DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 314,56 Brent 36,55
Американың тыйымы Huawei-ді 30 млрд доллар табыстан айырмақ

Американың тыйымы Huawei-ді 30 млрд доллар табыстан айырмақ

Қытайдың телекоммуникациялық алыбы АҚШ-тың тыйымы өзін млрдтаған доллар қаржыдан қағатынын алғаш рет мойындады.

18 Маусым 2019 12:08 2670

Американың тыйымы Huawei-ді 30 млрд доллар табыстан айырмақ

Автор:

Арыс Әділбекұлы

Қытайдың Huawei  компаниясының негізін қалаушы әрі оның президенті Рен Чжэнфэй дүйсенбі күні мәлімдеме жасап, АҚШ әкімшілігі салған тыйымның, анау айтқандай, өз фирмасына жеңіл емес, ауырлау тиетінін мойындады. Оның есебінше, Американың шектеуінен Huawei шамамен 30 млрд доллар жоғалтайын деп отыр. Бұған дейін Қытайдың телекоммуникациялық алыбының лауазымды өкілдері талай рет бұқаралық ақпарат құралдарына комментарийлер беріп, Huawei-дің ештеңеге алаңдамай жұмысын, әдетінше, жалғастырып жатқанын айтқан еді. Сондықтан, Реннің осы жолғы сөзі әлемдік медианы айтарлықтай таң қалдырды.

Америка Құрама Штаттары Huawei-ді ұлттық қауіпсіздікке зиянды деп «қара тізімге» енгізіп, оған америкалық компоненттерді сатуға тыйым салғаны белгілі. Алайда дүниежүзінің ең үлкен телекоммуникациялық жабдық жасаушысы және нөмірі екінші смартфон шығарушысы өз өнімдерінің өзге елдерге қатер төндіретінін үнемі жоққа шығарып келеді.

АҚШ-тың тыйымына байланысты Google мен Британияның чип жасаушы фирмасы - ARM қытайлық компаниямен байланысын шектеді немесе мүлде тоқтатып жатыр.

«Huawei АҚШ-тың соққысы осынша дүлей, осынша өтімді болады деп күтпеп еді. Сонымен қатар, Америка жан-жақтан шабуыл жасайды деп ойлаған жоқпыз. Қазір көптеген компоненттерді ала алмай отырмыз, халықаралық ұйымдардың ісіне қатысудан қалдық, талай университетпен тығыз жұмыс істеуге мүмкіндік болмай тұр, ал Құрама Штаттарда жасалған компоненттерді қолдануға рұқсат жоқ, тіпті сол компоненттерді пайдаланатын желілерге қосылудың өзі қиындап кетті», - деді Рен компанияның Шэньчжэндегі штаб-пәтерінде жасаған мәлімдемесінде.

Бұл сессияға АҚШ-тан екі технологиялық сарапшы - Джордж Гильдер мен Николас Негропонте де қатысты.

Дегенмен ашына сөйлей отырып, Рен өз компаниясының 2021 жылы бизнесін қайта жандандыратынына үміт білдірді.

Huawei былтыр 72,2 млрд юань немесе 104 млрд доллар пайда тапты. Ал, биыл және келесі жылы сол кіріс 100 млрд доллардың төңірегінде болмақ. Бірақ телекоммуникациялық компания осыған дейін 2019 жылғы табысы 125-130 млрд долларға жететіні туралы болжамын жариялаған еді.

Сауда соғысы

Трамп әкімшілігі Huawei-ге санкцияны АҚШ-Қытай сауда келіссөздері тығырыққа тірелгенде жариялап, ресми Бейжіңді негізгі технологиялық бизнесте өзін-өзі қамти алатын күшпіз деп мәлімдеуге мәжбүр етті.

Сонымен қатар, Huawei өзінің Hongmeng атты операциялық жүйесін іске қосатынын мәлімдеп отыр. Ол қазір сынақтан өтіп жатыр және қажет болған жағдайда, тоғыз айдың ішінде қолданысқа енгізілуі мүмкін. Өйткені Американың тыйымына байланысты Huawei гаджеттері Google-дің Android жүйесінің жаңартылған версияларынан ажыратылуға тиіс.

Дегенмен осы индустрияның ішінде жүргендер немесе инсайдерлер Қытайдың чип-жасаушылары Huawei мен өзге де ішкі технологиялық фирмалардың мұқтаждықтарын дереу өтей алатынына күмән келтіріп отыр.

Массачусетс Технологиялық Институтының Медиа зертханасының негізін қалаған Негропонтенің сөзінше, АҚШ-тың тыйымы – қателік болды.

