Қарағанды облысы ТЖД басшысы Ибрагим Күлшімбаев Төтенше жағдайлардың алдын алу және жою жөніндегі комиссия отырысында су тасқынының алдын алу мен дайындық барысы туралы есеп берді, деп жазады aikyn.kz.
Бүгінгі таңда тек 16 елді мекенде инженерлік қауіпсіздік үшін 22,1 шақырым бөгет қойылған. Құтқарушының мәліметіне сүйенсек, су тасқыны қаупі бар елді мекендерде құлақтандыру жүйелері толығымен орнатылмаған. Мәселен, 110 елді мекеннің тек 47-iнде жергілікті хабарландыру жүйелері бар.
"Облыстың гидротехникалық құрылыстарының жағдайы ерекше алаңдатып отыр. Аймақ бойынша 228 су шаруашылығы тіркеуде тұр, – деді И.Күлшімбаев.
Ағымдағы жылдың қыркүйек айынан бастап аймақтағы барлық су нысандары жан-жақты тексерілуде.
Облыстағы 64 гидротехникалық құрылыс, атап айтқанда, Абай ауданында 16 су нысаны, Бұқар жырау ауданында 27 су нысаны, Шет ауданында 12 су нысаны, ал Жаңаарқа, Қаражал, Осакаров аудандарында сәйкесінше 1, 2, 6 су нысандары тексерістен өтті. Солардың ішінде 16 су қоймасы әбден ескірген дейді басшы.
Нұрмұхамбет Әбдібеков қала және аудан әкімдеріне, АҚ және ТЖ жөніндегі облыстық қызмет басшыларына, басқару органдары мен азаматтық қорғаныс күштеріне төтенше жағдайлардың алдын алу жүйелерін дайындауға қатысты нақты тапсырмалар берді.
Сонымен қатар қалалар мен аудан әкімдеріне, табиғи ресурстар мен табиғатты пайдалануды реттеу басқармасына, өзге де мүдделі мемлекеттік органдарға гидротехникалық нысандарда су бөгендері мен қоймаларын алдағы су тасқынына дайындау жүктелді.
