/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 376,04 Brent 36,55
Лифт апатының алдын алу үшін

Лифт апатының алдын алу үшін

Қолданысқа ЕАЭО техникалық регламенті енгізіліп, ұлттық стандарт қабылданды.   

16:28 30 Қаңтар 2020 8314

Лифт апатының алдын алу үшін

Автор:

Абылай Бейбарыс

Индустрия және инфрақұрылымдық даму министрлігінің мәліметінше, елімізде 24 025 лифті жұмыс істеп тұр. Оның 1684-ін жөндеу, 4478-ін ауыстыру керек.

2018 жылы министрлік «Қазақстан лифтішілер одағы» қауымдастығымен бірге «Лифттер, эскалаторлар, траволаторлар және мүмкіндігі шектеулі адамдарға арналған көтергіштер» туралы ұлттық стандарт әзірлеп, оны

«Өнеркәсіптік қауіпсіздік мәселелері туралы» және «Тұрғын үй-коммуналдық шаруашылығы туралы» заңдар арқылы қолданысқа енгізді. Осылайша лифт өндіретін кәсіпорындар мен лифтілерге қызмет көрсететін компаниялар ортақ талапқа бағынатын және адамдардың қауіпсіздігіне жауап беретін болды. Бұған дейін еліміздің лифт шығаратын 6 кәсіпорыны Ресейден, Беларусьтен, Қытайдан дайын өнім тасып, оны орнатумен, ал жекеменшік компаниялар қауіпсіздік шараларын сақтамай, лифтілерге қызмет көрсетумен айналысты.

2012 жылы заңнамаға өзгеріс енгізіліп, лифтті монтаждауға, оған қызмет көрсетуге лицензия беру алынып тасталды. Сол-ақ екен пәтер иелері кооперативтері көңіліне жақын компаниялармен келісім жасап, біліктілігі төмен, қызмет ақысы арзан мамандардың көмегіне жүгіне бастады. Ал 2015 жылы лифтілер жергілікті атқарушы биліктің басқаруына берілді. Уақыт өте келе лифтілерде бірінен соң бірі апатты жағдай орын ала бастады. Мәселен 2016 жылы 9 тамызда Алматы қаласының «Ақсай» ықшам ауданындағы  9 қабатты үйлердің бірінде лифт үзіліп кетті. Жоғарыдан төмен құлдилаған лифт екінші қабатқа келіп тоқтады. Періштесі қағып, лифт ішіндегі кішкентай бала аман қалды. 2017 жылы 5 сәуірде елордадағы 

Garant Auto City сауда үйінің 38 жасар сантехнигі лифт апатынан көз жұмды. 13 сәуірде лифтіге мінген «Эдем Палас-2» тұрғын үй кешенінің 6 ересек, 2 кішкентай тұрғыны ажалдан аман қалды. 21 сәуірде «Эдем Палас-1» тұрғын үй кешенінің лифті үзіліп кетсе, 6 мамырда «Айя» тұрғын үй кешенінің лифті ішіндегі алты адаммен бірге тоғызыншы қабаттан бірінші қабатқа құлады. 2018 жылы 31 желтоқсанда «Тұмар» тұрғын үй кешенінің лифті үшінші қабаттан шахтаға үзіліп түсті. Ішінде болған 8 адам түрлі дене жарақатын алды. Дәл осы жылы Семейде, Алматыда бірнеше рет лифті апаты тіркеліп, ондаған адам зардап шекті. Ал 4 сәуірде Ақтөбеде тележүргізуші Айзат Әбдісамат лифті апатынан мерт болды.

Былтыр елімізде лифт қауіпсіздігі туралы ЕАЭО техникалық регламенті қолданысқа енді. Ол бізге не береді? Бұл туралы Қазақстанның стандарттау және сертификаттау институты бас директорының орынбасары Еркежан Әмірханова: «Лифт қауіпсіздігі туралы Еуразия экономикалық комиссиясының техникалық регламенті лифтіні дайындау мен монтаждау мәселелерін реттейді. Бұл регламенттің ЕАЭО-ның 5 мемлекетінде заңдық күші бар. Аталған техникалық регламентті жүзеге асыру үшін лифтті пайдалану және қызмет көрсету мәселелерін реттейтін ұлттық стандарт әзірленді», – деді.

Күні кеше тұрғын үйлердің бірінші, екінші қабаттарында тұратын тұрғындар лифт үшін ақша төлеуге тиіс екені мәлімдеді.  

