/img/tv1.svg
RU KZ
Hang Seng 23 372,43 KASE 2 155,58
РТС 955,34 FTSE 100 5 510,33
DOW J 21 641,19 Өнеркәсібі 1 552,50
Карантин бизнес пен алматылықтарға қандай қиындық әкелді?

Карантин бизнес пен алматылықтарға қандай қиындық әкелді?

Індетке тосқауыл қойған блок-посттар өзге түйткілдерді туындатуда. 

24 Наурыз 2020 13:34 3821

Карантин бизнес пен алматылықтарға қандай қиындық әкелді?

Автор:

Жанат Ардақ

Әлеуметтік желіні пайдаланушылар Алматы әкімінің батыл әрі шешімді қимылына ризашылық білдіріп жатыр. Мәселен, коронавирус анықталған тұрғын үй кешендері мен аудандар оқшауланып, тұрғындарына сыртқа шығуына тыйым салынған. Нұр-Сұлтанда ондай батыл әрекеттер байқалмайды. Халық, соның ішінде балалар көшеде өріп жүр. 

Арнайы мемлекеттік комиссия өз шешімімен 19 наурыздан бастап қос мегаполисті бірдей карантинге жапқаны мәлім. Тиісінше, Алматы қаласы бірден қатаң шараларға кірісіп, шаһарға кіруге және сыртқа шығуға тосқауыл қойды. Ал елордадан халық 22 наурызға дейін өзге өңірлерге тарап жатты. Мысалы, көптеген ата-ана қауіпті аймақтан аулақтату үшін балаларын ауылдағы ата-әжелеріне апарып тастаған. Оның үстіне астанада карантин аумағына қала маңы ауылдары мен кенттері де енгізілді. Салдарынан, індеттің жайылу аумағы кеңейген.

Осы орайда сарапшылар шектеу шаралары босаңдау болғандықтан және кештеу енгізілгендіктен Нұр-Сұлтан қаласында карантиннің қандай түйткілдер әкелгенін бағамдау әзірге ерте екеніне назар аудартады. Сондықтан оны Алматы мысалында көруге болатындай.

Мегаполисте Алматы облысынан жарты миллион (500 мыңдай) адам қатынап жұмыс істейтіні анықталды. Олардың барлығы қазіргі кезде жұмыс орнынан тыс қалған.

«Біздің кәсіпорын жұмыскерлерінің 90 пайызы қала маңында тұрады. Біразы уақытша демалысқа шығарылды. Бірақ өз еркімен жұмысын жалғастырғандары үйлеріне оралса, блок-пост сыртында қалатын болды. Сондықтан біз қаптатып матрас сатып алдық. Бүгінде олар кәсіпорын ғимараты ішінде жерде, матраста ұйықтауға мәжбүр. Карантин жойылғанша, осылай жұмыс істейді», – дейді компания жетекшісі Василий Стоянов.

Қалаға кіруге тыйым салынуы көптеген компаниялардың бас ауруына айналды. Мысалы, еліміздегі темірбетон бұйымдарын және көпір конструкцияларын шығаратын аса ірі зауыт «LCI-MK» күйзеліске кезіккен екен. Бұл өзге өңірлерге де кесірін тигізуі ықтимал.

«Біз келісімшарт бойынша Қазақстанның көптеген стратегиялық маңызды нысандарына өнім жеткізуге тиіспіз. Олардың арасында «Мерке–Бурылбайтал», «Үшарал–Достық», «Қалбатау–Майқапшағай», «Талдықорған–Қалбатау–Өскемен», «Қарабұтақ–Рудный–Қостанай» және басқа да республикалық маңызды автожолдар бар. Зауытымыз қала маңына жақын аймақта, қаланың Түрксіб ауданында орналасқан. 373 жұмысшының 250-і – қаламаңы тұрғыны. Өндірісті тоқтату жеткізілімдер бойынша келісімшарттардың бұзылуына соқтырады. Бұл зауытты орасан зор шығынға отырғызады, айыппұл санкцияларына, келісімшарттардың жойылуына, сондай-ақ стратегиялық маңызды құрылыстардың дағдаруына ұшыратпақ. Демек, жұмысшыларды жалақысын сақтаусыз таратуға тура келеді. Бұған жол бермеу үшін қаламаңы аймақтарының және Алматы облысының тұрғындары саналатын жұмысшыларымызға арнайы өткізу рұқсат қағазын беруді сұраймыз», – дейді кәсіпорын бас директоры М.Раушанов. 

