/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 384,89 Brent 36,55
Асхат Аймағамбетов Ерлан Сағадиевтің бір қатесін түзетуде

Асхат Аймағамбетов Ерлан Сағадиевтің бір қатесін түзетуде

«Өзін-өзі тану» пәніне енді жеке компания тірек болмайды.  

14:29 27 Тамыз 2019 1863

Асхат Аймағамбетов Ерлан Сағадиевтің бір қатесін түзетуде

Автор:

Жанат Ардақ

Айта кету керек, «Жекешелендірудің 2016–2020 жылдарға арналған кейбір мәселелері туралы» ел Үкіметінің 2015 жылғы 30 желтоқсандағы №1141 қаулысына орай «Бөбек» ұлттық ғылыми-практикалық, білім беру және сауықтыру орталығы» РМҚК жекешелендіруге жататын республикалық меншіктегі ұйымдардың тізбесіне енгізілген болатын.

Бұл орталықтың негізін 1995 жылы Елбасы Нұрсұлтан Назарбаев қалағаны мәлім. Содан бері «Бөбек» ҰҒПББСО «Өзін-өзі тану» пәнін Қазақстанның білім беру жүйесінің барлық сатылары үшін ғылыми- әдістемелік тұрғыда жан-жақты қамтамасыз ететін, сонымен қатар оның мектепке дейінгі, негізгі орта, сондай-ақ, техникалық және кәсіби білім беру деңгейлерінде жүзеге асырылуын қадағалап отырған жалғыз ұлттық орталық.

Бұған қоса, «Бөбек» рухани-адамгершілік білім беру аясында гуманитарлық-педагогикалық бағыттағы кадрларды қайта даярлау мен біліктіліктерін арттыру, балалар мен жастардың тұлғалық дамуына әлеуметтік-педагогикалық қолдау көрсету, гуманитарлық бағдарламаларды жүзеге асыру бойынша, сондай-ақ, Қазақстанның барлық аймақтарындағы аз қамтылған отбасынан шыққан балаларды сауықтыру бойынша жұмыстар атқарып, қаржы игеріп келеді.

Ерлан Сағадиев Білім және ғылым министрлігін басқарып тұрған тұста, 2016 жылғы 26 желтоқсанда «Бөбек» мемлекеттік кәсіпорын мәртебесінен айырылып, ЖШС болып қайта құрылды.

Бірақ оны жекешелендіру аяғына дейін жеткізілмеген екен.

Қазіргі Білім және ғылым министрі Асхат Аймағамбетовтің Үкімет басшысы атына жазған хатында айтылғандай, ол ЖШС тиісті түрде тіркеуден өтпепті.

«Азаматтық кодекстің 42-бабына сәйкес, заңды тұлға әділет органында тіркеуге жатады және мемлекеттiк тiркеуден өткен кезден бастап құрылды деп саналады. Сонымен бірге, «Бөбек» ұлттық ғылыми-практикалық, білім беру және сауықтыру орталығы» ЖШС әділет органында тіркеуден өтпеуіне байланысты құрылмай қалды. Осыған байланысты «Білім және ғылым министрлігінің «Бөбек» ұлттық ғылыми-практикалық, білім беру және сауықтыру орталығы» республикалық мемлекеттік қазыналық кәсіпорнын қайта ұйымдастыру туралы» Қазақстан Үкіметінің 2016 жылғы 26 желтоқсандағы №851 қаулысының күшін жою туралы қаулы жобасы қарастырылып отыр», – дейді БҒМ басшысы.

Оның үстіне ел Үкіметінің 2019 жылғы 4 мамырдағы №252 қаулысына сәйкес «Бөбек» ұлттық ғылыми-практикалық, білім беру және сауықтыру орталығы» ЖШС «Басым тәртіппен жекешелендіруге жататын республикалық меншіктегі ірі ұйымдардың» тізбесінен алынып тасталды.