«Олар да ақша төлейді. Себебі үйдің меншігі бар. Бөлу мүмкін емес. Егер төлемейді десек, бірінші қабаттан қасбетті бөліп алайық немесе шатыр мәселесі тек жоғары қабаттағылардың проблемасы дейік. Заңнамаға сәйкес, баспалдақ, қасбет, шатыр, инженерлік коммуникация және лифт үйге ортақ меншік. Сондықтан бірінші, екінші қабатта тұратын тұрғындарда лифт, яғни  ортақ мүлік үшін ақша төлеуге тиіс, – деді Қайырбек Өскенбаев

2020-2021 жылдар аралығында тұрғын үй қорын жаңғыртып, лифт шаруашылығын жаңартуға республикалық бюджеттен 30 млрд теңге бөлінеді. Бұған қоса «Тұрғын үй-коммуналдық шаруашылық туралы» заң бойынша көппәтерлі үйлердегі лифтілерді жөндеу мен ауыстыруды ұйымдастыру және қаржыландыруға жергілікті бюджет есебінен, қайтарымды негізде қаржыландыруға мүмкіндік беріледі.

Абылай Бейбарыс

Астаналықтардың ПИК-терге шағымы көбейген

Жыл басынан бері 17 852 өтініш пен шағым түскен. 

27 Тамыз 2019 10:14 1009

Астаналықтардың ПИК-терге шағымы көбейген

Елордалық әкімдікте әкімнің орынбасары Нұрлан Нүркеновтің төрағалығымен ПИК-тер мен лифт шаруашылықтары жұмысының проблемалы мәселелері бойынша жұмыс  тобының отырысы өтті. 

«Қатысушылар тұрғын үй кешендерінің тіршілігін қамтамасыз етуге қатысты іKOMEK109 қалалық орталығына келіп түсетін астаналықтардың өтініштері мен шағымдарын, олардың орындалу барысын талқылады», – деп хабарлайды Нұр-Сұлтан қаласы әкімдігінің сайты.

Жиын барысында іKOMEK109 орталығы басшысының орынбасары Дина Темірғалиева көппәтерлі тұрғын үйлердің тіршілігін қамтамасыз ету мәселелеріне қатысты өтініштер туралы хабардар етті.

Биылғы жылдың басынан бері 17 852 өтініш пен шағым, ал 13 тамыз бен 20 тамыз аралығында 454 өтініш-шағым келіп түсті, бұл өткен апталардағымен салыстырғанда 12,3%-ға  көп.

Өтініштердің көпшілігі сумен, жылумен, электрмен жабдықтау және санитарлық тазалауға қатысты болды.  Атап айтқанда, келіп түскен өтініштердің көп бөлігі «Тұрмыс» ЖШС, «Астана Жил Сервис» ПИК, «Целинный» ПИК, «Лакшери Консьерж Астана» ЖШС сияқты ПИК-терге қатысты болды.

Сонымен қатар 13 тамыз бен  20 тамыз аралығындағы кезеңде iKOMEK109 қалалық орталығына лифт ұйымдарының мәселелері бойынша 60 өтініш қабылданып, олардың 22-сі адамды эвакуациялау және лифтінің тоқтап қалуына қатысты болған. Барлық өтініштің жартысынан көбі қызмет көрсетуші компанияларға қатысты.

Билғы  жылдың басынан бері қала әкімдігі қаланың барлық лифтісін тексеруден өткізді. Осының нәтижесінде  78 лифтінің қанағаттанарлықсыз күйде екені, оның ішінде 2 лифтінің пайдалану мерзіміне байланысты тоқтап тұрғаны анықталды. 76 лифтіге жөндеу жұмыстары жүргізілді.  

Қалалық орта сапасы және бақылау басқармасы аудандық әкімдіктермен бірлесіп, электр қозғалтқыштарын, есік роликтерін жөндеу бойынша жұмыс жүргізіп, лифтіні тазалау және басқару блогын баптауды орындады. Қазіргі таңда 5 КПТҮ-нің  12 лифтісі ауыстырылды.

Сонымен қатар лифт ұйымдары қауымдастығының авариялық қызмет өкілдері тарапынан қызмет машиналарының автобус желісімен қозғалуы туралы мәселе көтерілді. Тұрғындарды лифтілерден эвакуациялауды жылдамдату мақсатында регламенттік мерзімді азайту тапсырылды.

Отырыста КПТҮ қасбеттерінің ахуалына қатысты шағымдар мен өтініштерге айрықша көңіл бөлінді.  Жыл басынан бері iKOMEK109 орталығына 21 тамыздағы дерек бойынша 595 өтініш келіп түсті, оның ішінде 410 өтінім қаптау тақтайларының құлауына, салбырауына және сыртқы қабығын қалпына келтіруге байланысты болды.