Әйткенмен, қала әкімі Бақытжан Сағынтаев шаһарға өзгелердің кіруіне ешқандай рұқсат қағаз берілмейтінін кесіп айтты.

«Қала ішінде көліктің және адамдардың қозғалысы шектелмейді. Ал Алматыға кіруге және одан шығуға жол берілмейді. Соның ішінде қалада жұмыс істейтін қаламаңы және облыс тұрғындарының Алматыға кіріп-шығуына тыйым салынған. Жекелеген адамдарға қалаға кіруіне мүмкіндік беретіндей ешқандай арнайы рұқсат қағаздар жоқ. Тек бірінші кезекте қажетті тауарларды, азық-түліктерді, дәрі-дәрмек, медициналық өнімдер, қорғаныш пен гигиена заттарын әкелетіндер үшін «жасыл дәліз» орнатылды», – дейді әкім Бақытжан Сағынтаев.

Қос мегаполисте енгізілген карантиннің мерзімі шектелмеген, яғни оның қашан аяқталатыны белгісіз. Осыған байланысты бірқатар сарапшылар карантин тым ұзаққа созылса, қала ішінде мародерлік әрекеттер, тонау-қарақшылық қылмыстары белең алуы мүмкін екенін ескертуде. Демек, қалалар ішінде қауіпсіздік шараларын күшейту қажет.

«Біз күзет фирмасымыз. Карантин енгізілсе де, жұмысымызды тоқтата алмаймыз. Өйткені мектептер, балабақшалар, шіркеу және басқа да әлеуметтік нысандардың қауіпсіздігін қамтамасыз етеміз. Бірақ фирма қызметкерлерінің үлкен бөлігі Алматы облысының тұрғындары», – деп қамығады «Мирас Секьюрити» жетекшісі.

Телевизиялық өнім өндірумен айналысатын «Той Думан» ЖШС да осы мәселеге маңдай соғыпты: оның қызметкерлерінің көбі Алматы облысында және қаламаңында тұрады. Олар уақытша қашықтан жұмыс істеуге көшірілген, әйтсе де жұмыстың мұндай тәртібін ұзақ уақыт бойы сақтау мүмкін емес көрінеді.

Алматылық Роман Никитин оғаш жағдайға тап болған. Ол қаламаңында жұмыс жасайды, алайда блокпост үйінің дәл іргесіне орнатылыпты. Енді оның жұмыс орны тоспаның ар жағында, 200 метр жерде қалған. Қолсозым жердегі жұмысына бара алмайды.

Иван Петенков Шымкенттен Алматыға көшуге ұйғарады. Содан карантин қарсаңында әйелі Натальяны және қызы Маргаританы алып, барлық жүктерін жүк көлігіне тиеп, Алатау жаққа аттанған.

«Алматы карантинге жабылды. Достық даңғылындағы жаңа баспанасы қызым Наталья атына тіркелген, яғни ол толыққанды қала тұрғыны. Немерем де осындағы мектепке тіркелді. Шымкенттегі тұрақты тіркеуден шықты. Алайда Audi жеке көлігімен де, заттары артылған Газеллмен де Алматыға кіре алмай тұр. Кері қайтайын десе, Шымкентте тұратын жері жоқ. Карантин мерзімі аяқтағанша өзге жерде өмір сүруге қаражаттары жетпейді. Баспанаға жұмсаған», – дейді Наталья Сапрыкина. Ол да әкімдіктен туғанына Алматыға кіруіне рұқсат сұрайды.

