DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 324,92 Brent 36,55
«Люкс» сегментінің туристері үшін Алматы инфрақұрылымы дайын емес

«Люкс» сегментінің туристері үшін Алматы инфрақұрылымы дайын емес

Қазақстандағы туризмнің және жекелеген бизнестің дамуына кедергі келтіретін жайттар жайлы abctv.kz тілшілеріне The Ritz-Carlton Almaty сату және маркетинг бөлімінің директоры Екатерина Сова айтып берді.    

11 Қазан 2016 15:35 13336

«Люкс» сегментінің туристері үшін Алматы инфрақұрылымы дайын емес

Автор:

Светлана Умыргалеева

- Екатерина, соңғы жылдары шетелдік туристердің Орталық Азияға деген, оның ішінде Қазақстанға қызығушылығы артып келеді. Қалай ойлайсыз, бұл неге байланысты?

- Біріншіден, Қазақстан  Жібек жолының бір тармағы ретінде өте қызық. Сондықтан шетелдік туристер біздің елді Қытай, Үнді елі, Өзбекстанмен қатар қарастырады. Екіншіден, Қазақстанның табиғаты да керемет қой, Шарын, Түрген, Қайыңды – қайсысын алсаң да.

Жақында мотоциклмен саяхатқа шыққан туристер Шарын шатқалына барып қайтты. Мұндай ерекше саяхатшылар ерекше әсер алуға ұмтылады, экстрим-саяхат бағыты, әуе шарымен ұшу, парашют, рафтинг, тау шаңғысы – оларға керегі де осы. Қазақстан осындай саяхатқа өте ыңғайлы.

Алдағы екі жылда Универсиада, ЭКСПО-ға байланысты шетелдік туристер саны еселене түседі. Бұған Алматы-Теһран тікелей әуе рейстерінің ашылуы мен визалық режимнің жеңілдетілуі де ықпал етеді. Мәселен, биылдан бастап қытайлық туристер үшін ADS-виза іске қосылды.

- Алматы өңірінде туристер қандай қиындықтарға жиі жолығады?

- Виза алу туристерге айтарлықтай қиын. Бұдан бөлек, меніңше, бүгінгі күні Қазақстанда елде саяхат жасауға жайлы «жағдай» жоқ. Мысалы, екі жыл бұрын мен Шарын шатқалында болдым. Сенсеңіз, ол кезде түнеп шығатын жер таппадым. Ал енді шетелдік турист үшін бұл үлкен проблема ғой. Ол өзін не күтіп тұрғанынан бейхабар, қайда тоқтайтынын да білмей, қалай саяхатқа шықсын?! Бүгін көптеген туристік агенттік кірме туризмді дамытуға бет бұрды.

Дегенмен, туристік науқан үшін тек табиғаттың көркем жерлері жеткіліксіз екенін түсіну қажет, бізге инфрақұрылымды дамыту қажет, ол үшін мемлекеттің тиісті қолдауы қажет.

Одан бөлек Қазақстанға мықты жарнама жетіспейді. Көптеген турист біздің ел туралы ештеңе білмейді деуге болады. Бұл аса қынжытарлық жайт.

- Кейбір курорттағы жағдай шын мәнінде нашар. Бірақ Алматы, Астана сияқты ірі орталықтарда шетелдік туристерге қонақ үй индустриясы қай деңгейде қызмет көрсетеді? Оладың қызметі шетелдік туристердің көңілінен шықпай ма?

- Әрине, саяхатшылардың барлық санатына арналған қонақ үйлер бар. Студенттер тұратын хостелдерден бастап, The Ritz-Carlton Almaty  сияқты бесжұлдызды қонақ үйді қоса алғанда, барлық деңгейдегі қонақ үйлерге дейін. Қазақстанның жекелеген бизнесі саны бойынша да, сапасы бойынша да талаптарға сай келеді деп есептеймін.

Бірақ келешекте, егер туристер саны күрт өсетін болса, жаңа мейманханалар керек болады. Талғампаз туристердің сұранысына сай Courtyard by Marriott сияқты «төртжұлдызды» жақсы мейманханалар салу қажет. Бұл ретте Қазақстанда әлемдік қонақ үй желілері пайда болады деп ойлаймын. Ол үшін елге басқа санаттағы туристерді тарту керек - көлікпен саяхат жасап, хостелдерде тұратын емес, өз рақаты үшін саяхат жасайтын адамды. 