Осылайша, Үкімет «Бөбектің» мүлік кешенін мемлекеттік меншікте сақтап қалуға ұйғарды. Әйтпесе, сарапшылардың айтуынша, мектептерде, колледждерде және басқасында «Өзін-өзі пәнін» өткізу үшін мемлекетке жеке компанияға бюджеттен қомақты ақы төлеп тұруға тура келмек.

Сөйтіп, «Бөбек» министрліктің құшағына қайта оралып отыр.

Жанат Ардақ

БҒМ «Елбасытану» пәнін енгізуден бас тартты

Қазіргі оқытып жатқанымыз да жеткілікті дейді ведомство.  

04 Шілде 2020 13:08 820

БҒМ «Елбасытану» пәнін енгізуден бас тартты

Зиялы қауым өкілдері, түрлі қайраткерлер мектептерде, жоғарғы оқу орындарында Қазақстанның Тұңғыш Президентінің өмір мектебін, еңбек жолын, тағылымдарын, елге сіңірген еңбегін зерделейтін жеке пән не курс енгізуді көптен бері ұсынып келеді.

Елбасының 80 жасқа толу мерейтойы қарсаңында белгілі тарихшы, «Nur Otan» партиясының мүшесі, партияның Атырау облыстық филиалы жанындағы «Саясаттанушылар» орталығының мүшесі Ерлан Баймағамбетов осы идеяны жан-жақты негіздеп, білім және ғылым министрі Асхат Аймағамбетовке хат жолдады. Ол БҒМ басшысынан Тұңғыш Президент Нұрсұлтан Әбішұлының құрметіне «Елбасытануды» мектептердің 9 сынып оқушыларына факультативтік пән ретінде оқытуды сұрады.

Пәннің мақсаты – біріншіден, білім алушыларға патриоттық тәрбие беру; екіншіден, оқушыларды көшбасшылық қасиетке үйрету, үшіншіден, білім алушыларға Елбасы өмірі, қызметі мен тарихы және оның қазіргі қоғамдағы рөлі жөнінде жүйелі мәлімет беру, төртіншіден, Елбасының қазақ халқына жасаған еңбектерінің мәнін түсіндіру; бесіншіден, үлкенді құрметтеуге, толеранттылыққа баулу болуға тиіс көрінеді. Әрине, сондай-ақ шәкірттер Елбасының ғылыми еңбектерін оқып, зерттеуі керек. Бұл ретте «Қазіргі Қазақстан және Елбасы» тақырыбы аясында тіпті қазіргі Президент Қасым-Жомарт Тоқаевқа да көңіл бөлінбек.

Оқу жүктемесінің мынадай көлемі ұсынылады: 9-сыныпта – аптасына 1 сағат, оқу жылында – 34 сағат.

«9-сыныптың соңында білім алушылар біріншіден, Елбасының негізгі еңбектерін; екіншіден, Н.Назарбаевтың саяси қызметтерін; үшіншіден, оның стратегиялық бастамалары мен тарихи сөздерін; төртіншіден, ғылыми еңбектерінің ерекшеліктерін; бесіншіден, Елбасының салиқалы саясатын; алтыншыдан, қазақ тарихындағы есімі алтын әріппен қалған Елбасын; жетіншіден, Қазақстан пен әлем елдері арасындағы өзара қатынасын; сегізіншіден, оның елдегі және халықаралық деңгейдегі шынайы ұлттық құндылықтардың үстемдігі мен тұтастықты сақтау жөніндегі саясатын білуге тиіс», – дейді ұсыныс авторы.

Бұдан бөлек, егер идея қабылданса, бүкіл Қазақстан бойынша оқушылар «Елі сүйген, елін сүйген Елбасы» шағын ой-толғау жазуға, Н.Назарбаев аты берілген нысандар туралы презентация жасауға міндеттелмек. Ұсыныс арасында «Елбасының дәйексөздері мен нақыл сөздерін жаттау және келесі ұрпаққа айтып жүру», «Ұстаздардан, оқушылардан және өзге де тұлғалардан «Қауіпсіздік кеңесі және «Nur Otan» партиясы» туралы сұхбат алу», «ҚР Тұңғыш Президенті – Елбасы» заңын оқу», «Елбасы және Қасым-Жомарт Кемелұлы» атты фотосуреттер мен бейнефильм дайындау» деген идея да бар.

Білім ведомствосы сырғытпа жауаппен, сыпайы ғана оның бетін қайтарды. Білім және ғылым министрі өз жауабын ресми блогында жариялады.

«Жалпы білім беру ұйымдарында факультативтік курстар модельді оқу жоспарының вариативтік компоненті негізінде іске асырылады. Осыған орай, факультативтік курстар оқу жүктемесінің вариативтік компоненті есебінен берілетін болғандықтан оны білім алушылардың білімге деген қажеттіліктеріне сәйкес білім беру ұйымдары анықтайды. Тұңғыш Президент Н.Назарбаев тұлғасы мен атқарған қызметі негізгі және жалпы орта білім беру деңгейіндегі «Қазақстан тарихы» және «Дүниежүзі тарихы» пәндері мазмұнында қамтылған», – деді А.Аймағамбетов.

Оның мәліметінше, мектептердің «Қазақстан тарихы» пәнінің жаңартылған мазмұндағы үлгілік оқу бағдарламасы бойынша 5–7-сыныптарда 12 сағат көлемінде Елбасының «Болашаққа бағдар: рухани жаңғыру» мақаласындағы «Туған жер» бағдарламасын іске асыруға негізделген «Өлкетану» курсы оқытылады.

«Ал 9-сыныптың III–IV-тоқсандарында өткізілетін тақырыптар толығымен Тұңғыш Президент Н.Назарбаевтың атқарған қызметін, тұлғалық қасиетін, республиканы дамытудағы маңызды реформаларды, қабылданған құжаттарды талдауға арналады. Атап айтсақ, Қазақстан мемлекеттілігінің қайта жаңғыруы (1991–1996 жылдар) бөлімінде ел тәуелсіздігінің жариялануы, Қазақстанның Тұңғыш Президенті, тәуелсіздіктің алғашқы жылдарындағы мемлекеттілікті қалыптастырудағы іс-шаралар, Қазақстан – халықаралық құқық субеъектісі, тәуелсіздіктің алғашқы жылдарындағы Қазақстанның экономикалық дамуы, тәуелсіздіктің алғашқы жылдарындағы әлеуметтік-демографиялық процестер тақырыптары бар», – деді БҒМ жетекшісі.

Елбасыға қатысты басқа да жайттар толық қамтылған.

Осы тақырыптар негізінде оқушылардан онсыз да «тәуелсіз мемлекеттің қалыптасуындағы Елбасы рөліне баға беруі»; «ұзақ мерзімді мемлекеттік стратегияларды талдауы»; тіпті «Қазақстан халқы Ассамблеясының дінаралық, этносаралық келісім және ішкі тұрақтылықты нығайтудағы ықпалын бағалауы» және басқасы талап етіледі.

10–11-сыныптарда да оқушылар «Қазақстан тарихы» бойынша Елбасы еңбегін оқып біледі. Сынақтар тапсырады.

Білім және ғылым министрі сондай-ақ «Дүниежүзі тарихы» бойынша ХХ–ХХI ғасырлардағы көрнекті саясаткер-реформаторлар бөлімінде: «Н.Назарбаев және модернизацияның қазақстандық моделі» тақырыбы, мемлекет тарихындағы тұлғаның рөлі жайлы қорытындылар жасау; қазақстандық модернизация үлгісін құрастыру және жүзеге асырудағы Елбасы рөлін бағалау және басқасы барына назар аудартты. «Тарихтағы тұлғаның рөлі» бойынша зерттеу жұмысы қамтылған.

Жалпы, қандай да бір мектеп «Елбасытану» пәнін өз бетінше енгіземін десе, тосқауыл жоқ көрінеді.

Жанат Ардақ

 

Оқушылар онлайн оқуға дайын емес

Ұстаздар тележүргізуші ретіндегі жаңа рөлді меңгеріп жатыр.

