ҚР Қаржылық мониторинг агенттігінің Алматы қаласы бойынша Экономикалық тергеп-тексеру департаменті жалған дәрілік препараттарды дайындау бойынша ірі астыртын цех құрған ұйымдасқан қылмыстық топтың 3 мүшесіне қатысты сотқа дейінгі тергеуді аяқтады, деп хабарлайды inbusiness.kz.
Жедел іс-шаралар нәтижелері бойынша, барлығы 60 000 астам қапталған "Ротоцеф", "Солкасерил", "Кальций Д3 никомед", "Цераксон" және т.б. сауда атауларымен шыққан күмәнді дәрілік препараттар тәркіленген.
"Covid-19 пандемиясы кезеңінде болған жедел-іздестіру іс-шараларын жүргізу барысында Алматы қаласы бойынша департамент қызметкерлері дәрілік препараттарға арналған қорапшаларды дайындайтын баспахана және заңсыз өнімдерді сақтауға арналған қойма, сондай-ақ одан әрі тексеру кезінде Алматы облысының Іргелі кентінде астыртын цех анықталды. Сараптама қорытындысына сәйкес, тәркіленген дәрілік препараттардың жалпы құны 250 млн теңгеден асады", – деп жазылған ҚР Қаржылық мониторинг агенттігі таратқан хабарламада.
Сот үкімімен үш айыпталушы ҚР ҚК 262-бабы 1-бөлігі (ұйымдасқан топты, қылмыстық ұйымды құру және оған басшылық ету, оларға қатысу), ҚР ҚК 323-бабы 3-бөлігі (жалған дәрілік заттармен, медициналық мақсаттағы бұйымдармен немесе медициналық техникамен жұмыс істеу) бойынша кінәлі деп танылды. "Оларға 5,6 жылдан 7,6 жылға дейінгі мерзімге бас бостандығынан айыру жазасы тағайындалды", – деп жазылған хабарламада.
Құралай Құдайберген