Ал қала тұрғыны Қали Жалын қала билігінен тосын шақыру алыпты.

«18 наурызда Алматының Наурызбай ауданының военкоматы қоңыраулатты: ұлымның кезекті медициналық тексеруден өтуге дереу келуін талап етті. Ұлым – колледж студенті. Колледж барлық шәкірттерді қашықтан оқуға ауыстырды. Яғни, үйден шықпайды. Карантин уақытында жігіттерді шұғыл жинаудың қаншалықты қажеті бар? Оның үстіне колледжде оқыса. Осыны түсіндірейін деп 1308, 1406 нөмірлеріне қоңырау шалсам, үнемі бос болмай шығады», – дейді ол.

Қаладағы блок-посттарда патрульдік полиция полктары, СОБР арнайы жасақтары, «Гранит» полктары, Қорғаныс министрлігінің бөлімшелері, Ұлттық ұлан жұмылдырылған екен. Осы арқылы жаһанды жайлаған індеттің қалада таралу тізбегін бұзып, тоқтату міндеті қойылған. Алматыда үй карантині және тұрғындардың өз бетінше оқшаулануы тетіктері де қолданылуда. Егер Алматы COVID-19 пандемиясын тез жеңсе, шаһар үлгісі өзге өңірлерге өнеге болуы мүмкін.

Жанат Ардақ

inbusiness.kz-ті қараңыз, оқыңыз :

Қайтыс болған әйелдің өлімі неге 12 сағаттан соң мәлімделді?

Таңғы 8 шамасында қайтқан адам туралы ақпарат кешкі 20 шамасында жарияланды.  

27 Наурыз 2020 18:44 1934

Қайтыс болған әйелдің өлімі неге 12 сағаттан соң мәлімделді?

Күні кеше коронавируспен күресіп жатқан дәрігерлерді дәріптеп, жер-көкке сиғызбай мақтаған, тіпті көпқабатты үйлердің балкондарына шығып, шапалақпен құрмет көрсеткен жұрт, бүгін ақ жейделі жандардың барлығын сыпыра сыбап, жаппай жазғырып жатыр. Алғыс пен қарғыстың тайталасына Ақмола облысының Қосшы ауылындағы 64 жастағы әйелдің Нұр-Сұлтан қаласындағы №2 облыстық көпсалалы ауруханада бақиға аттануы мен марқұмның айналасында көзі тірі кезінде өрбіген оқиғалар себеп болып отырғаны айтпаса да түсінікті. 

Әлеуметтік желі арқылы таралған видеода марқұмның ұлы 22 наурыз күні жедел жәрдеммен келген медицина қызметкерлері ем қабылдау қажеттігін айтып, науқасты үйінде қалдырып кеткенін, 23 наурыз күні таңертең науқас емханаға барғанын, дәрігер цефазолин егіп, ингаляция жасау қажеттігін айтқанын, тиісті ем-дом қабылдағанына қарамастан науқастың дене қызуы екі күн түспегенін баяндайды.

Оның сөзінше, науқастың жүрегі қысылғандықтан екінші рет жедел жәрдем шақырылған. Медицина қызметкерлері науқастың жүрегін тексеріп, барлығы дұрыс екенін, оның өлмейтінін айтқан. Бес сағаттан соң науқастың жағдай тіпті нашарлаған соң, үшінші рет жедел жәрдем шақырылған. 25 наурыз күні таңғы сағат 6-да жедел жәрдем науқасты ауруханаға алып кеткен. Науқас 26- наурыз күні таңғы сағат 8 шамасында ауруханада қайтыс болған. Осы жерде түсініксіз жағдай туындайды. Дәл осы күні Нұр-Сұлтан қаласы қоғамдық денсаулық сақтау басқармасының басшысы Сәуле Қисықова коронавирус пандемиясына қатысты 26 наурыз сағат 18:00-дегі жағдай бойынша мәлімдеме жасады. Бірақ ол адам өлімі туралы ләм-лим деп жақ ашқан жоқ. Есеп берді де, мәселені жылы жауып қойды. Екі сағаттан соң ақпарат және қоғамдық даму министрі Дәурен Абаев елімізде коронавирус инфекциясынан әйел адам қайтыс болғанын мәлімдеп, марқұмның жақындарына көңіл айтты.

