Биылғы жылдың алғашқы алты айында "Жолаушылар тасымалы" АҚ 10,5 млн жолаушы тасымалдады. Бұл өткен жылмен салыстырғанда 3,3%-ға кем көрсеткіш.
Бір жылда темір жол билеті 5,7%-ға қымбаттады. Ал билет тапшылығы жойылған жоқ. Осыған наразы болған әлеуметтік желі қолданушылары ұлттық компания басшыларын қойып, тікелей Президент Қасым-Жомарт Тоқаевқа шағымданды.
"Үкіметке жаз мезгілінде пойыз билеттерінің тапшылығын қолдан жасауды тоқтату туралы тапсырма бердім. Бұл жағдай азаматтарымызға қолайсыздық туғызып, еліміздегі ішкі туризмнің дамуына кедергі келтіріп отыр", – деп жазды мемлекет басшысы twitter әлеуметтік желісіне.
Өз кезегінде "Жолаушылар тасымалы" АҚ алыпсатарлықтың салдарынан туатын билет тапшылығына тосқауыл қою үшін шілде айының алғашқы күнінен бастап электронды билет сату жүйесіне өзгеріс енгізді. Іс барысында
электронды билет саудасына "Күту парағы" деп аталатын жаңа интернет-сервис қосылды. Осылайша алыпсатарлардың темір жол билеттерін жаппай сатып алуына және қымбат бағаға қайта сатуына шектеу қоюға қадам жасалды. Бұл туралы "Жолаушылар тасымалы" АҚ баспасөз қызметі: "Жаңа жүйенің қызметін 5 мыңнан астам адам сәтті пайдаланды. "Күту парағы" интернет-сервисі теміржол билетін белгілі уақыт аралығында ғана сатылымға түсіреді. Уақытты автоматтандырылған жүйе өзі есептейді. Егер кассир 30 секундта 5 сұраныс жасаса, билет сату тоқтатылады. Бір мезетте 3 билетке тапсырыс берсе, жүйе 5 минутқа бұғатталады. "Күту парағы" компанияға қарасты барлық кассаларда жұмыс істейді. Билет тапшы болған жағдайда жолаушыға "Күту парағына тіркелу қажет. Осылай жасаған жолаушыға билет пайда болған кезде электронды хабарлама жолданады. Жолаушы 2 сағат ішінде билетті компанияға қарасты кез-келген кассадан сатып алуы керек. Көрсетілген уақытта билет сатып алынбаса, жол жүру құжаты кезекте тұрған келесі жолаушыға ұсынылады. Болашақта "Күту парағы" электронды билет сататын сайттарға да енгізіледі", – деп хабарлады.
"Қазақстан темір жолы" ҰҚ" АҚ басқарма төрағасының бірінші орынбасары
Қанат Әлмағанбетовтың сөзінше, билет тапшылығын көлденең табыс сатып алған билеттерін уақыт өте келе қымбат бағаға сатады.
Белгілі болғандай, "Жолаушылар тасымалы" АҚ-ның 233 кассасы бар. Әр касса бейнебақылау арқылы қадағаланады. Сондықтан бұл жерде заңсыздыққа жол берілмейді. Ал жекеменшік кассалардың саны 4,5 мыңнан асады. "Жолаушылар тасымалы" АҚ олардың қызметін қадағалай алмайды. Алыпсатарлар осындай кассалардан алдын ала 20-30 билет сатып алады. Кейін оны вокзалдарды аралап жүріп сатады.
"Ұлттық тасымалдаушы жол жүру билеттерін тек ресми кассалар мен арнайы сайттардан ғана сатып алу қажеттігін ескертеді", – деп хабарлады "Жолаушылар тасымалы" АҚ баспасөз қызметі.
Айта кетейік, жоғарыда саны көрсетілген кассалардан бөлек жол жүру билеттері 4 мыңнан астам терминал және 10 интернет-ресурс арқылы сатылады.
Абылай Бейбарыс
