Бұл өңірдің азық-түлік қауіпсіздігін нығайтуға және ет өнімдерінің экспортын арттыруға мүмкіндік береді. Бұл туралы облыс әкімінің баспасөз қызметі хабарлады.
Облыс орталығында салынып жатқан комбинат вакуумдық қаптамада жылына 5 мың тонна терең өңделген ет өндіруге, сондай-ақ 25 адамды жұмысқа орналастыруға мүмкіндік береді. Бұдан басқа, осы жобаны іске асыру ауыл шаруашылығы айналымына шамамен 9 млн.гектар жайылымдық жерлерді айналымға қосуға және мыңдаған ауыл тұрғыны үшін тұрақты жұмыс орындарының ашылуына өз септігін тигізеді.
Ет комбинатының негізгі инвесторы – "Сыр маржаны" серіктестігі, нысан жыл соңына дейін аяқталады деп жоспарлануда.
Былтырдың өзінде облыстан экспортқа Өзбекстан, Иран, Біріккен Араб Әмірлігіне және Ресейге 10,4 мың бас қой, 100 бас ірі қара, 366 бас тірі түйе жіберілді, бұны етке айналдырсақ, 300 тонна ет болады.
Соңғы жылдары облыстың ауыл шаруашылығы кешені бойынша экспортталатын өнімдер 3-тен 15-ке дейін артты. Ал 2018 жылдың қорытындысы бойынша экспорттың 97% - өңделген өнімнің үлесіне тиесілі.
Сонымен қатар, аймақта 2022 жылға дейін Агрокарта әзірленіп, оның шеңберінде 2021 жылға қарай ауыл шаруашылығы өнімдерінің (ет, күріш, балық және бақша өнімдері) экспортын 5 есеге ұлғайту көзделген. Алдағы 3 жылда ауыл шаруашылығы кешенін дамыту бойынша 76 жобаны іске асыру жоспарлануда. Бұл өз кезегінде 500 астам жаңа жұмыс орнын ашуға мүмкіндік береді.