«Біздің президент егер сауда келісімі жасалса, Huawei-ге қатысты әрекетін қайта қарайтынын көпшілік алдында айтқан еді. Сондықтан бұл жерде мәселе ұлттық қауіпсіздікте емес – басқа нәрседе», - дейді Негропонте.

Трамп әкімшілігінің сөзінше, Қытай Коммунистік партиясы Huawei-ді өзге елдерге барлау жасауға пайдаланып отыр. Сөйте тұра, Вашингтон бұл сөзіне әлі күнге дейін ешқандай дәлел келтірген жоқ. Рен болса, үкіметтен бұйрық келсе де, Huawei-дің билікпен өз қолданушылары туралы мәліметті бөліспейтінін атап өтті.

Не болса да, Huawei-дің смартфон саудасы белгісіздікке байланысты құлдырай бастады. Реннің есебінше, оның халықаралық нарыққа шығаратын телефондары 40 пайызға азайған. Ол бұл сауданың қанша уақытта кемігеніне тоқталған жоқ. Алайда оның баспасөз хатшысының мәлімдеуінше, Huawei-дің бизнесі өткен айда кері кеткен.

Жексенбі күні «Блумберг» агенттігі хабарлағандай, Huawei әлемдік нарыққа смартфон шығаруды 40-60 пайызға қысқартуға әзірленіп жатыр. Компания басшысының мәлімдеуінше, Американың шектеулері қаржылық жағдайға жағымсыз әсер етсе де, Huawei зерттеулер мен даму жобаларына шығынды азайтпайды және қызметкерлерінің санын жаппай қысқартуды жоспарлап отырған жоқ.

Америка бизнесі де дабыл қаға бастады

Америка бизнесі де Трамп әкімшілігінің Қытайға қарсы агрессивтік саясатына қатысты дабыл қағып отыр. Мұнда жүздеген компания, сауда топтары және жекелеген адамдар АҚШ-тың сауда өкілдігіне Қытайдан келетін 300 млрд доллардың тауарына тарифті 25 пайызға көтеруге қарсылық білдіріп хат жолдаған. Ол өнімдерге әзірге импорттық салық өскен жоқ. Айта кетсек, Құрама Штаттарда Қытай өнімдерін саудалау саласында сан мың адам жұмыс істейді. Егер сол тауарлар тариф кесірінен өтпей жатса, бұл сектордың күйі қандай болмақ? Сондықтан, тарифтің қарсыластары әкімшілікпен тіпті соттасуға бар.

Кейбір сарапшылардың ойынша, Құрама Штаттар Huawei-ді «қара тізімге» енгізе отырып, еуропалық одақтастарын сымсыз интернеттің жаңа толқыны -5G-ді орнатарда,  Huawei-дің жабдықтарын қолданудан бас тарттыруды көздеп отыр.

Маусымның 14-інде Huawei бүктелетін смартфонын осы айда емес, қыркүйекте шығаратынын хабарлады. Mate X деп аталатын жаңа гаджетті таныстыру рәсімі биыл ақпанда өткен еді. Алайда компания өкілдері оны нарыққа кешеуілдетіп жету жоспары Вашингтонның санкцияларымен байланысты емес дейді. Samsung компаниясы да «әлі жетілдіру қажет» деген себеппен Galaxy Fold деген «кітап тәрізді» смартфонын сатуды кейінге қалдырып отыр.

Арыс Әділбекұлы

inbusiness.kz-ті қараңыз, оқыңыз :

Қытайда 100 миллионнан астам адам карантинге қайта жабылды

Қауіпті инфекцияның жаңа ошағы Ресеймен шекаралас аймақтан табылып отыр.

19 Мамыр 2020 17:23 486

Қытайда 100 миллионнан астам адам карантинге қайта жабылды

Қытайдың солтүстік-шығысында 108 миллиондай адам қайтадан карантинге оралып жатыр. Себебі аймақта инфекция ошақтары тағы да табыла бастаған. Мұны мамырдың 18-інде «Блумберг» хабарлады. Америкалық агенттіктің дерегінше, бүкіл елде экономика қайта ашылып жатқанда, Цзилинь провинциясының қалаларында пойыздар мен автобустар тоқтап, мектептерде сабақ доғарылып, ондаған мың адам карантинге жабылды. Қатаң шектеу шаралары «эпидемия артта қалды» деп, арқаны кеңге салған халықтың көңілін су сепкендей басқан.