Сонда бұған дейінгі 12 сағатта денсаулық сақтау, ақпарат министрліктері мен Нұр-Сұлтан қаласы қоғамдық денсаулық сақтау басқармасы адам өлімінен бейхабар болған ба? Әлде Нұр-Сұлтан қаласы қоғамдық денсаулық сақтау басқармасының басшысына адам өлімі туралы мәлімдеме жасау құзыреті берілмеген бе? Бірден айтайық, бұл жерде ешкім «тырнақ астынан кір» іздейін деп отырған жоқ.  Тек 12 сағаттан соң жасалған мәлімдеменің жай-жапсары мен ақ-қарасы ғана анықталып отыр.

Тағы бір түсініксіз жайт марқұмның ұлының видеодағы сөзінен туып отыр. Ол былай дейді: «Бүгін таңертең, дәрігер маған қағаздарды берген кезде  анамның коронавируспен ауырмағанын айтып, «шешеңіз пневмониядан қайтыс болды, коронавирус сынамасының қорытындысы – теріс нәтиже көрсетті» деп қорытынды шығарып берді. Абылайхан көшесіндегі мәйітханадан шешемнің денесін алып кеттім. Сол күні сағат 17.00-де  хабарласып, шешемнің өліміне коронавирус себеп болғанын айтты».

Дәрігерлер неге екі сөйледі. Алғашқы қорытындыларын не үшін өзгертті? Бұл сұрақтың жауабы түсініксіз, жұмбақ күйінде қалатын тәрізді. Дегенмен Ақмола облыстық денсаулық сақтау басқармасының басшысы Сүлен Ілиясов науқас екіжақты пневмониядан қайтыс болғанын, екіжақты пневмонияның асқынуына коронавирус инфекциясы түрткі болғанын айтты

Мақала сайтқа жарияланғанға дейін ақпарат және қоғамдық даму министрі Дәурен Абаев жоғарыдағы сұрақтарға тікелей эфир арқылы ішінара  жауап берді. Ол марқұмның неден қайтыс болғанын анықтауға көп уақыт кеткенін, соған байланысты мәлімдеме кеш жасалғанын жеткізді.

Қанат Махамбет

Коронавирус: әлем бойынша 27 наурыздағы соңғы жаңалықтар

Жалпы, вирус жұқтырғандардың саны 530 мыңнан асса, 24 мыңнан астам адам көз жұмды. 

27 Наурыз 2020 16:08 781

Коронавирус: әлем бойынша 27 наурыздағы соңғы жаңалықтар

G20 елдері індет салдарымен күреске 5 трлн доллар бөледі. Мұнай нарығындағы тұрақсыздық сақталуда, шикізатқа деген сұраныс кеміп барады. Жалпы, вирус жұқтырғандардың саны 530 мыңнан асса, 24 мыңнан астам адам көз жұмды.

Қаза тапқандар мен жұқтырғандар 

Қытайда осы күнге дейін вирусты 81 мың адам жұқтырған. Оның 3 мыңы қаза тапты . 74588 кісі аурудан айыққан. Басқа елдерде вирус жұқтырғандардың саны 450 мыңнан асқан. 

Қазақстандағы жағдай

Елімізде 2 адам аурудан айықты. 125 адамның коронавирус жұқтырғаны ресми түрде тіркелді. Науқастардың 48-і Алматыда, 61-і Нұр-Сұлтанда, 4-еуі Қарағандыда, 1-еуі Алматы облысында, тағы 1-еуі Ақтөбе облысында, 2-еуі Шымкентте, 1-еуі Солтүстік Қазақстан облысында, 3-еуі Жамбыл облысында, 1-еуі Павлодар облысында, 3-еуі Атырау облысында. 1 адам қаза тапты.16 наурыздан бастап Қазақстанда төтенше жағдай режимі жарияланды. Ол 15 сәуірге дейін жалғасады. Ал 19 наурыздан бастап осы екі қала карантинге жабылды.

Басқа елдердегі жағдай

АҚШ-тағы Вашингтон Университетінің зерттеушілері пандемия кесірінен алдағы төрт айда 81000 адам қайтыс болады және індеттің өршуі маусымда басылады деп топшылап отыр. Жалпы, елдегі науқастардың саны 85000-нан, қаза тапқандардыкі 1200-ден асты. Ел Сенаты пандемияға байланысты экономиканы ынталандыру мақсатында 2 трлн доллар бөлу туралы заң қабылдады. 

Ресейде вирус жұқтырғандардың саны 1036-ға жеткен. 29 кісі аурудан айыққан. 90 мыңдай тұрғын қазір дәрігерлердің бақылауында. Індеттің 58 өңірге таралып кеткен. Жергілікті билік халықаралық әуе қатынасын тоқтатып тастады.Тек шет елдердегі ресейліктердің елге қайтуына рұқсат етілді. Індет өршіп тұрған елдерден қайтарылатын олар коронавирусты анықтайтын тестен өтетін болды. 

Қырғызстанда науқастардың саны 58-ге жеткен. Осыған байланысты елде төтенше жағдай режимі енгізілді. 19 наурыздан бастап жергілікті билік шетелдіктердің елге кіруіне тыйым салды. 

Өзбекстандағы аурулардың саны 83-ке жетіп, 1 адам қаза тапты. Үкімет 16 наурыздан бастап 30 сәуірге дейін басқа елдермен арадағы көлік қатынасын тоқтатып тастады. 24 наурыздан бастап Ташкент, Бұхара, Андижан, Гүлістан, Наманган және Самарқанд қалаларында карантин жарияланды. 

Оңтүстік Кореяда ауруға шалдыққандардың саны 9332-ден асып, 144 кісі қаза тапқан. Бұл ел эпидемиологиялық қауіптің ең жоғарғы деңгейін жариялады. Әсіресе Тэгу қаласы мен Кенсан-Пукто провинциясының үш қаласы апат аймағы деп жарияланды. Алдағы 15 күнде тұрғындарға үйден шықпауға кеңес берілді. 

Италияда науқастардың саны 80539-дан асты, оның 8165-і қаза тапқан. Жергілікті биліктің мәліметінше, 6205-ке жуық медициналық қызметкер ауруға шалдыққан. Бұл елде карантин режимін бұзғандарға 400-3000 еуро көлемінде айыппұл салынмақ. 

Германияда аурулардың саны 42288-ге жетіп,оның шамамен 253-і ажал құшты. Індет әсіресе Бавария, Баден-Вюртембергеде көбірек тіркелген. Жапонияда вирусты жұқтырғандардың саны 1405-ке жетіп, 57 адам қайтыс болған. 

Еске сала кетсек, 11 наурызда Дүниежүзілік денсаулық сақтау ұйымы жаңа коронавирус індетін пандемия деп таныған болатын.G20 елдері індет салдарымен күреске 5 трл доллар бөледі. Ал Еуроодақ 140 млн еуро шығындамақ.

Табиғат Нұрболат

inbusiness.kz-ті қараңыз, оқыңыз :

Жаңалықтарға жазылу: