Қаңтар-сәуір аралығындағы экономикалық өсім 4,1%-ды құрады, деп хабарлайды статистика комитеті. Экономикалық өсімге түрткі болған ең алдымен инвестицияның артуы. Комитеттің мәліметінше, 2019 жылғы қаңтар-сәуірде негізгі капиталға салынған инвестициялар көлемі 2914,4 млрд. теңгені құрады, бұл 2018 жылғы қаңтар-сәуірге қарағанда 6,7%-ға артық.
Бұл жолы барлық сала "плюсте"
Жылдың алғашқы төрт айында құрылыс саласындағы өндіріс былтырғы жылдың төрт айдына қарағанда 8,4%-ға өсіп, 625,5 млрд теңгеге жеткен. Бұл өндірістің барлық салаларының ішіндегі ең жоғары көрсеткіш болса, екінші орында сауда. Республика бойынша сауданың көлемі қаңтар-сәуір аралығында 7,3%-ға өскені байқалады.
Соның ішінде бөлшек сауда көлемі 3 трлн 55,6 млрд теңгені құрап былтырғы осы уақыттағыдан 5,3%-ға ұлғайса, көтерме сауда көлемі 6 трлн 506,6 млрд теңгеге жетіп 8%-ға көбейді.
Ал сыртқы сауда айналымы 20 млрд 361 млн АҚШ долларын құрап, 2018 жылғы қаңтар-наурызбен салыстырғанда 3,7% азайып кеткен. Соның ішінде экспорт 13 млрд 313,8 млн АҚШ долларын құрап 4,3%-ға кемісе, импорт 2,7%-ға азайып 7 млрд 047,2 млн АҚШ долларына тең болды.
Өз кезегінде байланыс саласы төрт айда 5 пайыздық өсім көрсетіп отыр. Әдетте, "минуста" жүретін байланыс саласы үшін 2019 жыл айтарлықтай жемісті басталып отыр.
Сонымен қатар, көлік саласы бойынша нақты көлем индексі 104,8% құрады. Алғашқы төрт айдағы жүк айналымының көлемі 2018 жылғы қаңтар-сәуірмен салыстырғанда 1,9%-ға артты. Жолаушылар айналымының көлемі 4,1%-ға ұлғайды.
3-4 пайыз аралығынан таймайтын ауыл шаруашылығы да осы жолы тұрақты өсімінен айныған жоқ. Қаңтар-сәуір аралығында ауыл, орман және балық шаруашылығы - жалпы өнімінің көлемі 615,8 млрд теңгені құрап, 2018 жылғы қаңтар-сәуірдегі көрсеткіштен 3,6%-ға өсті.
"2019 жылғы қаңтар-сәуірде өнеркәсіп өндірісінің көлемі қолданыстағы бағаларда 9 трлн 294,4 млрд теңгені құрады, бұл 2018 жылғы қаңтар-сәуірге қарағанда 2,9%-ға артық. Кен өнеркәсібінде және карьерлерді қазуда өндіріс көлемі 2,6%, өңдеу өнеркәсібінде 3,5%, электрмен жабдықтау, газ, бу беру және ауа баптауда 0,2%, сумен жабдықтауда, кәріз жүйесі, қалдықтарды жинау және бөлуді бақылауда 12,7%-ға артты", деп хабарлайды статистика комитеті.
Әлеуметтік сектор
2019 жылғы наурызда халықтың орта есеппен жан басына шаққандағы атаулы ақшалай табыстары бағалау бойынша 98566 теңгені құрады, бұл 2018 жылғы наурызға қарағанда 15%-ға жоғары, нақты ақшалай табыс көрсетілген кезеңде 9,7%-ға (алдын ала деректер) артты.
"2019 жылғы сәуірде бір қызметкердің орташа айлық атаулы жалақысы бағалау бойынша 170 087 теңгені құрады",- деп жазады статистика комитеті.
2019 жылғы сәуірде жұмыссыздар саны бағалау бойынша 442,5 мың адамды құрады. Жұмыссыздық деңгейі жұмыс күші санымен салыстырғанда 4,8% болды. Жұмыспен қамту органдарында жұмыссыздар ретінде тіркелгендер саны 2019 жылғы сәуірдің соңына 160,7 мың адам болды немесе жұмыс күшімен салыстырғанда 1,8%.
Тұтыну бағасының индексі 2019 жылғы сәуірде 2018 жылғы желтоқсанмен салыстырғанда 101,8%-ды құрады. Азық-түлік тауарларына арналған бағалар – 4,8%-ға, азық-түлік емес тауарлар бағасы 1,3%-ға өсті, ал халыққа арналған ақылы көрсетілетін қызметтер бағасы 1,2%-ға төмендеді. Өнеркәсіп өнімдеріне өндіруші кәсіпорындар бағасы 2019 жылғы сәуірде 2018 жылғы желтоқсанмен салыстырғанда 2,4%-ға жоғарылады.
Бауыржан Мұқан
