Қазақстанда молекулярлы-генетикалық зертханалар 6 қалада ғана бар. Бұл туралы Мәжіліс депутаты Асхат Аймағамбетов айтты, деп хабарлайды inbusiness.kz сайты.
"Елімізде молекулярлы-генетикалық зертханалар тек 6 қалада бар. Республикада референс-онкогемотологиялық зертханалар жоқ. Науқастардың анализі шет мемлекеттерге жіберіледі. Осы зертханаларды өзімізде де ашуға болатын еді. Ол үшін арнайы кешенді жоспар жасалған еді. Астана қаласын қоспағанда, басқа өңірлерде орталықтандырылған дәрі-дәрмектерді ұлғайту кабинеттері қарастырылмаған", - деді Асхат Аймағамбетов.
Айтуынша, қатерлі ісік ауруына шалдыққан азаматтарды емдеуге бөлінетін қаржының 20 пайызға қысқаруы өте ауыр тиеді.
"Қазіргі таңда онкологиямен ауыратын науқастар химиялық-терапиялық емдеуден бөлек, қымбат терапиялар алады. Мысалы, сүт безі қатерлі ісігінде таргетті химия-терапия алу үшін хаттама бойынша "Кадсила" препараты қолданылады. Оның бағасы басқа шығындарды есептемегенде, бір ем курсы үшін 1 млн 924 мың теңге тұрады. Бұрынғы тариф бойынша 1 млн 810 мың теңге болған. Сондағысы 140 мың теңгеге төмен. Енді хирургиялық әдіспен бұл тәсілдерді алып тастағанда, ем қабылдау курсы 500 мың теңге болады", - деді депутат.
Айта кету керек, осыған дейін Асхат Аймағамбетов МӘМС-те жоқ азаматтарды онкологиялық скринингпен қамтуды ұсынғанын жазған болатынбыз. Жыл сайын онкологиялық аурулардан 13 мың қазақстандық қайтыс болады.