«Люкс» сегментінің туристері үшін Алматы инфрақұрылымы дайын емес деп ойлаймын. Өйткені, оларға біздің елмен «experience» тұрғысындағы ерекше танысу тәжірибесі, ерекше әсер керек болады.

Мәселен, сол Шарын шатқалына, Үлкен Алматы көліне жайлы жағдаймен саяхат жасау. Сапалы туристік өнім керек - әуежайдан ауа баптағышы бар жақсы көлікпен қарсы алу өз алдына, көліктің жүргізушісі ағылшын тілінде сөйлеуі шарт, гид (туристерге қызмет ететін жол көрсетуші маман) жақсы мейманханалар мен қаланың көрікті жерлерін, мұражайлар мен театрларды жақсы білуге тиіс.

- Алматыда мұндай деңгейде қызмет көрсетілмей ме сонда?

- Бар. Бірақ  «Люкс» санатындағы мейманханада тұратын адамға арналмаған. Оған  Эрмитаж, Лувр қажет. Өкінішке орай, жергілікті мемлекеттік мұражайлар соншалықты танымал, қызық емес. Біздің өңірде туристер тарихпен, тұрмыс-тіршілікпен, қазақ мәдениетімен етене танысуға мүмкіндік беретін этно-ауыл сияқты туристік өнім жетіспейді. Туристерге шынайы тұрмысты сезінуге мүмкіндік беру керек, ал біздің мұражайлар мұндай мағлұмат бере алмайды.

- Сізді дұрыс түсінсем, Қазақстанға туристер легін арттыратын ЭКСПО-2017  «Люкс» санатындағы жаңа мейманханаларды ашуға себеп бола ала ма?

- Әлбетте, ЭКСПО байланыс орнататын алаң ретінде Үкімет делегацияларын, шенеуніктерді, кәсіпкерлер мен туристерді тартады. Бұл тиісті қонақ үйлер керек дегенді білдіреді. Қазір Kempinski салынып жатқанын білемін. 2017 жылғы наурызда Астанада The Ritz-Carlton ашылады. Тағы The St.Regis ашу жоспарланып отыр.

Астанада 2017 жылы келетін қонақтар санының көп болуына байланысты тағы бірнеше жаңа қонақ үй ашылады деп ойлаймын. Меніңше, Қазақстан осы мүмкіндікті барынша ұтымды пайдалануы тиіс. Бізде елімізді әлемнің туристік картасына енгізуге барлық мүмкіндік бар.

Бірақ, қайталап айтамын, елдің ішінде туристік өнімді жасау үшін, оны Қазақстаннан тыс жарнамалау үшін мемлекеттік қолдау қажет. Қазақстанды туристік нарықта алға бастыру керек, ол үшін destination PR and marketing жасай отырып, көрмелерге барып, атсалысу қажет. Туроператорлармен бірге туризм комитеті де барлығы бірге, бір бағытта нақты қадам жасау керек.

- Мүмкін осы қозғалыстың бір тармағы ретінде бизнес-туристерге арналған арнайы туристік пакеттер әзірлеуді белгілеу керек шығар?

- Қазақстанда бұл санаттағы адамдар үшін турпакеттердің толып жатқан нұсқалары бар. Мәселен, «Алматы және оның төңірегі», «Алматы – төңірек  – Астана», «Батыс Қазақстан», «Қазақстан – Қырғыз елі», «Қазақстан – Өзбекстан», бұларды туристік операторлар қалыптастырады.

Біз, өз кезегімізде, мейманхана ретінде, олармен өзара қарым-қатынас жасаймыз, мейманханада тұру мен қызмет көрсетудің түрлерін ұсынамыз. Бірақ, толық әрі қызықты пакетпен туроператорлар айналысуға тиіс.

- Егер құпия болмаса, TheRitz-Carlton Almaty қонақ үйіне туристер негізінен қай елдерден келеді?

- Алматы бизнес-бағыттаушы болып табылады. Біздің қалаға адамдар  іссапармен және іскерлік сапармен, келісім-шарт жасасуға, кеңес беруге, құрылыс салуға келеді. Сондықтан меймандар негізінен Ресейден, АҚШ, Ұлыбритания, Германиядан келеді.

Светлана Умыргалеева, Алматы 
 

Тегтер:

inbusiness.kz-ті қараңыз, оқыңыз :

Бас санитарлық дәрігердің қаулысы туризмнің дамуына кедергі болуы мүмкін

1 турист 10 адамды жұмыспен қамтиды.  

13 Мамыр 2020 18:49 1130

Бас санитарлық дәрігердің қаулысы  туризмнің дамуына кедергі болуы мүмкін

Әлемдегі коронавирустық пандемия бірінші кезекте туризм саласына кері әсер еткені сөзсіз. Қазақстанда індет жұқтырудың алғашқы жағдайлары наурыз айында тіркелгенімен, туризм саласындағы көрсеткіштер 2019 жылдың желтоқсанынан бастап төмендей бастаған. Шет мемлекетке сапарлау немесе сырттан туристер шақыру да әзірге мүмкін емес.

Бар үміт – ішкі туризмде

Қазақстан туристік қауымдастығының директоры Рашида Шайкенованың пікірінше тур компаниялар мен операторлардың биылғы маусымдағы жалғыз үміті – ішкі туризм. Алайда оны дамытуға Бас мемлекеттік санитарлық дәрігердің 10 мамырда қабылдаған жаңа қаулысы кедергі болуы мүмкін.  

«Биыл бізде екі бағыт бар. Алакөл мен шипажайларға сұраныс артады деп отырмыз. Алайда ішкі туризмді дамытуға 10 мамырда қабылданған Бас мемлекеттік санитарлық дәрігердің қаулысы кедергі болып отыр. Оның 9-шы бөлімінде туристерден коронавирустық инфекцияға талдау тапсырып, оның теріс нәтижесін растайтын анықтама талап етіледі. Ол 7 күнге беріледі. Демалушылардың басым бөлігі саяхатқа 7 күннен ұзақ уақытқа шығатыны анық. Ал анықтаманың жарамдылық мерзімі өткен соң қайта құжат алу шараларын кім ұйымдастырады? Бұл мәселе қалай шешіледі? Мұның тетіктерін қауымдастық өкілдерімен ақылдасу қажет», – дейді  Рашида Шайкенова.

Маркетингке көңіл бөлу керек

«SkyWay Travel» ЖШС директоры Әсем Қозбағарова 1 турист 10 адамды жұмыспен қамтитынын айтады. Сондықтан ол дағдарыс кезінде маркетингке көңіл бөліп, тұтынушыларды баурап алуға тырысу керек, деп есептейді.

«Туризм саласын ішкі жалпы өнімнің 8%-ын қамтитындай деңгейге жеткізуді мақсат етеміз. Ол үшін арнайы маркетингтік стратегия жасауды ұсынамыз. Бұл мемлекеттік бренд қалыптастырудан басталады. Қазақстанның туристік аймақтарын таныту басты назарда болуы тиіс. Ерте ме, кеш пе туризм қайта жанданады. Сол уақытқа дейін саяхашыларға Қазақстан турлы айту маңызды. Ол үшін көрмелерге қатысып, түрлі шаралар ұйымдастыру қажет. Тек биылғы маусымды емес, алдағы жылдарды ойлауға тиіспіз. Әрине, табиғат, ғимараттар барлығында бар. Қазақстанның ерекшеліктерін анықтап, туристік тартымдылықты арттыра білген абзал», – деген компания басшысы туристік нысандар салудың маңызы туралы айтты.

«Саяхатшыларды  магнитше   тартатын өте ерекше бір-екі нысан керек. Мәселен, Дубайдағы Бурдж Халифа сынды. Біз белгілі бір нысанды жетілдіре аламыз немесе жаңа нысан салуға болады», – дейді Әсем Қозбағарова.

Визасыз режим

Қазіргі кезде елімізде бірқатар мемлекеттерден келетін туристерге 72 сағаттық визасыз режим тоқтатылған. Әлемнің 50-ден астам мемлекетінен келетін саяхатшыларға виза алу міндеттелді. «Outfitter KZ» ЖШС директоры Азамат Мұхаметжановтың топшылауынша визасыз режимді тоқтатудың орнына, карантин уақытында ғана шектеулер енгізу керек еді. Себебі тур компания басшысы консулдық алымның өзі жолдаманың қымбаттауына алып келетінін айтады. 

«2017 жылы ЭКСПО көрмесі ұйымдастырылды. Сол уақытта виза беру бойынша түрлі жеңілдіктер қарастырылған. Мұндай соңғы өзгерістер өткен жылдың соңында болған. Алайда коронавирустық инфекция тарай бастағаннан кейін бұл жеңілдіктер тоқтатылды. Яғни қазір 4 жыл бұрынғы жағдайға қайта оралдық. Біздің елімізде консулдық алым 60 доллар тұрады. Бұл саяхат құнына әсер етеді. Мәселен, Еуропадан Қазақстанға келген саяхатшы ұшақ билетін қоспағанда 7 күнге 600-700 доллар төлейді. Демек консулдық алым саяхат құнының 10%-ын құрайды. Бұл өте көп», – дейді ол.

Сондықтан тур компания басшысы саяхатшылар бағаның қымбаттығы үшін көрші бәсекелес елдерге кетіп қалуы мүмкін деген пікірде.

«Бізге бәсекелес Монғолия, Өзбекстан сынды көрші елдер мұндай шара қабылдаған жоқ. Виза бойынша жеңілдіктер сол қалпы қалды. Оларда визасыз режим сақталды. Тек карантин уақытына шектеулер қойылған», – дейді компания басшысы.

Қазақстанда алдағы айларда туристік маусым басталады. Өкініштісі елімізде мұндай кезең өте қысқа. Алакөлде 1,5 ай, Бурабайда 2 ай, Алматы облысында 6 айға созылады. Сондықтан туристік қауымдастық өкілдері қаулы мен визасыз режим бойынша жеңілдіктер қарастырылуы қажет деп есептейді.

Құралай Құдайберген

2 млрд 700 млн теңгенің туристік жолдамасы кері қайтарылады

Еліміздің 4 мың азаматы туристік сапардан бас тартты. 

20 Наурыз 2020 11:51 3905

2 млрд 700 млн теңгенің туристік жолдамасы кері қайтарылады

COVID-19 пандемиясы әлем экономикасына қырғидай тиіп жатыр. Шығынға белшесінен батқан салалардың қақ ортасында туризм тұр.

Bloomberg агенттігі биыл жаһандық туризм индустриясы 1 трлн 7 млрд доллар жоғалтатынын жариялады. Ал туризм және әлемдік саяхат кеңесінің атқарушы директоры Глория Гевара саяхат және туризм секторындағы

50 млн адамға жұмыссыз қалу қаупі төніп тұрғанын мәлімдеді.

«2020 жылы әлем бойынша саяхатшылардың саны 25%-ға азайып, жұмыс орындары 12-14%-ға қысқаруы мүмкін. Бұл – 50 млн адам табыссыз қалады деген сөз», – деді Глория Гевара.

Коронавирустың кесірі отандық туризмге де ауыр тиді. Қазақстан туристер қауымдастығының директоры Рашида Шайкенованың сөзінше, туризм саласында жұмыс істейтін 80 мыңнан астам қазақстандық тығырыққа тірелді. Туристік агенттіктер қаржы тапшылығын сезіне бастады.

«Туристер биылғы саяхаттарына алдын-ала төлеп қойған ақшаларын қайтаруды талап етіп жатыр. Алдағы уақытта туристік агенттіктер қызметкерлеріне жалақы төлеу мәселесімен бетпе-бет келуі мүмкін», – деді Рашида Шайкенова.

Қазақстан туристер қауымдастығы директорының сөзінше, қоғамда сыртқы туризм тұралағанда, ішкі туризм дамиды деген түсінік бар. Бірақ дәл қазір бұлай болуы екіталай.