28 Наурыз 2020 19:12 6093

Оқушылар онлайн оқуға дайын емес

Білім және ғылым министрі Асхат Аймағамбетов ел аумағына енгізілген төтенше жағдайға байланысты 6 сәуірден бастап мектеп оқушылары онлайн оқуға көшетінін мәлімдегеннен бері ұстаздар қауымы мен ата-аналардың шақшадай басы шарадай болды. Бұл мәселе оқушыларды ғана мазалап жатқан жоқ. Себебі олар қашықтықтан оқытудың қызығы мен шыжығын каникулдан кейін көретіндерін біліп отыр.

Қазір интернеті нашар ұстайтын немесе интернетсіз отырған шалғайдағы мектептердің оқушылары қалай оқиды, мұғалімдер мен оқушылар қашықтықтан оқыту платформаларымен жұмыс істеуді қаншалықты тез меңгереді, үйлерінде стационарлық компьютері немесе ноутбугы жоқ оқушылар смартфонмен білім ала ма, онлайн-платформалардың күші мыңдаған оқушыға бір мезгілде қызмет көрсетуге жете ме деген сұрақтар күн тәртібінде тұр.

Министр өзінің әлеуметтік парақшасында бұл туралы ашығын айтып, анығын жазды.

«Соңғы уақытта мектептерде оқу процесі қалай ұйымдастырылатыны туралы көптеген сұрақтар келіп түсуде, өйткені төртінші тоқсанның басталуына небәрі он күн қалды. Адамдардың бойында, әсіресе, осындай қиын кезеңде, жаңа әрі белгісіз нәрсеге деген қорқыныш сезімінің болуы – қалыпты жағдай. Форс-мажорлық жағдайда білім беру саласында болып жатқан процестер бізге тек пайдасын тигізеді деп сендіргім келеді. Біз сыни пікірлерді естіп те, көріп те отырмыз. Дегенмен қашықтықтан білім беруге көшу – коронавирустық инфекцияның таралуын азайтуға бағытталған шаралар аясында жүзеге асып жатқанын барлығы түсінгені жөн. Өкінішке қарай, басқа таңдау жоқ. Оқу процесі тоқтатылмуға тиіс. Біз осындай жағдайға тап болған басқа елдердің тәжірибесін алдын ала зерделедік. Іс жүзінде олардың барлығы қашықтықтан оқу режиміне көшкен. Бүкіл әлем бойынша 870 миллионнан астам оқушы осындай форматта білім алуда. Барлық мүмкіндіктерді, аспектілер мен тәуекелдерді жан-жақты ой елегінен өткізе отырып, біз де уақытша қашықтан оқытуға көшу туралы шешім қабылдадық», – деді Асхат Аймағамбетов.

Министр мәлімдегендей, қашықтықтан білім беру оңай шаруа емес. Дегенмен дәл қазіргі жағдайда технологиялық мүмкіндіктерді пайданалып, білім берудің жаңа үлгісіне көшу қажет.

«Теледидар арқылы сабақ өткізу бұл - тіптен жаңа формат. «Балапан» және «Ел Арна» телеарналары бізге өздерінің эфирлік уақытын ұсынды. Түсірілім жұмыстары басталып кетті. Негізгі пәндер бойынша 2000-нан астам бейнесабақ түсіру қажет. Мен кеше түсірілім жұмыстары жүргізіліп жатқан студияда болдым. Сценарий жазушылардан, режиссерлер мен педагогтерден тұратын жұмыс тобы әрбір шығарылымды мұқият пысықтауда. Біздің ұстаздар тележүргізуші ретіндегі мүлдем жаңа рөлді меңгеруде. Бейнесабақтар қазақ және орыс тілдерінде жазылуда. Бұл оңай іс емес екенін бірден айтқым келеді», – деді Асхат Аймағамбетов.

Министрдің сөзінше, интернет-провайдерлермен арнайы мамандандырылған интернет-платформаларды пайдаланған кезде трафик есептелмейтіндей келісім орнатылған. Көптеген ірі платформалар қызметтерін тегін ұсынған.

Google Classroom, Hangout, Kundelik.kz, Moodle жүйелері тегін қолдану мүмкіндігін берген. Сонымен қатар Bilimland платформасы 40 мыңнан астам контентін тегін пайдалануға келіскен.

«Арнайы мамандандырылған интернет-платформалары арқылы өткізілетін сабақтар. Бұл цифрлық жүйелер оқушыларға өткен сабақты немесе бұрын талқыланған тақырыпты қайта қарауға, сондай-ақ онлайн-сабақ өткізуге, кері байланыс орнатуға, жеке дара оқыту мен тапсырмаларды геймификациялауға зор мүмкіндік береді. Сонымен қатар бұл формат тестілеу жұмыстарын өткізуге және алған білімдерін бағалауға мүмкіндік жасайды. Бұрын мұндай компаниялардың білім беру контентіне қол жеткізу ақылы болса, осы кезеңде біздің балалар барлық керек ақпаратты және платформаларды тегін пайдалана алады. Тиісті келісімге қол жеткіздік. Сондай-ақ біз интернет-провайдерлерімен осы ресурстарды пайдаланған кезде трафик есептелмейтіндей келісім орнаттық», – деді еліміздің бас ұстазы.

Асхат Аймағамбетовтің айтуынша, отандық білім беру жүйесі үшін қашықтықтан оқыту форматына көшу – үлкен сынақ. Алайда министрлік қол қусырып, қарап отырған жоқ. Ұстаздар мен оқушылардың цифрлық сауаттылығын арттыру үшін арнайы курстар өткізіліп, нұсқаулықтар әзірленіп жатыр.

«Біз қашықтықтан оқыту жүйесін ұстанған кезде басқа дамыған елдерде де орын алып жатқан кейбір қиындықтар туындауы мүмкін екенін жақсы түсінеміз. Бір отбасында бірнеше оқушы болған жағдайда бір компьютер мен бір смартфонды пайдалану ыңғайсыз болуы немесе қажетті техниканың мүлдем болмауы да мүмкін. Кейбіреулерде интернет байланысы да жоқ. Бұл мәселелер қазір ерекше бақылауда. Әкімдіктермен бірлесе отырып, мектептегі компьютерлерді оқушылар мен мұғалімдерге уақытша пайдалануға беру, тіпті, қажет болған жағдайда, мектептерге қосымша техника (планшет немесе компьютер) сатып алып, оларды да уақытша пайдалануға беру мәселелерін қарастырудамыз. Кейбір өңірлер бұл жұмысты бастап кетті», – деді министр.

Асхат Аймағамбетов эпидемиологиялық ахуалға қарай, шалғайдағы ауылдық елдімекендерде орналасқан шағын жинақты мектептерде (80-ге жуық бала оқитын) оқытуды дәстүрлі форматта жалғастыру мүмкіндігін қарастырылып жатқанын жазды.

«Тағы бір мәрте атап айтамын – тек қарастырудамыз. Бұл мәселе бойынша түпкілікті шешім әлі қабылданған жоқ. Мәселе каникул аяқталғанша шешіледі. Ал әзірше олар да қашықтан оқытуға белсенді дайындалуда», – деді министр.

Ол жаңа режимде жұмыс істеу педагогтер үшін де, балалар үшін де оңай болмайтынын тілге тиек етіп, бастапқы кезеңде ата-аналар мен педагогтер тарапынан айтылатын сынды қабылдауға дайын екендіктерін жеткізді.

«Ата-аналар, педагогтер мен оқушылар арасындағы пікірталасты мұқият қадағалап отырамыз және қашықтықтан оқытудың қолжетімділігін арттыратын тиімді шараларды қабылдауға дайынбыз. Қандай да бір проблема туындаса, сіз әрқашан білім және ғылым министрлігіне хабарласа аласыз. Біз проблемаңызды шешуге көмектесуге тырысамыз», – деді Асхат Аймағамбетов.

Абылай Бейбарыс