«Адамдар қайтадан сақтана бастады. Далада ойнайтын балалар да маска тағуға міндеттелді.  Дәрігерлер вирустан қорғайтын киімді қайта киді. Өкінішті. Себебі мұның бәрі қашан аяқталатынын білмейсің», – дейді Ляонинь провинциясының Шэньян қаласының тұрғыны Фань Пай «Блумбергке» берген сұхбатында.

Цзилинь провинциясының Шулан қаласының үкіметі WeChat әлеуметтік желісі арқылы мәлімдегендей, ол өз аймағында вирустың тарауын тоқтату үшін өте қатаң шара қолдануға әзір. Бұнда дауасы жоқ ауру табылған тұрғын үй кешендері жабылып, әр отбасынан бір адамға ғана ең қажетті тауарларды сатып алу үшін екі күнде бір мәрте үйден екі сағатқа шығуға уақыт берілмек.

Цзилинь қаласының өзінде де әлеуметтік алшақтау мен карантин күшейтіліп жатыр. Жалпы алғанда, ақпан-наурыз айларында - эпидемия өршіген шақта, Цзилинь провинциясында тек 127, Хубэйде 68 мың адамнан коронавирус табылды. Осындай айырмашылыққа қарамастан, бүкіл Қытайда карантиндік шектеулер бірдей күшейтілді.

Қазір Цзилиньде тура сол кездегідей ахуал. Тауар жеткізу компаниялары тоқтап, дәріханаларда лихорадкаға қарсы препараттарды сатуға тыйым салынған. Себебі бұл дәріні адамдар коронавирустың симптомын жасыру үшін ішуі мүмкін.

«Блумбергтің» өзге бір дерегінше, коронавирус жұқтыру оқиғалары тіркелмеген аудандарда да жергілікті халық қайта оралған карантинге өкпелі. 

«Жұрттың бәрінен қайта маза кетті. Бүкіл елдегі жағдай қалпына келіп жатқанда, Цзилинь провинциясы ең қатты зардап шеккен ауданға айналады деп еш ойламаппын»,– дейді Ван Юемей.

«Қытай өткен жылдың соңында Уханьда басталған эпидемияға тым кешігіп жауап берді», – деп әлемде үлкен сынға ұшырады. Сондай сындарға енді жол бермеу үшін президент Си Цзиньпин әкімшілігі солтүстік-шығыста коронавирустың тез тарауын тоқтатуға ерте қамданды деген болжам бар. Орталық үкіметтің Уханьдағы эпидемиямен күреске жауапты өкілі – вице-премьер Сунь Чунлань 13 мамырда Цзилиньге барды. Содан кейін Шулань қаласының жоғары лауазымды компартия өкілі өзге бес кадрмен бірге отставкаға жіберілген.

Кейбір бақылаушының ойынша, осы аптада Бейжіңде жыл сайын өтетін саяси кездесу басталады. Соның қарсаңында Қытайда инфекцияны тоқтатуға қысым күшейе түспек. Ол съезд наурызда ашылуы керек еді. Бірақ эпидемияға байланысты сессияны кейінге қалдыруға тура келді. Алқалы жиынға елдің түкпір-түкпірінен мыңдаған делегат жиналып, үкіметтің күн тәртібінде тұрған жоспарларын мақұлдауға тиіс және орталықтағы басшылық сол кездесу кезінде елде тұрақтылық пен тыныштық орнағанына мүдделі.

Жергілікті дәрігерлер эпидемияның жаңа ошағының қайдан пайда болғанын әзірге нақты білмейді. Дегенмен, болжамдарға қарағанда, қауіпті инфекцияны бұл аймаққа Ресейден оралғандар жеткізуі мүмкін. Айта кетсе, РФ бүгінде Еуропада COVID-19 эпидемиясы ең қатты өршіген елдердің бірі атанып отыр.

«Вирус жұқтыруы мүмкін шетелден оралғандарды карантин орталықтарына орналастыруға жауапты тұлғалар жақсы жұмыс істеуі керек. Өзге мемлекеттерден инфекция тасушылар мен жергілікті індет ошақтары эпидемияны тоқтату жолындағы күреске салмақты еселеп түсіріп отыр», –дейді Қытай Ұлттық денсаулық сақтау комиссиясының өкілі Ван Бинь жексенбі күні өткен брифингте.

Жаңа табылған індет ошақтары Қытайдың көп бөлігінің вирус алдында осалдығын ескертетіндей. Айта кетсек, бұл мемлекетте эпидемияның бірінші толқыны негізінен Хубэй провинциясымен шарпығаны белгілі.

«Қытайлықтардың көбі бүгінде COVID-19 инфекциясын жұқтыруға бейім. Себебі олардың иммунитеті бұл аурумен күреске жеткіліксіз. Еліміз үлкен проблемаға тап болып отыр. Біздегі жағдай өзге мемлекеттердегі ахуалдан жақсы емес», – дейді CNN телекомпаниясына берген сұқбатында Қытайдың бас эпидемиологы Чжун Наньшань.

Арыс Әділбекұлы

Мұрат Әуез: Қытайға жолдаған тұңғыш нота – есейген сыртқы саясаттың белгісі

Sohu.com сайты Қазақстан туралы мақаласын алып тастауға мәжбүр болды.  

15 Сәуір 2020 19:45 7820

Мұрат Әуез: Қытайға жолдаған тұңғыш нота – есейген сыртқы саясаттың белгісі

Өткен апта Қазақстан мен Қытай арасындағы сан қатпарлы қарым-қатынастың бір қырын ашқандай болды. Коронавируспен күресіп жатқан отанымызға көрші тараптан гуманитарлық көмекпен қоса медицина мамандары келген болатын. Осы тұста сол елдің Sohu.com сайтына 2019 жылдың желтоқсанында жарияланған «Қазақстан тәуелсіздік алғаннан кейін неге Қытайға оралмады» деген мақала қызу талқыға түсті. Бейнелеп айтсақ, оңтүстіктегі көршіміз бір қолымен бетімізге шапалақ ұрып тұрып,  екінші қолымен гуманитарлық көмек ұсынғандай еді бұл.

Көптен күткен қадам

Ол шапалақты қытай тіліне жүйрік, сондағы ақпараттық саясатты қалт жібермей қарап отыратын қырағы азаматтар бірінші болып қабылдады. Қоғам белсендісі Тұрсынхан Зәкенұлы, Смағұл Елубай, Серікжан Біләш, Қуандық Шамахайұлы, Құл-Керім Елемес бастаған зиялы қауым өкілдері өре түрегеліп, Сыртқы істер министрлігінен ұшқары мақалаға қатысты нота жолдауды талап етті. Абырой болғанда министрлік халық үніне құлақ асатын мемлекеттің органы ретінде ол талапты ескерусіз қалдырмады. Кеше біздің министрлікке Қытайдың Қазақстандағы төтенше және өкілетті елшісі шақыртылып, Қытайдағы Қазақстан елшісі сол елдің Сыртқы істер министрлігіне қарсылық нота тапсырды. Көп өтпей әлгі сайттағы атышулы мақала өшірілді.

Аталмыш материалды терең талдап мақала жазған Тұрсынхан Зәкенұлы министрліктің қарсылық нота жіберуін ерекше ықыласпен қабылдап, тәуелсіз Қазақстан тарихында Қытай тарабына жолданған тұңғыш нота деп атады. 

1992-1995 жылдары Қазақстанның Қытайдағы тұңғыш елшісі болып қызмет атқарған қытайтанушы Мұрат Әуез расымен де Қазақстан билігі бұған дейін Қытайға ешқандай нота жолдамағанын айтады. Inbusiness.kz тілшісіне берген сұхбатында экс-дипломат Қазақстан билігі тарапынан осындай шешімтал қадамды талай жыл күтіп келгенін жасырмады.

«Бұл енді баяғыдан айтылып келе жатқан мәселе еді. Тек қана мен емес, Қытай туралы аз да болса білері бар, елдің нағыз азаматтары шырылдап көтеріп жүрген мәселе ғой. Өкінішке қарай, біздің Сыртқы істер министрлігі оған көп мән бермей келген еді. Жалпы Қытайдың астарлы стратегиясын түсіну үшін ерекше бір көрегендіктің қажеті жоқ. Кімде-кім Қытайдың осы күнгі жағдайын, стратегиялық жоспарын зерттесе, әрине, ең жақын көршісіне осы саясатының салқыны тиетінін түсінеді. Әлемдегі ірі қалалардың бәрінде  China Town феноменінің болуы да Қытай саясатының бір қыры. Кезінде оны да деректерге сүйеніп айтқанбыз. Шетелде тұратын қытайлықтар, тіпті сол елдің азаматтығын алған этникалық қытайлар да өздерінің адами, азаматтық борышы ретінде «ұлы отандарына» жүйелі түрде қаржы жіберіп отырған. Жетпісінші жылдардан бастап Қытай экономикасының аяққа тұруына бұл үлкен септігін тигізді. Біздің олигархтардың, сыртта жүрген қазақтардың айырмашылығы  ондай көмек жібермейді. Осындай қолдауы тұрғанда Қытай өз бетінен таймайды. Біз оны жақсы білуіміз керек», – дейді шығыстанушы.

