Ресми ақпарға сәйкес, қазір бөлінген қаражат бойынша 6 776 жеке қосалқы үй шаруа қожалықтарына – 813 млн теңге, ал 733 шаруа қожалығына 435 млн теңге берілген.
"Бұл – Ауылшаруашылығы министрлігінің базасына тіркелген малға берілген қаражат. Ал тіркелмегендерді тіркеу үшін "Жасыл дәліз 2" деген бағдарлама аштық. Сол арқылы тіркейтін болса, қалған 700 млн теңгені беруге дайынбыз", – деді Ноғаев.
Әкім ұсынған ақпарға сенетін болсақ, облыс бойынша қыс мезгілінен өту үшін – 77 мың тонна шөп және 53 мың тонна жем қажет. Жыл басынан бастап бүгінгі күнге дейін тасымалданып дайындалған шөптің мөлшері – 70 мың тонна, ал жем – 41 мың тонна.
"Өңірде қалыптасқан ауа-райының қолайсыздығына байланысты төрт түлікті жем-шөппен қамту мәселесі туындады. Осы орайда, өзге облыстардан көмек ретінде келген 3 800 тонна шөп және 200 тонна жем облыстың шаруа қожалықтарына тегін таратылды. Жергілікті бюджеттен 2,1 млрд теңге жем-шөптің мәселесін шешуге бағытталды. Бүгінге 14 900 тонна шөп және 9 900 тонна жем сатып алу жұмыстары жүргізілуде", – дейді Ноғаев.
