Ақпан айынан бастап тұрғын үйдің шаршы метрі 40 мың теңгеге қымбаттайды деген сөзге сенбеу керек. Бұл жылжымайтын мүлік нарығы маманының мәлімдемесі.
Естеріңізде болса, жыл басында тұрғын үй бағасы қымбаттайтыны туралы қауесет тарап, қалың көпшіліктің дегбірі қашты. Азын-аулақ ақшасын жиып-теріп, әне-міне, баспаналы боламыз деп отырған адамдар үмітіміз үзілді-ау деп сан соқты. Абырой болғанда мамандар "үй қымбаттайды" деген алып-қашпа әңгімені жоққа шығарды.
Қазақстан жылжымайтын мүлік федерациясының президенті Ермек Мүсірепов алдағы уақытта тұрғын үй бағасы қымбаттамайтынын, бұл қоғамды дүрліктіру үшін жасалған маркетингтік қадам екенін айтты. Оның сөзінше, қазір жылжымайтын мүлік нарығында бәсекелестіктің бәсі қызып тұр. Бұрынғыдай емес, ұсыныс көп. Яғни тұтынушыларда таңдау бар.
"Бағаны өсіре беруге болады. Алайда қымбат және ауданы үлкен үйлер өтпейді. Адамдар көбінесе 1 не 2 бөлмелі пәтер алады. Себебі олардың қаржылық мүмкіндігі бұдан үлкен үйге жетпейді", – деді Ермек Мүсірепов.
Статистика комитетінің дерегінше, 2019 жылы үй сату мен сатып алу көрсеткіші 2018 жылмен салыстырғанда 21%-ға артқан. Бірақ баға өспеген.
"2020 жылдың алғашқы тоқсанынан жыл ортасына дейін шаршы метрлердің құны өспейді, баға тұрақты болады. Алдын ала жасалған болжам бойынша, тұрғын үйлердің шаршы метрі 2019 жылдың төртінші тоқсанындағы бағамен сатылады. Қазір бастапқы нарықта да, қайталама нарықта да баға тұрақты. Бұған ипотекалық бағдарламалардың субсидиялануы негіз болып тұр", – деді Ермек Мүсірепов.
Қазақстан жылжымайтын мүлік федерациясы президентінің айтуынша, былтыр сатылған үйлердің 80%-ы несие арқылы рәсімделген.
"Халықтың қолында ақша жоқ. Адамдар көбінесе тұрғын үйді ипотекалық несиемен алады. Жылжымайтын мүлік нарығының ойыншылары адамдардың қолында ақша жоқ екенін біліп тұрып, бағаны өсірмейді. Бағаның өсуіне негіз жоқ", – деді Ермек Мүсірепов.
Экономист Бауыржан Ысқақов жылжымайтын мүлік нарығында баға аяқ астынан емес, бірте-бірте, кезең-кезеңімен өсетінін және бұған не түрткі болатынын түсіндірді.
"Құрылыс материалдарының басым бөлігі шетелден тасымалданады. Отандық құрылыс компаниялары шетелдіктермен доллармен есептеседі. Доллардың бағасы құбылған сайын шығын көлемі артады. Кейін құрылыс компаниялары шыққан шығынды тұтынушының есебінен өтеп алады. Бұл үшін жыл сайын тұрғын үй бағасын 10-15%-ға өсіреді. Құрылыс компаниялары құрылыс материалдарын сырттан әкелуін тоқтатпаса, жылжымайтын мүлік нарығындағы жағдай жақсармайды. Қымбатшылық жалғаса береді", – деді маман.
Абылай Бейбарыс
