шағын аудан пайда болмақ.

Фархат Әміренов

«5-10-20»: Павлодардағы үйлердің бағасы 12 млн теңгеден аспауы керек

Жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге.

22 Мамыр 2020 15:23 4993

«5-10-20»: Павлодардағы үйлердің бағасы 12 млн теңгеден аспауы керек

Ел президенті тұрғын үй кезегінде тұрған азаматтардың баспана мәселесін шешу үшін «Нұрлы жер» бағдарламасының кезекті бағыты ретінде «5-10-20» ипотекалық бағдарламасын әзірлеуді тапсырды. Қазір жаңа бағдарламаның талаптары жан-жақты пысықталып, қанатқақты жоба ретінде қарастырылуда. Бағдарлама 1 шілдеде қабылданады деген болжам бар.

«Тұрғын үй құрылыс жинақ банкі» АҚ Павлодар облыстық филиалының директоры Талғат Баиловтың айтуынша, қазірдің өзінде бірқатар талаптары белгілі. Біріншіден, баспана алуға ниетті тұрғын жергілікті атқару органында тұрғын үй кезегінде тұруға тиіс. Екіншіден, алғашқы жарна ретінде пәтер құнының кемінде 10 пайызын төлеуі керек. Сол кезде ипотекалық несие 5 пайыздық мөлшерлемемен 20 жылға дейін беріледі.

«Павлодар облысында жеке құрылыс компаниялары ұсынған жаңа үйлердің бағасы 12 млн теңгеден аспауы керек. Ал жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге. Осы сомадан аспауы керек», – дейді Талғат Баилов.

Сонымен қатар, «Тұрғын үй құрылыс жинақ банкі» жанынан жыл соңына дейін «Отбасы банкі» құрылады. Бұл институт баспанаға мұқтаж азаматтарды есепке алу, тіркеу және тұрғын үйді үлестірумен айналысатын болады.

«Тұрғын үй кезегіндегі азаматтардың қай бағдарлама бойынша баспаналы болатыны тұрғын үй қолжетімділігі сатысына сәйкес бағаланады. Атап айтқанда, табысы төмен, яғни отбасының бір айлық кірісі жан басына шаққанда бір күнкөріс минимумынан аспайтын отбасыларға сатып алу құқығынсыз үйді жалға алу мүмкіндігі ұсынылады. Екі күнкөріс минимумына дейін табыс табатын көпбалалы, толық емес және мүмкіндігі шектеулі балаларды тәрбиелеп отырған отбасылар «Бақытты отбасы» бағдарламасына, ал 3,1 күнкөріс минимумына дейін табысқа ие баспанасыз отбасылар «5-10-20» жобасына қатыса алады. 2020 жылдың 1 сәуірінен бастап күнкөріс минимумы 32 668 теңгеге дейін өсті. Осылайша, «5-10-20» арқылы баспаналы болу үшін жан басына шаққандағы отбасы табысы 101 270 теңгеден аспауы тиіс», – деді Талғат Баилов.

Оның сөзінше, «Бақытты отбасы» бағдарламасында төлем қабілеттілігін растау кезінде мемлекеттен алатын түрлі төлемдер есептеледі. Ал «5-10-20» бағдарламасына қатысты мұндай талаптың болар-болмасы әзірше белгісіз.

«Павлодар облысында тұрғын үй кезегінде тұрған адам «5-10-20» бағдарламасы бойынша басқа аймақтан үй ала алмайды. Бүгінде аймағымызда 27 мыңнан астам адам кезекте тұр. Олар аталмыш бағдарлама арқылы Павлодар облысының аудан-қалаларынан ғана баспаналы бола алады», – деді облыстық филиал директоры.

Тұрғындар үшін тиімді жобаларының бірі - «Бақытты отбасы» бағдарламасы. Бағдарлама арқылы тұрғын үй кезегінде тұрғандар үй бағасының 10 пайызын алғашқы жарна ретінде төлеп, 20 жылға дейін жылдық 2 пайыздық мөлшерлемемен несие ала алады.

«Наурыз айында Павлодар қалалық қаржы бөлімі 497 өтінішті қабылдап, түрлі себепке байланысты 15 өтінішті кері қайтарды. Қалған 482 өтінішті қарастырып, біздің банкке 338 жолдама берді. «Тұрғын үй құрылыс жинақ банкі» аталмыш бағдарлама бойынша өтініштерді қарастыру үшін міндетті түрде жергілікті әкімдіктен жолдама берілуі керек. Бүгінде 338 өтініштің 76-сы мақұлданды», – деді Талғат Баилов.

Фархат Әміренов

Павлодардың Тұздысорынан тұз өндірілмек

«Павлодартұз» компаниясы биыл жаңа кен орнын іске қосуды жоспарлап отыр.  

19 Қаңтар 2020 16:57 1971

Павлодардың Тұздысорынан тұз өндірілмек

«Павлодартұз» жауапкершілігі шектеулі серіктестігі осы жылы жаңа кен орнын іске қосады. Кен орны ретінде Екібастұз қаласының аумағындағы Тұздысор көлі таңдалып алынды. Бұл жердегі тұздың қоры 6 млн 376 мың тоннаға бағаланып отыр.

Осы уақытқа дейін барлау, зерттеу жұмыстары жүргізілді. Биылғы көктемде құрал-жабдықтарды монтаждау жұмыстары басталады. Оған С.Торайғыров атындағы Павлодар мемлекеттік университетінің ғалымдары қатысады деп күтілуде. Өйткені, компания мен университет арасында қызмет көрсету бойынша тиісті келісімшарт жасалған.

2019 жылы жаңа кен орнында құрылыс-монтаж жұмыстары атқарылды. Атап айтқанда, электр энергиясын тарту желісі, тұзды өндіру және өңдеу учаскелері салынды. Жобаны жүзеге асыруға қазірдің өзінде 250 млн теңге жұмсалған. Енді бұған сатып алынатын құрал-жабдықтардың қаражаты қосылады.

Кәсіпорын директоры Денис Семеновтің сөзінше, университет өкілдері кен байыту фабрикасын сенімді электрмен жабдықтауы керек.

«Университет мамандары әзірлеушілермен және мердігер компаниялармен бірге жабдықтарды монтаждау жұмыстарына қатысады деп күтілуде. Аталған жұмыс барысында электр қозғалтқышты түрлі факторлардың, оның ішінде тұз, шамадан тыс жүктеме және тағы да басқа дүниелердің әсерінен қорғауды ұйымдастыру бойынша белгілі бір ұсыныстар жасалуы мүмкін. Жергілікті ғалымдардың бұл бағытта айтарлықтай жетістіктері бар. Солардың бірқатары өндіріс барысында қолданылмақ», – деді «Павлодартұз» ЖШС директоры.

Университет ғалымдарын энергетика факультетінің деканы Александр Кислов бастап барады. Профессордың сөзінше, білім, ғылым және өндіріс секілді үш тағанның бір арнада түйісуі – уақыттың талабы.

«Біздің ғалымдардың аталған бағытта қол жеткізген нақты жетістіктері бар. Олардың барлығы компания жұмысында қолданылады деген сенімдеміз. Біздің кафедраның мамандары кәсіпорындарды аралап, өз жетістіктерін жарнамалайды. Бүгінде Павлодар мұнай-химия зауытымен, Екібастұз қалалық электр торабымен, «Нефтехим ЛТД» компаниясымен бірлескен жұмыстарды қолға алу жоспарлануда», – дейді Александр Кислов.

Компания директорының сөзінше, жаңа кен орнын игерудегі негізгі мақсат – тұз экспортын ұлғайту емес. Дұрысы – болашақта салынатын кальцилендірілген сода зауытын шикізатпен қамту. Аталған зауытқа жылына 300 мың тонна тұз қажет.

Бүгінде «Павлодартұз» ЖШС-ның құрамына үш кен орны кіреді. Олар – Үлкен Қалқаман көлі, Үлкен Тобылжан көлі және Тұздысор көлі. Алғашқысынан жылына 50-60 мың тонна шикізат өндіріледі. Өндірілген жалпы өнімнің 90 пайызы Ресей Федерациясына экспортталады. Компания бұл бағытқа бес жыл қатарынан өнім жеткізуде. Экспорт көлемі жыл сайын шамамен 10 пайызға өсіп келеді.

Биыл іске қосылатын жаңа кен орнынан жыл соңына дейін 30-50 мың тонна өнім өндіру жоспарлануда. Мақсат – алдағы үш жылда толық қуаттылыққа шығу. Яғни, жылына 150 мың тонна тұз өндірілуі керек.

Еске сала кетейік, «Павлодартұз» ЖШС Павлодар өңіріндегі ірі компаниялардың бірі. Оның жұмыс істеп келе жатқанына 95 жыл болды. Компания өнеркәсіптік тұтыну үшін тұз өндіруге, өңдеуге және сатуға мамандандырылған. Серіктестіктегі жұмыстар маусымдық сипатқа ие. Яғни, өндіру жұмыстары сәуір айында басталып, қарашада аяқталады. Ал өнімді өңдеу және тиеу жұмыстары жыл бойы жүргізіледі.

Фархат Әміренов