Әкімнің орынбасары қалалық орта сапасы және бақылау басқармасына, аудандық әкімдіктерге қасбеттердің қанағаттанарлықсыз күйі бойынша шағымдарды қысқамерзім ішінде шешу үшін нақты тапсырмалар берді.

Осылайша, Сарыарқа даңғылы, 43 («Гранд жил сервис» ЖШС), Шәкәрім Құдайбердіұлы даңғылы, 25/1 үй («Тұрмыс» ЖШС) мекенжайлары бойынша қасбеттердің нашар күйде екені анықталды.

Аслан Қажен

​Лифт бизнесінің өрлеуіне не кедергі

Лифт зауыттарының қауқары қондырғыны құрастырудан аспай жүр.

07 Ақпан 2019 10:58 509

​Лифт бизнесінің өрлеуіне не кедергі

Бұған дейін тек Ресейден, Беларусьтен, Қытайдан және алыс шетелден дайын өнімді тасып, орнатумен және қызмет көрсетумен шектеліп келген қазақстандық кәсіпкерлер енді отандық лифт өндірісін жолға қоюда.

Бірақ төл стандарттары болмай, бұл сектор ілгерілей алмайтын еді. Осы орайда «Қазақстан лифтовиктер одағы» саланың ұлттық стандартын бекітті. Жеделсаты шаруашылығын жетілдірудің келесі кезеңі – ұлттық стандартты мемлекеттік нормативтік-құқықтық актілерде, заңнамада бекіту болмақ.

Өткен жылы сәуірде Ақтөбеде болған, жас әйелдің қазасына соқтырған қайғылы оқиға еліміздегі лифтілердің көбісінің қызметі сын көтермейтінін көрсетіп берді. Сарапшылардың айтуынша, 2012 жылы қолданыстағы заңнама өзгертіліп, «тігінен қозғалатын көлік түрі» саналатын осы құрылғыны монтаждау және оған қызмет көрсету ісін лицензиялау жойылды. Соның кесірінен, бүгінде Қазақстанның әр аймағында, тіпті елорданың өзінде осы салада келеңсіз жағдайлар дүркін-дүркін орын алып тұрады. Өйткені лифтілер жеткізуші компаниялардың басым көпшілігі арнайы сертификаттаудан өтпейді.

«Тұрғын үй-коммуналдық шаруашылық туралы жаңа заң жобасында «жабдықты пайдалану стандарттарға сәйкес жүргізіледі» деген норма бар. Бұл заң жобасы тек биылғы жылдың екінші жартыжылдығында ғана енгізіледі деп күтілуде. Салдарынан, үдеріс ұзаққа созылып кетпек. Сондықтан салалық қауымдастық стандарттарды нормативтік-құқықтық актілерге ендіру бойынша жұмыс жүргізуде. Осының арқасында тек өзін-өзі реттеу ұйымының мүшесі болып табылатындардың ғана емес, сондай-ақ қалған барлық компаниялардың лифт шаруашылығының қандай жағдайда екенін анықтауға жол ашылады. Бұған аккредиттеу органы мүмкіндік береді. Біз осылайша, ішкі нарықты адал емес ойыншылардан тазартуға ниеттіміз», – дейді «Қазақстан лифтовиктер одағы» заңды тұлғалар бірлестігінің президенті Нұрлан Кенжебаев.

«Қазақстандық регистр» президенті Светлана Заитованың түсіндіруінше, бұған қол жеткізу үшін бекітілген ұлттық стандартты жергілікті әкімдер өз бұйрық-өкімдерінде сілтеме жасайтын құжатқа айналдыру қажет. Яғни, әр өңір қабылдауы керек.

Қазіргі кезде жеделсатыны бірнеше отандық кәсіпорын шығарады. Мәселен, «Алматылифт» ЖШС отандық нарықта жарты ғасырға жуық уақыттан бері жұмыс жасауда. Бірақ осы мерзімнің басым бөлігінде ол жатжұрттық лифт жабдығын сатып алып, тек орнатумен ғана айналысып келген. Ақыры акционерлері шетелдік өнімді тасумен шектеле бермеуге шешім қабылдап, 2016 жылы Алматыда жолаушылар және жүк лифтілерін жасайтын зауытты іске қосты. Оның жылдық қуаттылығы – 1 мың жеделсаты. Бұл ретте жергілікті мазмұн үлесі 70-80 пайыз көлемінде көрінеді. Жалпы, компания Алматы қаласы мен Алматы облысында шамамен 3 мың лифт шаруашылығына қызмет көрсетеді. Ал өз өнімін қазір қаншалықты ілгерілете алуда?

«Біз «Алматылифтке» 732,6 миллион теңге көлемінде мемлекеттік тапсырысты иеленуіне жәрдемдестік. Әйтпесе, бұған дейін мемлекеттік мекемелер, мемлекеттік нысандарды салушы бас мердігерлер Қытайдың, Түркияның және Беларусьтің осы өнімдерін пайдаланып келген», – дейді Алматының кәсіпкерлер палатасы директорының орынбасары Алма Тұрлыбаева.

«Отандық лифт жасайтын» кәсіпорын Астана жанында да, Павлодарда да ашылған болатын. Бірақ олар құрастырумен айналысады. 2014 жылы бой көтерген, кезінде ЭКСПО көрмесін жеделсатымен жабдықтаған «Ақмола лифт жасау зауыты» 400 келіден 1250 келіге дейін жүк көтеретін, 15 адамды сидыра алатын жолаушылар лифтін, 5000 келіге есептелген жүк лифтілерін, сондай-ақ ауруханалық және автомобильдік лифтілерді, траволаторды шығарады. Оның қуаттылығы да жылына 1 мың лифт пен 250 эскалатор жасауға қауқарлы.

Осындай зауыт Шығыс Қазақстанда да құрылған.

Сарапшылардың мәліметінше, Қазақстанда нарықтың ішкі қажеттілігі жылына 1,7 мың жаңа лифтіні құрайды. Бірақ бұл нарық тек кеңейе бермек. Өйткені жеделсаты өңірлерде тек көпқабатты тұрғын үйлер мен ірі кеңселерде, қонақүйлер кешенінде ғана емес, қазір сауда орталықтарында, әуежайлар мен теміржол вокзалдарында, ауруханаларда, тіпті коттедждерде белсенді орнатылуда.

Отандық компаниялар құрылыстың кез келген сегментіне қажетті лифт түрін ұсынады. Бұдан бөлек, тұрғын үй, коммерциялық және әкімшілік лифттер ассортиментін де кеңейтуде: эскалаторлар, траволаторлар, панорамалы лифтілер, коттедждердегі жертөледен не асханадан жоғарғы қабатқа тамақ не басқа да жүкті жеткізетін шағын лифтілер және басқаларын құрастыра бастады.

Негізі, ескі бір лифтіні жаңасына ауыстыру құны 5-6,5 миллион теңгеге түседі. Ал егер оның кешенін толығымен жаңадан құру қажет болса, бұл 2 миллиард теңгеге дейін барады.

Қазіргі кезде тапсырыс беруші клиенттер мәселен, сауда орталықтарын салғанда, лифтілер де, эскалаторлар да бір маркада болуын және оларға жалғыз компания қызмет етуін таңдайтын болыпты.

Өз кезегінде «Қазақстан лифтовиктер одағы» лифтіге қызмет көрсету бойынша тым төмен баға ұсынатын компанияларға сақтықпен қарауға кеңес береді.

«Олардың біразының төл диспетчерлік қызметі болмайды. Олар адал қызмет жеткізушілер тізіміне кірмейді. Бізде өтемақы-компенсациялық қор құрылған. Енді ұйымға мүше компанияның кесірінен апат болған жағдайда жабдықты жөндеу одақтың есебінен жүзеге асырылады. Сонымен бірге, таяуда сақтандыру компаниясымен келісімге қол қойылады. Біз бұдан былай адамдар өмірі үшін жауапкершілік арқалаймыз», – дейді кәсіпкерлік бірлестіктің басқарма мүшесі Алексей Гесс.

«Атамекен» кәсіпкерлер палатасының хабарлауынша, қазір лифт шаруашылықтары алдында ПИК-термен меморандумдар бекіту міндеті тұр. Соның аясында лифтілер тарифін қалыптастыру мәселесі қайта пысықталады. Әйтпесе, кейбір қызмет көрсетуші компаниялар өз тарифін қымбаттата беретінді шығарған.

«Бұл бағытта бизнестің жауапкершілігін көтеру маңызды болып отыр. Себебі, осы салада орын алатын барлық заң бұзушылықтар лифт жабдықтарын пайдалану қауіпсіздігіне, тиісінше, адамдардың денсаулығы мен өмірінің қауіпсіздігіне тікелей ықпал етеді. Біз былтырғы 2018 жылдың соңында Астана қаласы әкімінің орынбасарымен бірге, ПИК-термен ынтымақтастық мәселесі бойынша кеңес өткізгенбіз. Бұл бастапқы қадамымыз және салада өзін-өзі реттеуді енгізу жалғасын табады деген сенімдеміз», – дейді кәсіпкерлердің ұлттық палатасының басқарма төрағасының орынбасары Рустам Жүрсінов.

Бүгінде өзін-өзі реттеу ұйымы тұрғын үй қорының 80%-ын немесе шамамен 70 лифт компаниясын қамтуда.

Бақыт Көмекбайұлы