Британдық BBC World телекомпаниясы көрсетіп жатқан деректі фильм "Шығыс пен Батыс түйіскен тұс" деп аталады. Онда Шығыс пен Батыс және Солтүстік – Оңтүстік бағдарларының түйіскен тұсында әлемдік деңгейдегі ірі дистрибуциялық орталықтың дамуы көрсетілген. Бұл туралы "Қазақстан темір жолы" ҰК" АҚ баспасөз қызметі хабарлайды.
Фильмнің продюсері Д. Уэльстің айтуынша, "бұрын Қорғаста құм жалдары қыста қар жалдарына айналатын. Қазір міне иен даладан алып Құрғақ порт бой көтерді. Қазақстан мен Қытай шекарасында орналасқан Құрғақ порт Азия мен Еуропаға шығатын транзиттік пойыздарды өңдеуден өткізеді", - дейді продюсер.
Деректі фильмді түсіру тобы Нұркент селосының жергілікті тұрғындарының тағдыры туралы қызықты материал әзірлеген. Деректі фильмде "Қорғас" ХШЫО ерекше орын алады. Бұл жоба Қазақстан мен Қытай Мемлекет басшыларының бастамашылығымен жүзеге асырылуда. Негізгі инвестициялық нысандардың құрылысын 2018 жылы аяқтау жоспарланып отыр. Фильм "ВВС Worldwide" бағдарламасы арқылы сегіз тілде беріліп, аптасына әлемнің 74 миллион көрерменін қамтитын болады. Қазақстандық телекөрермендері деректі фильмді 27 мамырда тамашалайтын болады.
