Кездесу жыл сайын өтеді, іс-шараға деген қызығушылық жоғары. Биыл Сыртқы істер министрлігі, Сыбайлас жемқорлыққа қарсы іс-қимыл агенттігі, Қаржы министрлігі Мемлекеттік кірістер комитетінің жетекшілері қатысты.
Іс-шара барысында "Атамекен" басшысы Үкімет, депутаттық корпус және құқық қорғау органдарымен бірлесіп, бизнестің жүйелі мәселелерін шешу жөніндегі жұмыс, заңнаманы либерализациялау және ізгілендіру, бақылау-қадағалау функциялар, рұқсаттарды (лицензияларды) қысқарту мәселелерін атап өтті.
Сыбайлас жемқорлыққа қарсы қызмет төрағасының орынбасары Олжас Бектенов Агенттіктің қызметі жайында баяндап: "Үш бағыт бойынша жұмыс істейміз: сыбайлас жемқорлыққа қарсы ағарту, превенция және қылмыстық-құқтық шаралар. Қызметкерлердің сыбайлас жемқорлық қылмыстары үшін жетекшілеріне жеке жауапкершілік орнататын заңға қол қойылды. Нормативтік-құқықтық актілерді сыбайлас жемқорлыққа қарсы сараптама жүргізу институты қалпына келтірілді. 400-ден астам бизнес-жобаға сыбайлас жемқорлыққа қарсы сүйемелдеу көрсетілуде, олардың үштен бірі шетелдіктердің қатысуымен жүргізіледі", – деді.
Тимур Құлыбаев сыбайлас жемқорлықты жою және халықаралық принциптер және стандарттардың негізінде Қазақстанда құқықтық кеңістікті қалыптастырудың маңыздылығын атап өтті.
"ЭЫДҰ, Шығыс Еуропаның озық елдері, посткеңестіктен шыққан – Балтық бойы мемлекеттері және Грузияның тәжірибесін пайдаланбақпыз. Сондықтан Қазақстанда қолданып, енгізу үшін оң тәжірибені зерттеуде көмек көрсетуді сұраймын", – деп атап өтті "Атамекен" басшысы.
Аталған ұсыныс қолдау тапты. Литва және Грузияның дипломатиялық миссияларының басшылары Юрий Погребнякс, Зураб Абашидзе бұл істе "мемлекет пен үкіметтің еркі қажет, осының бәрі Қазақстанда бар" деп атап өтіп, қолдау көрсетуге әзірліктерін көрсетті. Өз әріптестеріне Еуроодақ өкілі де қолдау білдірді.
"Салық салу, сыбайлас жемқорлықты жою, заң үстемдігіне қатысты айтылған ұсыныстар өзекті тақырыптар, олар бойынша қарқынды жұмыс жүріп жатыр. Еуроодақтың осы мәселеде өз тәжірибесімен бөлісуге дайын екендігін растағым келеді, оның үстіне биылғы жылдың наурыз айында Еуроодақтың Қазақстан Республикасымен әріптестігі және ынтымақтастығын кеңейту туралы келісім күшіне енеді", – деді Еуроодақ елшісі Свен-Олов Карлссон.
Дипломатиялық миссиялардың өкілдері Қазақстанда енгізілген салықтық және кедендік дауларды сотқа дейін реттеу тәжірибесін, оның кәсіпкерлер үшін уақыт пен ақшаны үнемдеуге көмектесетінін атап өтті. Мәселен, қазақстандық және шетелдік компаниялар және кәсіпкерлердің ондаған мәселесі шешілді. Атап айтқанда, Қазақстандағы Жапонияның Төтенше және Өкілетті елшісі Тацухико Касаиның айтуынша, жапондық компаниялардың пікірінше, Қазақстандағы бизнеске қысым деңгейі айтарлықтай төмендеп келеді. Осы ретте, елші жапондық кәсіпкерлердің шетелдік жұмыс күшін тарту квотасын 40%-ға қысқартуға қатысты алаңдаушылығын білдірді.
Осы сұраққа жауап бергенТимур Құлыбаев "Мамандарды ұлттандыру бағдарламасы" сәтті іске асырылып жатқан "Теңізшевройл" компаниясын мысалға келтірді.
"Компаниялар бірінші кезекте қазақстандық қызметкерді жұмысқа алу керек. Егер еңбек нарығында қажетті біліктіліктің жергілікті мамандары болмаса, компаниялар өз қызметкерлерін оқыту және қайта даярлау жұмыстарын жүргізіп, келісімшарттық міндеттемелерге сәйкес осы мәселеге жүйелі түрде кірісуі керек. Мамандарымыз компанияда жұмыс істеген жылдар ішінде кәсіби түрде "өсті", шетелде компанияның түрлі кен орындарында тағылымдамадан өткен. Қазір олар шетелдік жұмысшыларды алмастырып, менеджер, жетекшілер және жетекші инженерлік-техникалық қызметтерді жүргізіп отыр. Бүгінгі күні ТШО-ның бірінші тоғыз жетекшісінің алтауы – Қазақстан азаматтары. Бұл таралуға тиіс оң тәжірибе деп ойлаймын. Бірнеше жылдан соң, компанияны біздің маманымыз басқарады деген ойдамын. Мамандарды ұлттандыру – мемлекеттік саясат, "Атамекен" қолға алған бағытты толығымен қолдайды, бірлесіп жұмыс істейміз", – деді Тимур Құлыбаев.
Кездесу барысында салық заңнамасын реформалау, салықтық апелляциялық комиссияларын құру процесі де талқыланды. Бизнес және шетелдік инвесторларды қосылған құн салығын қайтару мәселесі алаңдатады.
Мемлекеттік кірістер комитетінің төрағасы Марат Сұлтанғалиев: "ҚҚС құнын бюджеттен қайтару сомасы тәуекелдерді басқару жүйесі арқылы есептеледі. Егер ҚҚС жеткізушілер тізбегінің қандай да бір кезеңінде төленбеген болса, соманы қайтармаймыз. Мониторингте тұрған ірі салық төлеушілер үшін жеңілдетілген тәртіп қарастырылған, мұндай жағдайда тексерусіз соманың 70%-ына дейін қайтарамыз. Ірі кәсіпорындарға жатпайтын өндіруші–экспорттаушыларды қолдау үшін Президенттің тапсырмасы бойынша ҚҚС сомасына қайтару нормасы тексерусіз 50%, тексеруден кейін тағы 50%-ды құрайды. Бұл норма мақұлдау үстінде", – деді.
Жиын соңында "Атамекен" ҚР ҰКП Төралқа Төрағасы Қазақстан және кездесуге қатысушы елдердің көп жылғы ынтымақтастығы бұл әлі де халықаралық қатынастардың маңызды құрамдас бөлігі екенін және мұндай байланыс өзара тиімді экономикалық серіктестік мәселелері бойынша сындарлы диалогты дамытуға ықпал ететінін атап өтті.