«Осы аптада Наурыз мейрамы басталады. Бұрын дәл осы уақытта ел азаматтары саяхатқа шығатын. Дәл қазір бұлай болмайды. Мұның зардабы тағы да туроператорларға тиеді», – деді Рашида Шайкенова.

Ел аумағына төтенше жағдай енгізіліп, шет мемлекетке шығуға шектеу қойылуына байланысты 5 526 адам алдын-ала жоспарланған туристік сапарларынан бас тартуға тиіс. Бұл туралы Мәдениет және спорт вице-министрі Өркен Бисақаев: «Дәл қазір отандық туризм индустриясы қиын жағдайды бастан кешіріп жатыр. Үкімет ел азаматтарының өмірі мен денсаулығына қауіп төндіріп, әрекетсіз, шара қолданбай отыра алмайды. Сондықтан 5 526 туристің шет мемлекетке шығуына шектеу қойылды. Олар 2 млрд 700 млн теңгенің туристік жолдамасын кері қайтарады. Бүгінге дейін еліміздің 4 мың азаматы туристік сапардан бас тартты. Туроператорлар туристерден алған ақшаларын толық көлемде қайтарып беруге тиіс», – деді Өркен Бисақаев.

Вице-министрдің мәлімдеуінше, туристік компаниялар үкіметке төтенше жағдай кезінде мемлекеттік қолдау көрсетуді сұрап, өтініш жолдаған.

«Бүгінгі таңда туризм саласына қолдау көрсетудің тиімді тәсілдері қарастырылып жатыр», – деді Өркен Бисақаев.

Оның дерегінше, қазіргі уақытта шет мемлекетте 4 556 қазақстандық турист жүр. Олардың 2 246-сы - Мысырда, 573-і - Біріккен Араб Әмірліктерінде, 466-сы - Таиландта, 244-і - Мальдив аралында, 216-сы -Үндістанда.  

Өркен Бисақаевтың айтуынша, қазір қазақстандық туристерді елге қайтару шарасы атқарылып жатыр.

«16 наурыз күні Шарм-эль-Шейх-Алматы бағытындағы әуе кемесімен елге 223 турист оралды»,  – деді вице-министр.

Айта кетейік 18 наурыз күні Гоа аралынан 235 қазақстандық турист жеткізілді. Бұл туралы денсаулық сақтау министрлігі ресми мәлімдеме жасады.

«Туризм және спорт комитеті «Туристік Қамқор» корпоративтік қорымен бірлесіп, шетелде жүрген туристерді елге қайтару туралы шешім қабылады. Отандастарымызды елге жеткізу үшін кезектен тыс 17 әуе рейсін ұйымдастыру жоспарланды. Алғашқы борт 17 наурызда Үндістанның Гоа аралына аттанып, 18 наурыз күні 235 туристі елге алып келді», – деп хабарлады денсаулық сақтау министрлігінің баспасөз қызметі.

Естеріңізге салайық, бұған дейін үкімет корновирус пандемиясының алдын алу үшін тұрақты халықаралық рейстерге тыйым салды.

Таяуда «Туристік Қамқор» корпоративтік қоры шет мемлекеттердегі қазақстандық туристерді елге жеткізу тәртібін түсіндірді.

«17 наурыздан бастап «Туристік Қамқор» корпоративтік қоры туристік коды бар азаматтарды елге қайтаруға кірісті. Алдағы 2 аптада SCAT, Air Astana авиатасымалдаушылары арқылы әлемнің 13 еліне 17 рейс жасалып, 4 мыңнан астам турист Қазақстанға қайтарылады. Елге оралу кезінде қиындыққа

тап болған туристер «Туристік Қамқор» корпоративтік қорының http://www.fondkamkor.kz  сайтына кіріп, «Туристерге шұғыл көмек» деген өтінімді толтырулары  немесе 8 (7172) - 27 - 91- 12 жедел желісі мен +7701 534 0580 WhatsApp номеріне  хабарласулары керек», – деп мәлімдеді  «Туристік Қамқор» корпоративтік қоры.

Абылай Бейбарыс

Тегтер:

inbusiness.kz-ті қараңыз, оқыңыз :

Жаңалықтарға жазылу: