/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 376,04 Brent 36,55
Экология министрлігі 100,1 млрд теңгені игермеген

Экология министрлігі 100,1 млрд теңгені игермеген

Әлихан Смайылов бюджетті дұрыс игермеген басшыларды жауапқа тартуды сұрады.  

11:29 12 Қараша 2019 5638

Экология министрлігі 100,1 млрд теңгені игермеген

Автор:

Есімжан Нақтыбайұлы

Үкімет отырысында Премьер-Министрдің бірінші орынбасары-Қаржы министрі Әлихан Смайылов бюджетті уақтылы игере алмаған органдардың басшыларын жауапқа тартуды сұрады.

«Республикалық бюджеттің шығыстары 9,5 трлн теңгені немесе 99,2%-ды құрады. 79 млрд теңге орындалған жоқ. Оның ішінде үнемдеуге 11 млрд теңге жатады. 68 млрд теңге игерілмеген. Экология, геология және табиғи ресурстар министрлігі 100,1 млрд теңге, Білім және ғылым министрлігі 9,3 млрд теңге, Индустрия және инновациялық даму министрлігі 7,8 млрд теңге, Мәдениет және спорт министрлігі 6,1 млрд теңге, Цифрлық даму, инновациялар және аэроғарыш өнеркәсібі министрлігі 5,1 млрд теңге игермеген», – деген Үкімет өкілі жергілікті бюджетті жарытып игермеген облыстарды да атады. 

«Жергілікті бюджетті ең көп игермеу мынадай өңірлерде қалыптасты. Нұр-Сұлтан қаласы 6,1 млрд теңге, Алматы қаласы 4,9 млрд теңге, Түркістан облысы 3,4 млрд теңге, Батыс Қазақстан облысы 2,9 млрд теңге игермеген.  Бюджеттің үш рет нақтыланып, 2 рет түзетілгеніне қарамастан, орталық мемлекеттік органдар мен  жергілікті әкімдіктер 10 айдың қорытындысы бойынша қомақты мөлшерде бюджет қаражатын игермеген. Сол себепті, Асқар Ұзақбайұлы, бюджет қаражатының игерілмеуіне себеп болғаны үшін жоғарыда айтылған орталық және жергілікті  мемлекеттік органдардың тиісті  бағдарламалар жетекшілерін жауапқа тартуды сұраймын. Жақында ғана Парламент бюджеттік заңнамаға тиісті түзетулерді қабылдады. Ол түзетулер бюджеттік қаражатты тиімсіз жоспарлау мен пайдалануда жауапкершілікті күшейтуге бағытталған. Осы бұзушылықтарға енді әкімшілік жауапкершілік көзделген. Бұл ретте әкімшілік жауапкершілікке бюджеттік бағдарламалардың жетекшілері ғана емес,  орталық және жергілікті мемлекеттік органдардың бірінші басшылары да тартылатын болады. Бұл түзету 2020 жылдың бірінші қаңтарынан бастап заңдық күшіне енеді», – деді Әлихан Смайылов.

Есімжан Нақтыбайұлы

Шымкент қазынасы 6 миллиардтан астам теңгеден қағылды

Биылғы жылға арналған бюджеттің атқарылуы барысында республикалық бюджеттен үшінші мегаполиске бөлінген қаражаттың 6458,2 млн теңгесі ақтауға келмейтін себептермен қысқартуға ұсынылған. 

16 Қыркүйек 2019 17:26 5195

Шымкент қазынасы 6 миллиардтан астам теңгеден қағылды

Оның ішінде, 5052 млн теңге көлеміндегі қаражат бюджет әкімшісі болып табылатын басқармалар тарапынан мемлекеттік сатып алу конкурстарын мерзімінен шектен тыс кеш өткізуі салдарынан қысқартылған.

Шымкент қаласы әкімдігінің салалық басқармаларында бюджеттік тәртіп талаптарының орындалмауы салдарынан бірқатар жобалардың іске асырылу мерзімі кейінге шегерілмек екен. Нақтырақ айтқанда, басқарма басшыларының өздеріне жүктелген міндеттерді дұрыс атқармауы, қаржылық жоспарлауды талапқа сай жүргізбеуі, қала әкімінің салалық орынбасары тарапынан тиісті бақылаудың болмағандығы салдарынан мемлекеттік сатып алу конкурстары жыл ортасына дейін созылған.

«Жұмыстың тиімді бағыттары белгіленбеуі, салалық басқарма тарапынан қолға алынған жобалардың қадағалаудың жоқтығынан жүйелі іске асырылмауы, шаһардың солтүстік-батыс бөлігіне жүргізілуі тиіс инженерлік-инфрақұрылымдарды дамыту жобасына қаралған барлығы 1 116,9 млн теңгенің 522 млн теңгесі қысқартуға жолданған. Оған басты себеп – 16 кредитті тұрғын үйдің құрылысын 2020 жылы аяқтау жоспарланған. Яғни, бюджеттік жоспар жыл басында дұрыс түзілмеген», – деп хабарлайды Шымкент қаласы әкімдігі.

Өкінішке қарай, кері қайтарылуға тиіс республикалық қаражат ішінде Шымкент қаласының білім саласы бойынша 2410,1 млн  теңге қысқартуға ұсынылған. Оның да басты себебі – мемлекеттік сатып алу конкурстарының мерзімінен кеш өтуі. Салалық басқарманың салғырттығынан қаладағы №23 мектеп қосымша ғимаратсыз қалса, «Асар-2» шағынауданының тұрғындары 1200 орындық жаңа мектептен қағылды. Бұл жобаларды жүзеге асыру мерзімдері кейінге шегерілмекші.

Бүгінде үшінші мегаполисте мектеп жетіспеушілігі мәселесі өзекті екені баршаға аян. Жуырда ғана  №80 жалпы орта мектептен шыққан шу соның айғағы десе болады. Ал, қалалық білім басқармасы басшысының міндетін атқарушы Айгүл Текебаеваның айтуынша, шаһардағы 19 мектептің балалары үш ауысымда оқиды.  Үш мектеп қосымша ғимараттарды жалға алады екен. Яғни, жауаптылардың салғырттығынан бұл мәселе жуырда шешіле қоймайтын секілді.

 Арай Есенбек

Қай министрлік қанша миллиардты игере алмай отыр?

Министрлер мен олардың орынбасарлары үйіп-төгіп уәде берді. 

10 Қыркүйек 2019 15:54 5755

Қай министрлік қанша миллиардты игере алмай отыр?

Үкімет басшысы Асқар Мамин бюджет қаражатын тиісінше жұмсай алмаған  министрліктер мен әкімдіктерге қатысты шара қабылданатынын мәлімдеді.

Асқар Маминнің айтуынша, ішкі істер министрлігі 9 млрд теңгені игермеген.

Министр Ерлан Тұрғымбаев өзі басқарып отырған мекеме қолда бар қаржыны неге игере алмай отырғанын түсіндірді. Оның сөзінше, министрлік мемлекеттік сатып алулар комитеті ұйымдастырған арнайы техникаларды жеткізуге қатысты конкурсқа қатысқан. 39 автосаты мен 40 автоцистерна сатып алуға 3,5 млрд теңге бөлінген. Бұлардың барлығы Семей автомобиль құрастыру зауытынын шығарылады екен. Мәселе орындаушының жеткізу мерзімін кешіктіруі салдарынан туған көрінеді. 

«3,5 млрд теңгеге қатысты мәселе 1 қазанға дейін шешіледі. 2,6  млрд теңге әскери бөлімшелерге қатты-сұйық отын жеткізуге бөлінген. Отын жеткізу  Қазақстан бойынша жүріп жатыр. Қаражат қыркүйектің соңына дейін игеріледі», – деді министр.

Премьер-министрдің сөзінше, қорғаныс министрлігінің де бюджет қаражатын игеру көрсеткіші көңіл көншітпейді. Мұндағылар 10,3 млрд теңгеге ие бола алмай отыр.

Қорғаныс министрінің орынбасары Мүсілім Алтынбаев 9 айдың қорытындысында бюджет қаражатының 99%-ы игерілетініне уәде берді.

Белгілі болғандай, экология, геология  және табиғи ресурстар министрлігі де 10 млрд теңгені қайда жұмсарларын білмей отыр екен. Қорғаныс министрінің орынбасарынан қалсын ба, экология, геология  және табиғи ресурстар министрі Мағзұм Мырзағалиев үкімет басшысына берген жауабында: «Жыл соңына дейін қаржыны 100% игереміз», – деді.

Мәдениет және спорт министрлігі 6,7 млрд теңге игермеген екен. Осы турасында мәдениет және спорт вице-министрі Нұрқиса Дәуешов: «9 айдың қорытындысы бойынша игерілмеген 7 млрд 262 млн теңге қаражатты толық игереміз», – деді. Ал индустрия және инфрақұрылымдық даму министрі Роман Скляр игерілмей қалған 4,9 млрд теңге Арыстағы жарылыс салдарын жою актілерінің кеш тапсырылуынан пайда болды дегенді алға тартты.

Өз кезегінде Асқар Мамин жыл соңына дейін санаулы айлар қалғанын, мемлекеттік органдар мен өңір басшылары бюджет қаражатын дер кезінде игеруді ерекше назарға алуға тиіс екенні айтты.

«9 айдың қорытындысында бюджет қаражатын игермеген мемлекеттік органдар мен әкімдіктерге қатысты нақты шешім қабылданады», – деді үкімет басшысы.

Қанат Махамбет