Оның ойынша, қытайлық сайттың Қазақстан туралы ғылыми негізі жоқ ұшқары мақала жариялауы – үлкен белгі.

«Мұндай тамыр басу тәсілдеріне тиісті деңгейде жауап қатпасақ, біткеніміз деуге болады. Оқулықтарына Балқашқа дейінгі аумақты Қытай жері ретінде енгізгені туралы айтылып жүр ғой. Сол ақпарат жалған емес. Шынымен солай енгізіп қойған. Оларда «батыс жер» деген ұғым бар. Еш уақытта сол «батыс жердің» қай тұстан аяқталатынын ашып айтпайды. Өйткені 1,5 миллиардтан астам халқын сыйғызу үлкен проблемаға айналып отыр. Ал өз жері картада үлкен болып көрінгенімен меңіреу таулар мен бедеу шөлдер көп. Адамның жайлы тұрмысына жарамды жері аз.  Өз басым Қазақстанның Қытайдағы елшісі болып тұрған кезде ресми түрде трансшекаралық өзендер проблемасын көтерген едік. Сонда Қазақстан Үкіметі ресми түрде жолдаған ең бірінші ұсыныс Іле мен Ертіс сияқты трансшекаралық өзендерді келісе отырып пайдалану мәселесі болды. 1992 жылы сол құжатты тапсырған едім. Содан бері ондаған жылдар өтті. Олар бізді мазақ қылғандай «Қытай бұл мәселені зерттеп жатыр» деген жауап беріп келеді», – деп қынжылады ғалым.

751 жылдың шындығы

 Мұрат Әуез Қазақстан билігінің бұл жолы жағдайға бірден назар аударып, тиісті шара қабылдауын есейген сыртқы саясаттың белгісі деп бағалап отыр.

«Бұл нота – бір-бірімізден сүйінші сұрауға болатын оқиға. Қаншама жыл үндемей келген қазақтың бірінші рет «Бұлай болмайды» деген ұстанымын танытқаны өте жақсы белгі. Әрине, бұл оңай болмайды. Бірақ тек осындай қадамдардан есейген сыртқы саясатымыз қалыптасады. Әйтпесе біздің сыртқы саясатымыз тәлтіректеген, бір көзі жұмулы сәби сияқты болатын. Осыдан бастап біз есейген ұлты, есейген сыртқы саясаты бар, өзінің болашағы туралы дұрыс ойлана білетін мемлекет екенімізді көрсете аламыз», – деген сарапшы «Бір белдеу – бір жол» сияқты стратегиялық жоба аясындағы әріптесі туралы осындай мақаланың жарық көруіне жол берген Қытай билігінің бұл әрекетін жай ғана жауапсыздық деп қарауға болмайтынын айтады.

«Қытай халықаралық сахнада өте тәжірибелі ойыншы. Керек болса, арамдығы да көп. Арамдық екен-ау деп өздері бас қатырмайды. Өйткені халқына кеңістік, жер керек. Арам саясатын іске қосқанда олардың өтірікке өтірік жамайтын әдеті бар. «Қытайға қосылуға талпынады» дегендері де сол. Қытайға нота жолдауға атсалысқан азаматтарға алғыс айтқым келеді. Бұл біз үшін жаңа дәстүр. Жалғасын тапсын. Сонда біз өзгелермен терезесі тең, есейген мемлекетке айналамыз», – дейді ол.

Сөзінің соңында Мұрат Әуез қазақ қоғамына сәлемін жолдады.

«Қазақ қоғамының есіне мына бір тарихи деректерді салғым келеді. 751 жыл біздің ресми тарихтың назарынан тыс қалып келеді. Қытайлардың  өздері де сегізінші ғасырдан бастап біздің аумақтан  кері ығысып, шегінгендерін айтып отыр. Ал енді біз Қытайдың өзі мойындаған 751 жылғы бабаларымыздың тарихи жеңісін болмағандай етіп, атаусыз қалдырып жүрміз. Біздің қазақтың шығыс саясатта ең биікке көтеріп, ерекше атап өтетін датасы осы 751 жыл болуы керек. Ол кезде біздің бабаларымыз арабтар және соғдиялықтармен бірігіп Талас өзенінің жағасында қытайларға ес жимайтындай етіп соққы берген. Ал таң дәуірінде түргеш бабаларымыз Қытайға ішкерілей кіріп, төрінен орын алған. Қытайлар оны жақсы біледі, ал біздікілер есіне алғысы келмейді», –  деді ғалым.

Есімжан Нақтыбайұлы

inbusiness.kz-ті қараңыз, оқыңыз :

Жаңалықтарға жазылу: